民進黨親中爭議

民進黨自2020年起以抗中保台作為其中一個主要口號同綱領，亦一直被視為台灣兩大政黨裡面比較堅持台灣擁有獨立主權嘅一個。不過，國民黨、民眾黨同時代力量都曾經批評，民進黨濫用呢個口號。另外，民進黨入面亦有一啲人同中國，甚至係中共有唔同程度嘅關係，因而受到一啲批評。

事例

何博文

何博文嘅太太邱槿桉（後改名邱卉榛）喺2023年11月被揭露唔止一次參與中國嘅統戰活動。其中喺2017年7月初，邱卉蓁組團前往河南省參加「正本溯源，尋根河洛」活動，期間多次手舉「主辦單位河南省人民政府台灣事務辦公室」嘅手板影相，影相嘅背景更包含習近平口訓既標語「求真務實、開拓創新；顧全大局、無私奉獻」。邱槿桉亦曾接受獲中共科技局、民政局兩個中共機關業務指導、監督同管理公司創星谷嘅訪問，該公司標榜致力協助政府科技行業管理、戰略政策研究，亦即係中共黨務、政務。去到2019年，佢甚至喺中國參加統戰朗誦活動，喊對祖國（中國）崇高嘅熱愛之情，又同共產黨黨委書記林進川合照。

趙天麟

2023年10月，當時準備競選連任嘅立委趙天麟，被揭發婚外情醜聞，對象係中國籍女子張晴，而且婚外情已經維持咗有10年，仲被影到喺摩天輪上十指緊扣，引發外界批評，由於佢被視為綠營重要「抗中」戰將之一，所以今次有人戲稱佢係「親中保台」。時代力量立委邱顯智指，趙天麟身為外交國防委員會召委，但就同敵國人士外遇，係攸關公安、非同小可，呼籲國安單位、檢調主動介入調查。

鄭運鵬

喺2022年中華民國直轄市長同縣市長選舉入面，鄭運鵬代表民進黨參選桃園市長，但選舉期間被爆到中國經商嗰陣，戶籍寫「中國台灣」，矮化台灣主權。另一方面，佢又被揭發口口聲聲支持漫畫原創，但就喺中國嘅簡體字免費漫畫網站落廣告，結果引發批評。

陳勝宏

陳勝宏係民進黨綠色友誼連線代表人物，曾經做過臺北市議會議員、立法委員。佢本身亦係陽信銀行嘅董事長，但自2017年起，中國國務院控制嘅南海控股入股，去到2019年持股達2.86％，成為陽信第五大股東，做法引來外間一啲關注同批評。