鐵蓮花
鐵蓮花（Brass knuckles，又或者叫Knuckles、Knucks、Knuckle dusters）係一種鐵造嘅徒手搏擊指節套，個樣好似將四隻戒指連埋一齊，睇起嚟好似蓮花咁，所以叫做鐵蓮花。
用法係將佢套喺四隻手指度，去到指骨位，跟住出拳。由於鐵蓮花又細又硬嘅位可以集中啲拳力落對手度，加上佢用鐵做，所以俾佢打一嘢，輕則暈低，重則死亡，係一樣好危險嘅武器。另一方面，戴住佢來打人，手指唔使直接打落對手度，自己就無咁驚手指受傷。
香港法例，任何人持有鐵蓮花，即列為「管有違禁武器」，一經定罪，最高刑罰判監三年及罰款一萬元。
