陳水扁

出自維基百科，自由嘅百科全書

陳水扁（阿扁，1950年10月12號—），台灣台南縣官田鄉人。2000年當選中華民國第十任總統，係中華民國第二個民選嘅總統，又係第一個唔係國民黨黨籍嘅總統；2004年連任。之前做過台北市議員、立法委員、台北市市長同民主進步黨主席。

陳水扁做總統期間一直好多爭議，例如佢喺兩岸關係上嘅主張^[1][2]、319槍擊案、國務機要費官司，同埋佢家庭成員涉及好多案件，到而家重未解決。

卸任總統後，佢俾台灣台北地方法院以涉嫌貪污、洗錢等重罪為由收押，成為中華民國史上首位被收押嘅前總統。2009年9月11號，一審宣判無期徒刑（成世坐監），罰款兩億新台幣，同時褫奪公權終身。

[編輯] 簡歷

• 1950年喺台南縣官田鄉出世。原名「陳水遍」，喺申報戶口嗰陣用閩南話發音畀人以為係國語嘅「陳水扁」。
• 1969年喺台南一中畢咗業之後，考入國立台灣大學商學系，之後休學，後來考入台灣大學法律系。
• 1973年讀緊台灣大學嗰陣，攞到農漁會獎學金，以第一名考到中華民國律師資格，係嗰時全國最後生嘅律師^[3]。
• 1974年開始做執業律師，重喺台灣大學法律系第一名畢業。
• 1975年同吳淑珍結婚。
• 1976年因為專攻海商法畀華夏海商請咗做法事務所律師。重幫長榮海運做法律顧問。

[編輯] 從政簡歷

2000年總統大選時國民黨分裂，國民黨提名時任副總統嘅連戰參選，前台灣省長宋楚瑜退黨參選。選舉過程中，宋楚瑜嘅選情原本睇好，但係國民黨議員揭發興票案醜聞之後急轉直下，選舉結果最終陳水扁以 39.3% 嘅得票率當選總統，多過第二嘅宋楚瑜三十萬票。陳水扁喺5月20號就任第十任總統，中華民國實現首次政黨輪替及政權和平轉移。

[編輯] 參考