太監

出自維基百科,自由嘅百科全書

太監中國古代官名(成日同「大監」混淆,但兩者係唔同意思),[1][2]最早出現喺北魏,係作為女官稱號。唐朝嗰時係外朝官職大監嘅別稱。宋朝係高級女官職稱,遼朝係政府高級職位嘅名。到咗明朝時,由於太監職位成日都係由宦官擔任,於是「太監」就變咗高級宦官嘅稱呼,到清朝,宦官全部都叫做太監,之後先變成宦官統稱。1912年清朝覆滅之後太監先開始消失。

歷史[編輯]

太監呢個名係喺北魏開始出現,孝文帝置女官管理內事,其中就有「大監」一職,喺作司之下,女侍中之上[3],而古人又成日將「大」與「太」撈亂用,所以「大監」可能就係太監,例如喺北齊,宮女出身嘅穆黃花(字舍利)畀北齊後主高緯臨幸之後就畀人叫做「舍利太監」[4]

唐代外朝官職中有大監,亦都寫做太監。

「太監」作為正式官名嘅記載係喺宋代孫逢吉嘅《職官分紀》記載,宋太宗喺內廷置內官(女官),有尚宮同太監,一齊負責內省事務,又改內省為做尚書內省,尚書、太監都叫尚書。呢度嘅太監係高級女官職稱,亦寫成大監[5]。亦都有其他官署設有太監官職。

遼代,太監係南面官入面嘅太府監少府監秘書監將作監都水監等等官署嘅主官,下面有少監監丞

元代藝文監典用監典醫監典牧監甄用監太府監度支監利用監中尚監章佩監經正監秘書監等等嘅官署都設有太監官職,地位低過位次各監嘅卿或者太卿。

明代宮中設二十四衙門,入面設有十二監、四司、八局,每一個都專設一個掌印太監負責提領,其中十二監中嘅內官監御用監、四司、八局、內府供用庫、提督東廠等,每一個都設一個掌印太監。部份機構例如司禮監除咗掌印太監之外,重有提督太監秉筆太監隨堂太監;提督京營除咗掌印太監之外重有坐營太监。由於呢啲太監成日由宦官出任,於是後來「太監」就變咗高級宦官嘅稱呼。但係明代並無規定太監職位一定要由宦官出任。

到清朝,宦官全部都叫太監,太監一詞先完全等如宦官。

[編輯]

  1. 《廣雅‧釋詁一》:如大宰俗作太宰,大子俗作太子,周大王俗作太王是也。
  2. 《白虎通義‧五行》:太,亦大也。
  3. 《北史·后妃傳序》:「孝文改定內官……後置女職,以典內事:內司視尚書令、僕;作司、大監、女侍中三官視二品。」
  4. 《北齊書·斛律后傳》:「后主皇后穆氏,名邪利……小字黃花,后字舍利。……入宮,有幸於後主,宮內稱為『舍利太監』。」
  5. 《職官分紀·內官》:「國朝太宗置尚宫及太監,並知內省事。又改內省為尚書內省。令尚宫、太監並號尚書。」