NV1

出自維基百科,自由嘅百科全書
跳去: 定向搵嘢

NV1NVIDIA第一張3D顯示卡,用咗兩年時間研發,1995年5月推出。當時重未有好似而家Direct3D咁嘅多邊形3D標準,所以nVidia用咗二次方程紋理貼圖作為立體圖形嘅實現方式。佢唔單只擁有完整嘅2D/3D核心,重內置聲音處理核心。呢個聲音處理核心嘅性能有350MIPS,能夠處理簡單嘅立體聲,而呢個核心嘅功能比起好多第一代聲效卡重多咗一個DMA 引擎,可以利用PCI插槽同系統記憶體直接交換數據,避免霸住啲顯示記憶體。至於顯示核心部分,佢第一次用VRAM嚟作為顯示卡嘅記憶體;連接介面方面,NV1 直接支持世嘉Saturn遊戲機手掣同街機掣。

失敗之作[編輯]

之後微軟Windows 95制定咗Direct3D多邊形立體標準,雖然NV1嘅二次方程紋理貼圖係出色嘅技術,但係始終唔兼容Direct3D,亦唔支援當時重係好流行嘅GLIDE。當時nVidia同Diamond合作推出嘅Edge 3D(即係NV1)大幅度降低產品嘅價錢,兼送埋世嘉Saturn遊戲機嘅手掣,但係都無濟於事。NV1始終打唔入主流市埸,而電腦廠商亦唔肯用唔兼容Direct3D嘅圖形晶片。為咗節省開支嚟制造Direct3D圖形晶片,nVidia唯有炒咗部分員工。