2019年英國下議院選舉

2019年英國下議院選舉喺2019年12月12號舉行。

2019年10月29號一日內，《2019年提早國會大選法》（Early Parliamentary General Election Act 2019）喺英國下議院完成一讀、二讀、付委，當晚以438對20票三讀通過，並提交到上議院一讀。第日30號就喺上議院通過，並喺31號獲英皇御准，正式生效。法案內容好短，專登用來兜過《2011年固定任期國會法》，定於12月12號提早大選。離對上一次2017年英國大選先過咗兩年鬆啲。而上一鋪12月舉行嘅大選係1923年。

今次提早大選，主要因為英國退歐問題困擾多時。執政嘅保守黨想贏多啲位攞到過半數，方便佢哋通過退歐嘅法案。而在野嘅工黨、自由民主黨、蘇格蘭民族黨等等分別想爭取修訂退歐法案謀求軟退歐、將退歐法案交付公投、二次退歐公投等目標。