棉花

棉花
物種分類
域(Domain): 真核域 Eukarya 界 (Regnum): 植物界 Plantae 門 (Phylum): 被子植物門 Magnoliophyta 綱 (Classis): 雙子葉植物綱 Magnoliopsida 目 (ordo): 錦葵目 Malvales 科 (familia): 錦葵科 Malvaceae 屬 (genus): 棉花屬 Gossypium

棉花係錦葵科棉屬植物嘅種子纖維，係造衫、被等紡織品嘅其中一種材料。

歷史

最早出現種植棉花嘅記載，係喺四、五千年前印度河流域。後尾傳到地中海。公元1世紀，已經有人由阿拉伯將棉布帶到去意大利同埋西班牙。但要等到15世紀，棉花先至傳入英國，然後再傳入北美洲。

中國最早嘅棉布大約有近千年歷史。但詳細記載要等到元朝。當時元朝將棉布用作收稅，據記載每年可以多達十萬匹。

特徵

棉花係灌木，如果喺熱帶栽種，可以生長到6米高，但一般嚟講都係到1到2米左右。花係乳白色，開花之後如果轉成深紅色嘅話，就會凋謝，留低一啲綠色果仔，叫「棉鈴」。棉鈴成熟時會裂開，露出柔軟嘅纖維。纖維多數呈白色，長度大約2至4厘米，含纖維素87-90%。

分佈

棉花產量最高嘅國有中國、美國、印度等。根據《中國紡織工業發展報告2010/2011》，2010年全球棉花產量係2,500萬公噸，中國作為全球最大嘅生產國就佔咗620萬公噸（24.8%）。