響度連串原則
響度連串原則（英文：sonority sequencing principle，SSP）係音系學上一個有關語音組合嘅諗法。語音組合係指一隻語言對於「啲音素可以點排」嘅一啲潛在規則。而根據響度連串原則，一段音節內啲輔音同元音要點樣排，係要睇固有音響嘅。
固有音響係指一個元音或者輔音同其他音長、輕重度同音高相約嘅聲比起嚟「有幾響亮」，愈響亮就算係固有音響愈高，而元音一般都係固有音響高嘅；響度連串原則講緊嘅，就係以下嘅諗法[1]—
一段音節，傾向會係以一個固有音響高嘅音段（通常會係一個元音）做中心，而離中央愈遠嘅音段，固有音響會愈低。
例如想像以下嘅英文音節：
- Grand（意指宏大，/ɡrand/）
當中身為元音嘅 /a/ 固有音響最高，同時 /r/ 固有音響高過 /g/ 而 /n/ 固有音響高過 /d/（如果畫一條線，Y 軸表示固有音響，條線會成一個山峰噉嘅形狀）。相比之下，好似 /rɡand/ 噉嘅音節，就違反咗響度連串原則，所以語言傾向唔會接受噉嘅音節。響度連串原則嘅概念，被指係解釋到「綜觀已知嘅語言，點解 /ɡr/ 常見過 /rɡ/？」依一類嘅問題[1]。
研究指，英文的確係傾向[註 1]服從響度連串原則嘅，但係有研究者指出，某啲語言會大幅度違反響度連串原則，例如俄羅斯話同波蘭話呀噉，所以響度連串原則就畀人插，話佢唔能夠準確噉描述所有嘅語言，缺乏普世性[1]。
睇埋[編輯]
註釋[編輯]
- ↑ 傾向：即係話有例外。