嘸蝦米輸入法

嘸蝦米輸入法

嘸蝦米輸入法嘅標準拆碼
原作者	劉重次
開發者	行易有限公司
初始版本	1990年
最新發布	J / 2017年1月10號 (2017-01-10)
作業系統	Windows、macOS、Linux
平台	IA-32、x86-64
話	中文
發展狀態	運行緊
軟件類別	付費輸入法
許可協議	專有軟體最終用戶許可協議
網站	http://www.boshiamy.com/

 嘸蝦米輸入法（粵拼：mou5 haa1 mai5 syu1 jap6 faat3） ，係台灣人劉重次發明嘅中文輸入法。佢係一種形碼輸入法，將漢字分拆成字型結構，再以字型結構嘅形、音、義同英文字母加以聯想嚟拼出漢字。嘸蝦米輸入法嘅諗頭係喺劉重次喺歐洲留學嘅期間（1969年 - 1975年左右），當時因為Telex電傳系統（電報機）普及，劉重次於是乎想整返一種方便中文資訊溝通嘅方法。就係咁，佢就沖咗入去中文檢字法嘅世界。過咗幾十年之後，嘸蝦米輸入法終於搞掂咗，跟著劉重次就喺1990年成立咗「行易有限公司」。

名稱

嘸蝦米輸入法嘅商標

嘸蝦米一詞，嚟自台語「無啥物」（臺羅：bô-siánn-mi̍h）嘅官話音譯，即係指「冇乜嘢」。佢嘅外文名稱用咗「Boshiamy」一名；另外點解軟體檔案用咗「Liu」一名，答案係佢係參照咗發明人嘅姓氏──劉。例如2007年可以下載嘅Windows試用版檔名係「liu2007b.exe」。

不過，輸入法官網對佢哋個名就有另一個解釋，以「嘸蝦米」作為輸入法嗰名，「意思就係話，要取大根，唔要取『蝦米根』。」

參照返《教育部重編國語辭典修訂本》，「嘸」字嘅國語讀音，注音係ㄨˇ（漢語拼音：wǔ）。

字根

嘸蝦米輸入法字根數量多，係目前著名形碼輸入法之中最多嗰個。睇返官方嘅字根總表統計，基本字根有341個，簡速字根有156個。不過有輸入法研究者就話官方列表上省去咗或者係遺漏一啲近形字根，例如淨係列出咗「夂」但係又漏咗「攵」，又或者系列出咗「佳」但係冇咗「隹」等等。如果計算回省去或者係遺漏咗嗰啲字根，實際字根數量係唔止咁少嘅。睇返嘸蝦米用戶Deltazone（洋蔥）嘅羅列，嘸蝦米實際上有基本字根580個，簡速字根175個，加埋上嚟字根總數有成755個添。。「嘸蝦米查碼程式」製作者liuzmd1仲指出嘸蝦米有「隱藏字根」。

嘸蝦米輸入法嘅基本字根，跟返官方嘅分類，絕大部份嘅字根可以分返做「形」、「音」、「義」三大類，以26個英文字母做聯想同運用，但係仍然都仲有11個字根必須另行記憶。官方話，咁樣嘅配合聯想方法，係方便緊初學者記熟嗰三百鯪（鯪魚球嗰鯪）個字根同埋英文字母嘅對應。

至於簡速字根，就係為咗提升速度而設。同一個字，即使唔使用簡速字根，都可以用基本字根嚟組成。但係如果係基本字根之外，額外多記呢156個簡速字根，就可以減少部分字嘅輸入碼數，詳情睇返下方「縮短碼長」段落。睇返官方說明，大部份簡速字根都可以納入「形」、「音」、「義」。

「形」

取字根嘅形狀，中文字根同英文字母形狀相似。例如：

漢字	字根	取碼	說明
哈	「口」「亼」「口」	OAO	「口」似「O」，「亼」似「A」，「口」似「O」
論	「言」「亼」「𠕁」	IAM	「言」（ 讠 ）似「I」（i，草書），「亼」似「A」，「𠕁」似「M」。
鈎	「金」「勹」「厶」	ANU	「金」似「A」，「勹」似「N」，「厶」似「U」。
喱	「口」「 厂 」「里」	OLQ	「 厂 」顛倒後似「L」，「里」似「Q」。
掃	「扌」「⺕」「冖」「巾」	JENN	「扌」似「J」，「⺕」反轉後似「E」，「冖」和「巾」也似「N」。
挝	「扌」「寸」「辶」	JAW	「扌」似「J」，「寸」似「A」，「辶」似「W」。呢個字喺簡體模式先可以輸入。
抬	「扌」「厶」「口」	JUO	「扌」似「J」，「厶」似「U」，「口」似「O」。
阿	「阝」「丁」「口」	BTO	「阝」似「B」，「丁」似「T」，「口」似「O」。
屹	「山」「𠂉」「乙」	EVZ	「山」似「E」，「𠂉」似「V」，「乙」似「Z」。
尋	「⺕」「工」「口」「寸」	EIOA	「⺕」似「E」，「工」似「I」，「口」似「O」，「寸」似「A」。

其中某啲字根，或者會令啲初學者拗晒頭，例如「寸」「口」「言」「丁」字，應該取個「形」定係「音」。原則上，如果呢個字根係可以讀到出嚟，大部份都係拎返個「音」，不過有少部份嘅字根，用「形」可以更加容易諗到。「形」對於初學者嚟講，係最直覺亦都係最容易記住嘅字根，所以就算有啲字根可以發到音，佢哋都仲係歸屬於「形」。呢一點就需要留意多啲啦！

整咗但係寫唔到，因為系統問題，我之前搬過嚟嘅時候唔知道原來-｛｝-係唔得嘅。

「音」

取字根嘅發音，中文字根同英文字母發音相似。例如：

漢字	字根	取碼	說明
粉	「米」「八」「刀」	MBD	「米」似「M」（聲母），「八」似「B」（聲母），「刀」似「D」（聲母）。
扉	「戶」「〢」「三」「三」	FRSS	「戶」似「F」（諧音），「〢」似「R」（諧音），「三」似「S」（聲母）。
統	「糸」「ㄊ」「儿」	STR	「糸」當做「絲」旁似「S」（諧音），「ㄊ」似「T」（聲母），「儿」當做「兒」簡化字（ㄦˋ）似「R」（韻母）。
餼	「食」「气」「米」	XKM	「食」似「X」（諧音），「气」似「K」（諧音），「米」似「M」（聲母）。
鬩	「鬥」「臼」「儿」	DGR	「鬥」似「D」（聲母），「臼」似「G」（諧音），「儿」似「R」（諧音）。
統	「糸」「ㄊ」「儿」	STR	「糸」似「S」（「絲」嘅聲母），「ㄊ」似「T」（聲母），「儿」似「R」（諧音）。
處	「虍」「夂」「几」	ZPR	「虍」似「Z」（「據」嘅諧音），「夂」似「P」（聲母），「几」似「R」（「儿」嘅諧音）。

大部份嘅字根，都係跟返佢本身嘅「聲母」或者係「韻母」又或者係「諧音」做聯想，例如：

• 「B」嘅字根：「半」「唔」「比」「八」，都係嚟自於佢個「聲母」
• 「C」嘅字根：「西」「夕」，都嚟自於佢個「諧音」
• 「D」嘅字根：「大」「刀」「豆」「歹」「鬥」「斗」，都嚟自於佢個「聲母」

當中，有啲字根喺跟返「筆順」嘅，呢個嗰陣候就要睇返佢個筆順名嘅發音或者係特徵做聯想，例如：

• 「丿」，佢個筆順名係「撇」，所以取佢個聲母「P」
• 「㇏」，佢個筆順名係「捺」，所以取佢個聲母「N」
• 「乛」「𠃌」，佢個特徵係「歪」，所以取佢個諧音「Y」

但要特別注意嘅係，有啲字根唔係以佢本身個發音或者係諧音做聯想。佢哋會借助某一帶有佢個字根嘅漢字做聯想，呢點就需要留意一下，例如：

• 「糸」，應該以「絲」嘅諧音做聯想，即係「S」
• 「虍」，應該以「據」嘅諧音做聯想，即係「Z」
• 「黽」，應該以「繩」嘅諧音做聯想，即係「X」

另外，亦有少數字根同音嘅聯想，需要借助額外嘅意義做聯結，例如：

• 「弓」「冎」，以佢個內喉發音嘅特徵做聯想，即係「Q」
• 「食」「氏」「升」「黽」，聲母都即係「ㄕ」，將佢哋同「ㄙ」「ㄒ」發音做區別，即係「X」

有一啲要用台語發音做聯想，或者者用變化發音做聯結，例如：

• 「戶」係「F」，唔係「H」
• 「臼」係「G」，唔係「J」
• 「气」係「K」，唔係「Q」

所以初學者開始學習同「音」有關嘅字根嗰陣，應該多啲留意佢哋同英文字母之間嘅發音關係嚟避免因為唔識所以學得好辛苦。

仲有一啲取音嘅字根，曾經比輸入法研究者指發音過於牽強，例如屬於「E」嘅「尹、酉、與」：

• 「尹」同「寅」都讀做ㄧㄣ，但係前者係「E」後者係「N」
• 「酉」同「又」都讀做ㄧㄡ，但前者係「E」後者係「U」
• 「與」同「雨」都讀做ㄩ，但前者係「E」後者係「U」

同注音符號象形嘅字根大多數都係跟返個注音符號取音，但係都有一啲例外嘅，例如：

• 字根「ㄅ」唔當做「B」，應該當做「K」
• 字根「ㄙ」唔當做「S」或者「X」，應該當做「U」
• 字根「ㄍ」唔當做「G」，應該當做「R」

等等，都要特別記住㗎。

「義」

取字根意思嘅聯想，總共分成三個部份：

數目字

下面全部列舉：

• 「〇」即係「O」（形）
• 「一」即係「E」（音）
• 「二」即係「R」（音）
• 「三」即係「S」（音）
• 「四」即係「F」（英文Four）
• 「五」即係「W」（音）
• 「六」即係「L」（音）
• 「七」即係「C」（音）
• 「八」即係「B」（音）
• 「九」即係「K」（閩南語發音）
• 「十」即係「J」（閩南語發音）

英文

下面全部列舉：

• 「車」即係「C」（Car）
• 「中」「央」即係「C」（Center）
• 「日」即係「D」（Day）
• 「女」即係「G」（Girl）
• 「手」即係「H」（Hand）
• 「心」即係「H」（Heart）
• 「我」即係「I」（I）
• 「王」即係「K」（King）
• 「斤」即係「K」（Kilo）
• 「亻」即係「P」（People）
• 「木」即係「T」（Tree）
• 「佳」即係「V」（Very good）
• 「水」即係「W」（Water）

搖頭擺尾

指嘅係字根「形狀」上（唔係「字義」上）嘅變化，可以想像將一個字根拎喺隻手到搖N咁多次。最後，個字根就會變咗做另一個樣。例如：

• 「干、千、チ、乇」「ㄐ、爿」等，取「G」
• 「乚、厂、广」「六、亠」「立、辛」等，取「L」
• 「幺、了」「辶、廴」等，取「W」
• 「彐、⺕、ヨ、习、尹、丑、聿」「山、屮、屲、屯」「爫、爪」等，取「E」

其實，數目字嘅延伸都有大量嘅搖頭擺尾字根，特別要注意嘅字根就係「八」嘅搖頭擺尾「人」「入」，要同「亻」做區別。

搖頭擺尾可以話係字根數最多嘅一種。所以學習嗰陣，掌握好基礎嘅字根，之後再同搖頭擺尾嘅字根一步一步咁吸收嘅話，就可以事半功倍！

漢字	字根（搖頭擺尾字根以雙引號標示）	取碼	搖頭擺尾說明
益	『丷』「一」「八」『皿』	BEBF	『丷』即係「八」，『皿』即係「四」。
義	『丷』「王」「我」	BKI	『丷』即係「八」，「王」譯做「King」，「我」譯做「I」。
慬	「忄」『廿』『堇(無廿)』	HRC	『廿』即係「二」，『堇(無廿)』即係「中」。
染	「氵」「九」「木」	WKT
嫶	「女」『隹』「灬」	GVF	『隹』即係「佳」（官方漏咗嘅字根）。
螹	『虫』「車」「斤」	CCK	『虫』即係「中」。
眾	『罒』「亻」『人』『人』	FPBB	『罒』即係「四」（官方漏咗嘅字根），「亻」『人』唔好混淆。

有一部分字根，同英文字母嘅形、音、義都冇挐褦。用家一定要死記咗佢哋。下底全部列舉：

• 「欠」係「I」。
• 「黃」係「K」。（可以試下用聯想法，例如：黃金 → K金、黃帝 → King）
• 「至」係「P」。
• 「兼」係「Q」。
• 「𧰨（“豕”無最上面一橫）」係「Q」。
• 「才」係「U」。
• 「衤」係「V」。（從好幾個角度睇都係有「V」嘅形狀喺呢個部首上面）
• 「鬼」係「V」。（可以試下用聯想法，例如：鬼好得人驚 → Very scary 、好驚鬼 → Very afraid）
• 「牙」係「X」。（「X」形狀似係上下兩隻尖牙）
• 「士」係「Y」。
• 「土」係「Y」。

不過，「黃」「兼」「鬼」呢三個字根事實上係可以用拆碼嘅方式輸入嘅，分別係「REQB」「BEEF」「PQRU」。而「豕（冇最上面嗰一橫）」，官方又將佢當做「犭」嘅搖頭擺尾。所以呢四個字根，學習者可以睇返情況再揀要唔要死記。

一定要用簡化字幫手嚟記嘅字根

仲有一堆字根，一定要用簡體字嘅字形做聯想。下底全部列舉：

• 「言」當做偏旁嗰陣簡化做「讠」，就好似小草「i」形，所以就當做「言」納入「I」度。
• 「堅」簡化做「坚」，所以就當做「臣」納入「〢」即「R」。
• 「齊」簡化做「齐」，所以就當做「齊」嘅上方納入「文」即「W」。
• 「婁」簡化做「娄」，所以就當做「婁」嘅上方納入「米」即「M」，等等。

潛規則

嘸蝦米輸入法喺拆字嗰陣，會用到一啲潛規則。雖然官方冇特別講出嚟，但係喺分解漢字嗰陣其實係會用到嘅。有一啲學習者或者會有啲唔明；另一啲學習者會主張背簡碼嚟輸入呢啲令人打哂問號嘅漢字。例如：

• 除咗官方嘅字根表之外，輸入法入面仲有一啲「隱藏字根」（undocumented）係官方冇列到嘅，要用戶自己搵。例如：
  • 「撲」、「璞」、「僕」呢一堆字嘅「菐」可以取「FB」。「對」嘅左旁，「業」、「叢」上方可以取「F」。
  • 「楠」、「蝻」、「献」呢一堆字嘅「南」可以取「N」。
  • 「蜷」、「圈」、「勌」呢一堆字嘅「卷」可以取「P」。
  • 「拔」、「茇」、「蛂」呢一堆字嘅「犮」可以取「A」。但「盋」字唔可以咁取。

• 例如：如果冇呢個字根，喺拆字嗰陣就要借一借同佢個樣相似嘅字根（其實即係官方遺漏嘅搖頭擺尾字根）。例如：
  • 「唯」字冇「隹」字根，所以就借咗同佢個樣相似嘅「佳」字根。
  • 「己」字冇「コ」字根，所以就借咗同佢個樣相似嘅「ユ」字根。
  • 「草」字冇「艹」字根，所以就借咗同佢個樣相似嘅「廾」字根。
  • 「敬」字冇「卝」字根，所以就借咗同佢個樣相似嘅「廾」字根。
  • 「罪」字冇「罒」字根，所以就借咗同佢個樣相似嘅「四」或者「皿」字根。
  • 「鬲」字冇「丅」字根，所以就借咗同佢個樣相似嘅「丁」字根。
  • 「敵」字冇「攵」字根，所以就借咗同佢個樣相似嘅「夂」字根。
  • 「亦」字冇「赤(無土)」字根，所以就借咗同佢個樣相似嘅「㣺」字根。
  • 「兵」字冇「丘(無底橫)」字根，所以就借咗同佢個樣相似嘅「斤」字根。
  • 「錄」字冇「彑(無底橫)」字根，所以就借咗同佢個樣相似嘅「夕」字根。
  • 「叟」字冇「𦥑」字根，所以就借咗同佢個樣相似嘅「臼」字根。
  • 「卫」字冇「ㄗ」字根，所以就借咗同佢個樣相似嘅「卩」字根。
  • 「除」字冇「余(無人)」字根，所以就借咗同佢個樣相似嘅「禾」字根。
  • 「冒」字冇「⺜」字根，所以就借咗同佢個樣相似嘅「日」字根。
  • 「牆」字舊版冇「嗇(無回)」字根，所以就借咗同佢個樣相似嘅「巫」字根。新版已經補返呢一個字根喇！

不過，用戶用嗰陣要注意一下，有啲形狀唔可以用同佢個樣相似嘅字根代替，一定要再拆分。例如「无」字唔能夠借用「旡」字根，一定要分拆做「一」「尢」。「刁」字唔能夠借用「刀」字根，一定要分折做「𠃌」「㇀」。所以，對於官方遺漏嘅字根係咪可以用「搖頭擺尾」嘅方法解決 呢條問題，答案係又啱又錯。無限搖頭擺尾呢招唔係成日Work㗎！

取碼原則

大根原則

取碼嗰陣，先取較大嘅字根。例如：

• 「給」取「SAO」：即係「糸」「亼」「口」。唔取「WSAO」 （「ㄠ」「小」「亼」「口」）。
• 「春」取「FND」：即係「丰」「㇏」「日」。唔取「SBD」（「三」「八」「日」）
• 「畫」取「EQE」：即係「聿」「田」「一」。唔取「EYQE」（「肀」「土」「田」「一」）。

但係都有例外：（跟返官方個版本，有些字會以為主，但係都離唔開大根原則）

• 「捨」取「JBGO」：即「扌」「人」「干」「口」。但「JAJO」（「扌」「亼」「十」「口」）比「JBGO」更符合大根原則。
• 「註」取「IAK」：即「言」「丶」「王」。但「ILY」（「言」「亠」「土」）比「IAK」更符合大根原則。
• 「喪」取「JOOK」：即「十」「口」「口」「畏(無田)」。但「YOOK」（「土」「口」「口」「𧘇(無首筆)」）比「JOOK」更符合大根原則。
• 「囧」取「ORN」：即「囗」「儿」「冂」。但「FNO」（「四」「冂」「口」(補根)）比「ORN」更符合大根原則。
• 「無」取「VFF」：即「𠂉」「卌(有底橫)」「灬」。但「WSF」（「午」「丗」「灬」）比「VFF」更符合大根原則。
• 「兵」取「POB」：即「丿」「丘(無丿)」「八」。亦都可以取「KEB」：即「斤」「一」「八」。第一個方式唔符合大根原則，係容錯碼。
• 「天」取「GNN」：即「チ」「㇏」「㇏」。或者都可以取「EDN」：即「一」「大」「㇏」。第二個方式唔符合大根原則，係容錯碼。
• 「物」取「SNM」：即「牛」「勹」「〃」。但「SDP」（「牛」「ㄉ」「丿」）比「NMP」更符合大根原則。

例外字當中，有一部分係因為嘸蝦米輸入法將一啲形狀當做分水嶺，會順高底次序取分水嶺上方、分水嶺、分水嶺下方嘅部件。常見嘅分水嶺包括：四面包圍型（方框形）的字根，三面包圍型嘅字根，一點、兩點、三點、四點或者係類似嘅形狀，同「氺」「氶」「龰」「止」「𠂉」「个」「禾」「畏(無田)」「王」「𧰨」等字根。所以，好似「註」「喪」等字可以跟返呢度解釋。但係都有一啲字解釋唔到。

取碼順序

1. 取碼順序多數跟返書寫順序為原則，包括「辶」、「廴」為最後取碼。
2. 「平頭」嘅文字就要由左至右取碼。
3. 「不平頭」嘅文字，由上到下取碼，較高出嘅根先取。
4. 但如果可以截斷筆畫取出部件嘅話，或者喺一啲可以以視覺辨識嘅原理嚟分解嘅字中，就以目視嚟分拆字嘅輪廓，稱為「眼順」，唔同筆順符合。
5. 連體字，例如「東、申、由」等字，需要將「四面包圍」嘅字根，就好似呢度三個字中嘅「田」字，獨立取碼。
6. 「三面包圍」嘅字根，如「勿、易、陽」中嘅「勹」字，獨立取碼。
7. 將一點、兩點、三點、四點等字根獨立取碼。
8. 「戈(無丶)」「弋(無丶)」呢兩個字根，應該先取上方嘅一點，即「A」，跟著取「戈(無丶)」「弋(無丶)」，再取下方嘅字根。
9. 好似「戈、弋」同類嘅字，例如「犬、求、甫、朮」等，亦先取上方嘅一點，即「A」，再取下方嘅部件，即係將中間部件視為分水嶺取碼。
10. 有兩旁相稱嘅根夾另一字根時，將被夾嘅字根分為上下兩個字根。換言之被夾嘅字根要被由中間腰斬，破開為上下兩個根。

例如：

漢字	字根	取碼	說明
造	「⺧」「口」「辶」	SOW	跟筆順。
鍵	「金」「聿」「廴」	AEW	跟筆順。
彎	「糸」「言」「糸」「弓」	SISQ	「彎」係「平頭」字，所以上方部件應該由左至右取碼。
非	「〢」「三」「三」	RSS	「非」唔係「平頭」字，由上至下取碼，而唔係按筆順取「丿」「三」「丨」「三」。
申	「丨」「田」「丨」	IQI	中間嘅「田」應該獨立取碼。跟眼順唔跟筆順。
柬	「十」「𡆧」「个」	JQS	中間嘅「𡆧」應該獨立取碼。跟眼順唔跟筆順。
棄	「ㄊ」「丗」「木」	TST	中間嘅「丗」應該獨立取碼。跟眼順唔跟筆順。
拒	「扌」「匚」「コ」	JFF	出面嘅「匚」先取，再取右側嘅「コ」
或	「丶」「戈(無丶)」「口」「一」	AQOE	之上嘅「丶」先取，跟著取「戈(無丶)」，再取之下嘅「口」「一」。唔跟筆順。
栽	「十」「丶」「戈(無丶)」「木」	JAQT	之上嘅「十」「丶」先取，跟著取「戈(無丶)」，再取之下嘅「木」。局部跟筆順，局部唔跟筆順。
述	「丶」「木」「辶」	ATW	之上嘅「丶」先取，再取「木」，再取「辶」。局部跟筆順，局部唔跟筆順。
犬	「丶」「大」「㇏」	ADN	之上嘅「丶」先取，再取「大」，並添加一枚輔根「㇏」。唔跟筆順。
垂	「千」「十」「十」「土」	GJJY	被兩旁相夾嘅字根，分別取作「千」「土」。唔跟筆順。
爽	「十」「〤」「〤」「人」	JXXB	比兩邊相夾嘅字根，分別取作「十」「人」。唔跟筆順。
微	「(兩撇同ㄓ)」「丨」「儿」「攵」	MIRP	「(兩撇同ㄓ)」應該同時取碼，以免字根過細，同「徵」「黴」等字重碼。唔跟筆順。
嬴	「吂」「月」「女」「卂」	FUGZ	「吂」應該同時取碼，以避免字根過細，同「贏」「羸」等字重碼。

截長

「截長」指嘅係一個字如果拆碼超過四碼，就淨係取首、二、三、尾碼就可以，其他嘅就整走佢。例如：

漢字	未截長時嘅字根	截掉嘅字根	取碼	補充說明
歡	「廾」「口」「口」「佳」「欠」	「佳」	ROOI
鱒	「魚(無灬)」「灬」「丷」「酉」「寸」	「酉」	UFBA
澳	「氵」「丿」「冂」「釆」「大」	「釆」	WPND
贏	「吂」「月」「目」「八」「卂」	「八」	FUMZ	「吂」應該要同時取碼，費事字根太細，同「嬴」「羸」等字重碼。
腳	「月」「八」「人」「口」「卩」	「口」	UBBP
歸	「丿」「㠯」「止」「⺕」「冖」「巾」	「⺕」「冖」	PBZN
蘠	「艹」「爿」「巫」「口」「口」	「口」	RGWO

補短

「補短」指嘅係一個字拆碼如果唔夠三個碼，就需要加返啲補根，即係最後嗰條筆劃或者係個形狀。例如：

漢字	未補短時嘅字根	補根	取碼	補充說明
明	「日」「月」	「一」	DUE
合	「亼」「口」	「口」	AOO
取	「耳」「又」	「乂」	RUX
卒	「𠅃」「十」	「十」	JJJ
雲	「雨」「 云 」	「丶」	UTA
鹿	「鹿(無比)」 「比」	「乚」	LBL
建	「聿」「廴」	「㇏」	EWN
鳬	「 鳥 (無灬)」 「 几 」	「乚」或「乙」	NRL／NRZ	「乚」「乙」喺好多時候都係定義模糊嘅，所以整咗好多爭議出嚟，所以暫時嚟講兩個都係OK嘅。

不過，因為十一個數目字「〇、一、二、三、四、五、六、七、八、九、十」成日都用，所以補根就唔使加啦，一個碼就可以輕鬆輸入啦！但係如果做其他漢字嘅字根嘅時候，呢個規則就唔適用，就例如：「仁」字係應該取「PRE」。

縮短碼長

因為補短原則，騰空咗一大堆二碼位置同部分一碼位置，呢個空間就用咗嚟加埋最常用嘅字，就達至縮短輸入碼長嘅效果，計有簡速字根、一碼簡碼字同二碼簡碼字。

簡速字根

為咗再減少其他字嘅碼長，佢仲加咗超過一百個簡速字根。呢啲字根多數係字嘅常見偏旁，比其他字根大好幾倍。例如：

• 「俞」係簡速字根，放喺「A」到，所以：
  • 「俞」字由「AUR」縮短至「A」，但係因為唔夠三個碼，所以跟返「補短」規則，補返條輔根「亅」。結果取「AI」。
  • 「愈」字由「AURH」縮短至「AH」，但係因為唔夠三個碼，所以跟返「補短」規則，補返條輔根「丶」。結果取「AHA」。
  • 「輸」字由「CAUR」縮短至「CA」，但係因為唔夠三個碼，所以跟返「補短」規則，補返條輔根「亅」。結果取「CAI」。
• 「舍」係簡速字根，放喺「B」到，所以：
  • 「舍」字由「BGO」縮短至「B」，但係因為唔夠三個碼，所以跟返「補短」規則，補返條輔根「口」。結果取「BO」。
  • 「舍」係簡速字根，放喺「B」到——「捨」字由「JBGO」縮短至「JBO」。
• 「易」係簡速字根，放喺「E」到，所以：
  • 「場」字由「YDEM」縮短至「YE」，但係因為唔夠三個碼，所以跟返「補短」規則，補返條輔根「丿」。結果取「YEP」。
  • 「傷」字由「PVDM」縮短至「PVE」。
• 「咸」係簡速字根，放喺「K」到，所以：
  • 「感」字由「AQPH」縮短至「KH」，但係因為唔夠三個碼，所以跟返「補短」規則，補返條輔根「丶」。結果取「KHA」。
  • 「憾」字由「HAQH」縮短至「HKH」。

其他簡速字根都可以咁樣推斷出嚟。

一碼簡碼字同二碼簡碼字

一碼字嘅原則：除咗十一個字母係數目字之外，仲有十五個字母冇比人用到，所以順便用盡埋佢哋。呢類文字嘅取碼大部分都係以某個字嘅其中一碼或者音嚟配置，比如:

• 「對」字原本就係取「FEBA」，不過都可以用簡碼「A」嚟減少三碼。
• 「嘅」字原本就係取「PDNA」，不過都可以用簡碼「D」嚟減少三碼。
• 「機」字原本就係取「TWWB」，不過都可以用簡碼「G」嚟減少三碼。

呢十五個一碼字亦可以當字根咁用，譬如：

• 「懟」字原本就係取「FEBH」，不過都可以取「AHA」。
• 「啲」字原本就係取「OPDA」，不過都可以取「ODA」。

二碼字嘅原則：

• 由標準字根產生：某啲字以基礎嘅打法本身就係二碼字。舉啲例子:
  • 「金」字取「AE」，本身就係二碼字。
• 由簡速字根產生：嘸蝦米輸入法係咗提升打字嘅速度，於係乎加咗一大堆簡速字根，呢啲上面已經提過。而根據簡速字根，某啲字都成係咗二碼字，例如：
  • 「並」字原本就係取「BEFE」，但同時都係簡速字根「B」，所以「並」可取「B」，依「補短」規則，補上一條輔根「一」。結果取「BE」，係二碼字。
  • 「咸」字原本就係取「AQPO」，但同時都係簡速字根「K」，所以「咸」可取「K」，依「補短」規則，補上一條輔根「口」。結果取「KO」，係二碼字。
• 由「頭碼」同「尾碼」產生：這係係數最多嘅二碼字類別，即係取一個字嘅第一個碼同最後一個碼，如：
  • 「覺」字原本就係取「SNMR」，取「覺」字嘅頭尾碼即係「SR」。
  • 「感」字原本就係取「AQPH」，取「感」字嘅頭尾碼即係「AH」。
• 由簡體字字型產生：呢個原則之下嘅二碼字剩係得九個，其中都有啲剩係取頭尾碼嘅成分，以下全部展示：
  • 「術」字原本就係取「MIAT」，「術」嘅簡體字係「术」，所以取作「AT」。
  • 「靈」字原本就係取「UOOW」，「靈」嘅簡體字係「灵」，所以取作「EF」。
  • 「遷」字原本就係取「CDPW」，「遷」嘅簡體字係「迁」，所以取作「GW」。
  • 「開」字原本就係取「MKJ」，「開」嘅簡體字係「开」，所以取作「KJ」（連補根）。
  • 「長」字原本就係取「EKN」，「長」嘅簡體字係「长」，所以取作「KN」（連補根）。
  • 「麗」字原本就係取「LLB」，「麗」嘅簡體字係「丽」，所以取作「LA」（連補根）。
  • 「廠」字原本就係取「LSNP」，「廠」嘅簡體字係「厂」，所以取作「LP」（連補根）。
  • 「夢」字原本就係取「RFNC」，「夢」嘅簡體字係「梦」，所以取作「TC」。
  • 「聲」字原本就係取「YCRR」，「聲」嘅簡體字係「声」，所以取作「YC」。
• 由形音義產生：幾乎所有呢類型嘅字，都係跟返個發音或者係英文，或者再加埋佢本身嘅部分取碼組合而成，以下就俾四個例子：
  • 「澳」字原本就係取「WPND」，取「澳」字嘅發音即係「AU」。
  • 「街」字原本就係取「MIYT」，取「街」字嘅意思Street，縮寫係ST.，即係「ST」。
  • 「得」字原本就係取「MIDA」，取「得」字嘅發音同第三碼即係「DD」。
  • 「己」字原本就係取「FLL」，取「己」字嘅發音即係「GG」。
• 由「截取其中兩碼」產生：有些字嘅簡碼字嘅取碼唔係跟著個順序揀，甚至有啲仲好騎呢（低音）咁揀個尾碼做開頭嘅碼（即係首碼），以下舉啲例子：
  • 「媽」字原本就係取「GMF」，取「媽」字嘅頭碼同第二碼即係「GM」。
  • 「麵」字原本就係取「GPTH」，取「麵」字嘅尾碼同頭碼即係「HG」。
  • 「哥」字原本就係取「TOTO」，取「哥」字嘅頭碼同第三碼即係「TT」。
• 用「剩係認得一碼，另一碼就格硬砌落去」方法產生：以下舉例：
  • 「鏡」字原本就係取「ALDR」，取「鏡」字嘅頭碼，但係另一碼則硬性配對，即係「AC」。
• 用「冇挐褦」絕招：完全搵唔到同字根嘅關聯，例如：
  • 「宣」字原本就係取「NEDE」，不過唔知點解就取咗「CF」呢兩個碼。

一碼同二碼簡碼字總共有（26+26×26）字。佢哋唔可以推類。例如「感」字取「AH」，但係「憾」同「撼」係唔能夠拆做「PAH」同「JAH」。

二碼簡碼字大多數都係冇規律可尋嘅，但係如果睇返官方嘅二碼字表嘅內容，字根帶有「虫、心、皿、母、月、卑、兌、州、荒、疑、龰、𢦏」呢一堆多數都係二碼字。

符號嘅輸入

符號嘅輸入係嘸蝦米輸入法嘅一個特色，唔單止常用嘅符號可以直接輸入，就連特殊符號都可以輸入到，可以唔使好似其他嘅輸入法咁仲要開個小鍵盤或者係入佢個內碼搵。值得注意嘅係，喺輸入特殊符號嗰陣，截長補短嘅規則都依然仲係適用嘅。符號嘅輸入方式可以分做以下兩種：

1. 一般符號輸入：輸入「,」「.」「..」「.,」「S.」「V.」「VV」「[」「[[」等等嘅時侯就會出現「，」「。」「：」「；」「？」「！」「、」「「」「『」。
2. 特殊符號輸入：如果要輸入特殊符號，就一定要一開頭打咗一個逗號先，之後先再加返符號嘅碼。咁就可以直接打出特殊符號㗎喇，譬如：
   • 「㊣」符號，只需要輸入「,EZ」就可以㗎啦。（「正」嘅嘸蝦米解碼係「EZE」，但係加埋逗號就已經有三個碼喇，所以唔使補短添加輔根。）
   • 「⑽」符號，只需要輸入「,GJ」就可以㗎啦。（「G」即係指括號咁解。）
   • 「§」符號，只需要輸入「,SS」就可以㗎啦。（「§」形似「SS」。）
   • 「¼」符號，只需要輸入「,EPF」就可以㗎啦。（「P」為撇。）
   • 「Δ」符號，只需要輸入「,DEL」就可以㗎啦。（「Delta」嘅前三碼。）
   • 「☎」符號，只需要輸入「,TEL」就可以㗎啦。（「Telephone」嘅前三個碼。）

特色

• 嘸蝦米輸入法同倉頡輸入法一樣都係以26個英文字母為字根。
• 嘸蝦米輸入法同大易輸入法相比，保留咗上排數字鍵俾使用者直接輸入數字，操作筆記型電腦嗰陣呢個優點變得好明顯。
• 官方宣傳認為，嘸蝦米輸入法好簡單、速度好快、好容易學習，係「史上最強輸入法」同「世界最佳中文輸入法」。
• 用咗26個英文字母做組字按鍵，官方宣傳嗰陣話熟練中文打字後，通常都可以熟練英文打字。但係有輸入法研究者提出異議。
• 用咗「空白鍵」做組字鍵。
• 字根數量係目前著名形碼輸入法之中最多嘅。
• 不少字根都比較大塊。所以遇到大塊嘅字根嘅時候就唔使再分拆做細字根喇！（補短嗰陣例外）
• 官方宣傳同愛好者話，因為字根分形、音、義歸類，所以就會變到好容易學習同記憶。但係有輸入法研究者就提出異議。
• 拆字嗰陣會喺同一筆斷開，例如「申」取「IQI」（即「丨、田、丨」），喺同一筆（呢個例子係一棟）上面砍斷（呢個例子就變咗三忽）（其實倉頡都有呢個問題。）
• 官方宣傳同愛好者話佢哋個輸入法（即嘸蝦米輸入法）嘅拆字取碼規則簡單易學，贏其他輸入法成大截。但係有輸入法研究者提出異議。
• 官方宣傳嗰陣話選字率低，適合盲打，可以保護眼睛，減少對眼睛視力嘅傷害。但係有輸入法研究者統計過，嘸蝦米重碼率係好幾種常見形碼輸入法之冠。（倉頡係重碼率最低之冠）
• 同大新倉頡輸入法一樣都係要俾錢嘅。參考返官網，截至2023年11月17日，以Windows為例，嘸蝦米輸入法就總共有三樣產品，有家用商用，最平嘅NT680（支援13,053字)，最貴嘅NT1280(支援107,561字)。所以，有好多人都會用唔使俾錢嘅 偽蝦米輸入法（但係要搭配官方嘅參考檔）（非官方) 或者係 嘸蝦米輸入法試用版（官方）（要不斷用程式手動更新時限）。
• 除咗可以輸入大多數字形輸入法都支援嘅基本正體中文、簡體中文之外，仲可以直接輸入符號、日文漢字及平假名、片假名！
• 整合咗大量簡快碼、容錯碼。
• 除咗支援Unicode，亦都支援 Windows、Mac OS、Unix-like、Android 平台。
• 試用版嘸蝦米（官蝦）最多可以輸入20組加字加詞。

使用比例

以下係字形輸入法嘅比較

輸入法	時間 （年）	輔助字根數	大五碼常用字重碼率 共5401個字
倉頡	1976	140個（含難字根）	三代：${\frac {434}{5401}}=8.04\%$
鄭碼	1980	約170個	不明
五筆	1983	約200個
大易	1988	約250個	三碼：${\frac {2115}{5401}}=39.16\%$
			四碼：${\frac {613}{5401}}=11.35\%$
嘸蝦米	1989	基本字根約350個 簡速字根約150個	${\frac {2515}{5401}}=46.57\%$
行列	1992	超過300個	${\frac {1064}{5401}}=19.70\%$

使用狀況

• 臺灣：根據2011年波仕特嘅調查報告指出，臺灣使用嘸蝦米輸入法嘅比例係10.7%。其他嘅有注音輸入法70%、倉頡輸入法9.9%。
  • 其實以前比例係多啲。曾經喺90年代，嘸蝦米輸入法因為劉重次先生嘅極力推廣，加上佢喺比賽度真係好快，仲贏咗好多獎，跟住就成大咋人俾錢沖咗去學。因為有錢，當其時就更加不斷研發，令呢個輸入法進步得好快。不過，隨往因為喺2003年交唔到專利費同劉重次先生喺2007年因病過生，呢個輸入法就冇乜再更新。加上因為當初政策係不斷喺度限制授權，用嗰啲一定要俾錢同埋剩係得佢自己先可以更新個輸入法，於是乎就咁沒落咗（相對最初)！

• 港澳：由於普遍市民唔識或者唔習慣注音，而粵語拼音亦都唔夠流行，後生呢批更加嫌倉頡速成要拆碼好麻煩。嘸蝦米輸入法唔單止要拆碼，仲要俾錢，唔係度度都有得用，就更加唔流行。所以，依家已經有更加多人轉咗去用拼音輸入法（普教流行）、九方（需付費）筆畫手寫甚至乎語音，造成將來工作打中文字唔方便。

解決方案

偽蝦米輸入法

因為官方嘅嘸蝦米輸入法係要俾錢嘅（價錢方面可以睇返「特色」嗰度）。所以就算買咗嗰啲，都剩係得自己嗰部電腦有得用，喺出面嗰到冇得用（嘸蝦米輸入法），造成唔方便，所以有個叫做Luke Chang嘅人喺2003年整咗嗰 偽蝦米輸入法(嚴格啲嚟講係輔助軟件）出嚟解決呢個問題。

佢本身係免費嘅，不過前提係要有官方嘅嘸蝦米輸入法嘅一個檔案（可以複製或者係自製）。

詳情可以睇返 偽蝦米輸入法 呢一個頁面。

嘸蝦米試用版

去官方下載就可以啦。由於係試用版，用咗一排就會用唔到，要俾錢，除非用特別嘅方法調校時間

兩個一齊用

更加簡單嘅方法係，下載嘸蝦米試用版，並且安裝，然後拎佢個檔案，再用偽蝦米複製，咁就可以永久免費使用！（睇個參考，入面係教學） （自己用就冇問題，商業用可能違法）

不過淨係得6000幾個字，想要多啲就要買正版或者去人哋部機度整。

參考

參考書籍

• 《行易(嘸蝦米)輸入法》，作者：劉重次，出版社：松崗，出版日期：1995年，出版地：台灣，ISBN：9789572205228
• 《中文之美：倉頡/嘸蝦米輸入法》，作者：陳慧津、吳南烈，出版社：第三波，出版日期：1994年，出版地：台灣，ISBN：9789572302873
• 《電腦概論與嘸蝦米輸入法》，作者：鄭連慶，出版社：碁峰，出版日期：1997年，出版地：台灣，ISBN：9789575660635
• 《嘸蝦米中英文輸入高手測驗PRO2000》，作者：劉重次，出版社：第三波，出版日：2000/8/22，出版地：台灣，ISBN：9789572309520
• 《輕鬆學會嘸蝦米輸入法》，作者：劉重次，出版社：旗標，出版日期：2008/11/10，出版地：台灣，ISBN：9789574426713

睇埋

• 偽•蝦米

• 九方輸入法

• 倉頡輸入法

• 大新倉頡輸入法

• 鄭碼

• 行列

• 漢字