冥鏹
冥鏹，係用嚟燒俾已經仙遊咗人喺陰間用嘅紙祭品。至於要用到藤織加紙手工嘅「用品」，一般稱為紙紮祭品。
冥鏹一般係指可以喺冥府用嚟消費嘅紙錢、陰司紙、元寶、金銀衣紙、珠寶首飾，衫褲鞋襪……等；蠟蠋同壇香本來唔屬於冥鏹，但因為通常一齊拜祭用，所以普遍都當咗佢係冥鏹一類。
傳統落嚟，冥鏹同埋紙紮祭品都係要經過燃燒先至可以送到俾先人駛用，通常會放喺稱為化寶爐嘅器皿或者大型嘅化寶鐵櫃裡面燒，燒嘅時候口中仲要叫住先人嘅名、或者名號（平時叫開嘅稱呼），等佢喺陰間知道有親朋由陽間送嘢俾佢。至於其中嘅「交收過程」及先人點樣喺陰間駛用…等，就要參考一啲相關宗教嘅文獻或者識得哩門學問嘅專家嘞。
一般嘅香燭用品店（俗稱紙紮舖）可以買得到冥鏹，一般嘅價錢亦都唔係太貴；如果唔知邊啲打邊啲，通常買嘅地方都會有人教埋，有啲仲會教埋燒冥鏹時嘅禮儀手續。
 |