連戰

出自維基百科,自由嘅百科全書
跳去: 定向搵嘢
連戰

連戰Lian zhan;Lien Chan1936年8月27號—),字永平台灣當代政治人物、中國國民黨榮譽主席。做過第三任中國國民黨主席、第九任中華民國副總統、行政院長、外交部長、交通部長、台灣省政府主席、台北市大安區仁愛里19鄰鄰長(2003年唔撈)等等嘅工。

家庭背景同早年生活[編輯]

連戰喺中國西安出世,鄉下係台南市。阿爺連橫係台灣日據時代嘅著名學者,好出名嘅有《台灣通史》;台灣喺日據時代,反對日本政府禁抽鴉片嘅政策。佢老豆連震東國民黨政府公務員,1931年從日本返到中國大陸之後就入咗國民政府做嘢,1932年跟住國民黨元老張繼去西安參加西京籌備委員會工作。1946年代表國民政府去台灣接受日本投降,之後做過內政部長、國民黨中常委(中央委員會常務委員)、總統府國策顧問等等嘅工。而連戰阿媽趙蘭坤出生瀋陽名門,燕京大學畢業。

連戰一出世就係台灣望族,雖然佢本人曾經講過,阿爺連橫嘅家業喺日本佔領期間,因為反日嘅立場而被人全部沒收。喺連戰出世前兩個月,阿爺連橫喺上海病逝,死前同未出世嘅孫仔改名「連戰」,「因為個名除咗寓有自強不息嘅意義之外,重有克敵致勝、光復故國、重整家園嘅希望」。

連戰讀過成功中學初中部、高中就喺師大附中讀,好活躍,係一名體育健將,作為國民黨政府高官個仔,成日參加社交活動同高爾夫球活動,大學嗰陣,先進入陸軍官校,半年後轉讀國立台灣大學政治系。當時連戰同中央研究院院長錢思亮個仔錢復台灣農業復興委員會主任委員沈宗瀚個仔沈君山同行政院院長陳誠個仔陳履安並稱為「四公子」,亦係國民黨重點栽培嘅對象,而連戰係本省籍,更加受到特別關注。

連戰喺1957年獲得台大政治系學士學位,去美國繼續深造。1961年又拎倒芝加哥大學國際公法同外交碩士,4年後又獲得芝加哥大學政治學博士學位,同年同喺台灣贏得中國小姐選美競賽嘅方瑀結婚。連戰由小學到博士班都無參加過任何升學考試,喺美國連戰任教威斯康辛大學康乃迪克大學達三年幾。1968年,做緊台灣大學校長嘅錢思亮邀請連戰回國做台大政治系客座教授,一年後做台大政治系主任、台大政治研究所所長,直到1974年。

連戰最早同政界人士嘅接觸係喺1969年,國府喺政大國際關係研究中心成立咗兩個分別研究外交經濟嘅高級研究小組,由當時嘅行政院院長蔣經國直接負責。連戰受聘擔任外交小組嘅成員,提名當選為國民黨中央候補委員,1969年9月出任第24屆聯合國大會中華民國代表團顧問,1970年曾當選為十大傑出青年

從政經歷[編輯]

1975年,當時39歲嘅連戰被任命為駐薩爾瓦多大使,三年後被調返台灣。根據李登輝接受傳媒訪問嘅時候指出,當年連震東期待個仔可以返台灣發展,所以透過蔣經國比較信任嘅行政院政務委員李登輝向時任行政院長嘅蔣經國關講,而將駐外嘅連戰,調返國內,並且出任國民黨中央委員會青年工作會主任。1978年7月擔任國民黨中央委員會副祕書長、行政院青年輔導委員會主任委員。

從此連戰官運亨通,一路被擢昇:1981年任交通部長、1984年成為國民黨中常委,1987年行政院副院長、1988年外交部長、1990年台灣省主席、1993年2月行政院院長。1993年8月獲第一位民選台灣副總統。

政黨 候選人 得票
總統 副總統 票數 得票率
中國國民黨 李登輝  連戰 5,813,699 54.0%
民主進步黨 彭明敏 謝長廷 2,274,586 21.1%
林洋港 郝柏村 1,603,790 14.9%
陳履安 王清峰 1,074,044 9.98%

連戰一直被認為係政壇嘅一名「福將」,出生好,仕途順暢,有評論認為佢雖然政績並唔突出,但係運氣唔錯,喺交通部長任內好少出現重大交通事故,做外交部長時都冇一個國家同中華民國斷交。連戰雖然後生嗰陣好活躍,年紀大咗就非常嚴謹,低調內斂,畀人一種冇野心、不求官位嘅感覺。但係2004年總統大選以極微小嘅差距而落敗,連戰同佢個陣營將原因歸於「319槍擊案」事件,連戰唔承認陳水扁當選,提起當選無效、選舉無效之訴。

台灣部分民眾對連戰一直有親和度唔夠嘅感覺,有人指佢係高高在上,似乎「唔知民間疾苦」。連戰唔擅於競選言辭,同掌握觀眾情緒,好多人因為咁樣質疑佢嘅執政能力,戲稱之為「阿斗」。而且連戰家族嘅財務狀況同來源都成日遭到政壇對手同傳媒質疑,特別係1947年清鄉時期,好多台灣菁英被補殺,同佢老豆連震東有關。由於連戰屋企好有錢,佢嘅財產問題成日俾對手攻擊,比較經典嘅就係佢同前屏東縣長伍澤元3628萬元借款事件

喺當選副總統後,由於民進黨同新黨合流,為免行政院長人選俾人否決,所以李登輝喺佢嘅請辭信上批示,仍然保留行政院長一職,引起社會輿論嘅強大反彈,甚至俾民進黨列為唔受歡迎人物,唔能夠到國會進行施政報告。在野黨翼提出釋憲案,質疑行政院長同副總統有憲法備位關係,唔可以係同一人。1996年12月31號大法官會議釋字第419號出爐,認同在野黨睇法,總統兼任行政院長唔符合憲法本旨,應該由唔同嘅人擔任。但係連戰仍然堅持擔任行政院長,直到1997年4月,台灣社會發生白曉燕命案,內閣治安績效備受外界批評,而行政院政務委員馬英九都喺命案發生後,提出辭職,對連戰有相當大嘅衝擊,喺第四次修憲(其中將行政院長由立法院同意產生,改為淨係由總統任命行政院長)過關後,七月國民黨全會以後,連戰內閣總辭,退落嚟淨係做副總統。

連戰被國民黨提名做2000年選舉總統候選人,佢曾經想尋求宋楚瑜做副總統候選人,最後因事破局。宋楚瑜脫離國民黨獨立參選,國民黨票源分散,結果喺2000年3月總統大選,國民黨出乎一般民眾意料輸咗,陳水扁當選總統。

李登輝辭去國民黨主席之後。連戰以代主席嘅身份重建國民黨。國民黨落實黨主席直選以後,2001年成為第一位國民黨直選嘅黨主席。

經過一年幾嘅政治風雨後,最後領導國民黨同親民黨結成國親聯盟,同宋楚瑜拍擋參選2004年嘅總統。2004年總統大選連戰再度失敗,喺選舉之夜開票後主張「呢場係一場唔公平嘅選舉」,之後支持連戰群眾為咗向陳水扁提出抗議,造成320遊行,並宣示將提起「當選無效」、「選舉無效」訴訟。319槍擊案發生後執意進行重新選舉。

藉住選後抗爭,連戰喺國民黨嘅領導地位仍然穩固,得以做完黨主席任期,並喺卸任後獲選為國民黨榮譽黨主席。連戰喺2005年4月以中國國民黨主席身分訪問中國大陸,成為中華民國政府遷台後首位喺北京大學發表演說嘅政治人。

2005年8月19號,喺中國國民黨第十六次全國代表大會上,連戰同馬英九做咗正式嘅黨主席交接,從此正式卸任中國國民黨主席一職,並被受予「榮譽黨主席」嘅尊稱,成為國民黨第一位榮譽黨主席,亦係傳媒最常用嘅頭銜。

籍貫及家族問題[編輯]

連戰喺選舉名冊上認為自己嘅籍貫係西安市亦遭到好多批評,一般人認為係向外省族群示好嘅考量。另一方面,連戰喺佢祖籍地-臺南市嘅得票率亦輸畀對手陳水扁,一般都認為連戰一家已好少喺臺南活動有關。喺2004年總統大選,連宋喺台南市嘅得票率係42.23%、陳呂57.77%,雙方大概有一成五、六萬七千幾票差距(睇各縣市詳細投票結果)。

連家除咗阿爺連橫之外,重有連橫阿哥-連城璧嘅後代連平原(連戰堂兄)一脈到而家重住喺臺南市。連平原喺連戰1996年、2000年競選副總統、總統時,都籌組連氏宗親後援會支持連戰。但喺2000年陳水扁宣布核四停工、國民黨提起總統罷免案後,連平原出面批評連戰,令連家早年不和事蹟曝光(宗親指稱連橫、連雅堂輕恩義)。而連平原亦對連戰表姐林文月多次宣稱,連戰係「連家三代單傳」,展開批評。目前兩人已經好似三唔識七咁。

2000年大選同之後嘅政治經歷[編輯]

為咗決定2000年中華民國總統大選國民黨候選人,當時嘅國民黨主席李登輝支持連戰參選總統,呢個決定遭到前台灣省長宋楚瑜嘅強烈反對,雙方喺爭執不下後,最終宋楚瑜脫黨獨立參選告終。喺選舉中,李登輝雖然始終公開表示支持連戰,但部分人士觀察認為佢其實係暗助民進黨候選人陳水扁。呢場選舉由於連宋分裂,兩人紛紛落選,由陳水扁以39%得票率當選總統。

選舉嘅失敗令國民黨支持者相當之嬲(但係佢哋多數投票畀當時無黨籍嘅宋楚瑜),國民黨支持者相信係李登輝導致連戰同宋楚瑜落敗,而喺開票後包圍國民黨中央黨部,要求李登輝為失敗負責。最終嘅結果係,連戰同國民黨中常會其他成員同意李登輝辭去國民黨主席職位.其後李登輝脫離國民黨,連戰獲國民黨十五屆中委會推舉為主席。同時有好多國民黨員退黨加入宋楚瑜成立嘅親民黨。國民黨同執政嘅民主進步黨因為起唔起核四嘅問題爭議不歡而散:連戰會見陳水扁,以試圖說服佢繼續起第四核電廠,重得到對方支持,不過喺會面完半個鐘之後,民主進步黨政府就宣布停建核四,被認為有意令前往會談嘅連戰難堪。呢件事為同連宋合作提供咗機遇。核四事件正好為國親兩黨重新合作提供契機,雙方都批評陳水扁冇口齒。

連戰接任黨主席後,曾宣布舉行國民黨黨員重登記,整頓國民黨黨務,雖然初時親李派同排李派爭持不下,但喺李登輝成立台灣團結聯盟後,決定開除李登輝黨籍,排除咗李登輝嘅剩餘影響;之後又對國民黨進行重組,據稱親李嘅幹部不被重用,令李登輝影響力消退。

國民黨喺2001年立法委員選舉中再度遭到挫敗,原本擁有立法院過半數(113)席位嘅國民黨只係得到68席,失去國會第一大黨嘅地位,但仍然保住泛藍票源,泛藍繼續控制國會,繼續成為第一大在野黨。喺地方縣市首長選舉國民黨仍保持咗自己嘅實力。地方縣市首長選舉亦係泛藍嘅首次合作。

2002年嘅台北市高雄市兩市市長同市議會選舉中,國民黨聲勢回升。國民黨台北市長提名人馬英九高票連任成功,保住台北市嘅執政權,而且差啲將民進黨籍高雄市長謝長廷拉下馬。喺兩市市議會選舉方面,國民黨表現出色,親民黨就遭受重創。

2004年總統大選[編輯]

2003年2月,國民黨、親民黨經過協商之後,決定共同推出一組候選人連戰、宋楚瑜角逐2004年中華民國總統大選,而且宋楚瑜選擇成為副總統候選人,兩人合併雖然未有2000年一加一等於二嘅效果,但喺民調亦一直領先陳呂(陳水扁、呂秀蓮)拍檔。

呢次選舉中連宋兩人以經濟同埋兩岸議題來批評陳水扁政府;而陳水扁就除咗繼續攻擊國民黨黨產處置不當嘅問題,包括重開2000年宋楚瑜興票案嘅調查外,就繼續強化台灣民眾嘅本土意識,突顯民進黨嘅草根性等。民進黨喺拋出公投法被泛藍阻撓後,依然決定舉行具有極大爭議性嘅防衛性公投。連宋陣營一直無法掌握呢個議題嘅主動權,亦唔願冒住喪失南部選票嘅風險同綠營就公投議題進行公開辯論,最終只係由支持泛藍嘅民間人士出面參與辯論。而喺參唔參與公投嘅議題上,泛藍內部亦有分歧,連宋兩人最終都冇參與公投,但係泛藍一些本土派人物就有投票。

喺選前一個月左右,選舉進入白熱化。2004年2月28號,民進黨台聯共同舉辦「二二八手護台灣」活動,有關單位估計稱有200萬人喺台一線牽成500公里人鏈,喺紀念二二八事件嘅同時亦為陳呂選舉造勢,令連戰選情一度吃緊。而泛藍亦喺3月13號發動據稱百萬人參加嘅反扁游行。

喺3月13號,國親集團舉辦咗「換總統,救台灣,向阿扁嗆聲」遊行,遊行人並唔少,主辦單位自稱三百萬,警方估計約12萬人,而一般認為有成百萬咁多。 遊行中最受人矚目嘅,係連戰夫婦同埋林豐正趴喺地下,宋楚瑜夫婦就下跪。事後國親兩黨解釋為連宋夫婦等係親吻台灣土地,表示愛台灣。

選舉過程中,雙方民調結果不相上下。喺選前兩個禮拜,根據各個不同媒體、智庫同埋政治團體所發布嘅民調,「台灣智庫」所公佈嘅數字係陳呂40.4%、連宋39.5%(3月8日);「民進黨」嘅數據係陳呂37.6%、連宋36.1%(3月7號);「國民黨」嘅數據係陳呂29.8%、連宋34.8%(3月5號);「世新大學」嘅數據係陳呂27.3%、連宋27.1%(3月2號)[1]。多數結果喺統計學誤差範圍之內。

選舉前一日,319槍擊案發生,對選情產生相當大影響,據藍營內部嘅一些啲人士講,槍擊事件發生後連宋兩人嘅優勢瞬間瓦解,特別係喺南部地區全面崩盤。但南部地區本來係綠營嘅大本營,反而是中部雲林,原來由泛藍估計贏五萬票,選舉結果就相反,連戰喺當日並未對槍擊事件作出過多評論,重曾經試圖探望陳水扁但被拒。當時藍營緊急作出唔推遲選舉嘅決定,希望能夠盡快減少槍擊事件嘅影響;但當晚,由立場親近國民黨人士陳文茜喺國民黨總部召開咗一個記者會質疑槍擊案嘅真實性,即「兩顆子彈」說,喺當晚嘅中視頻道播出。雖然槍擊事件確有疑點,但由於指控無實際證據,令效果適得其反,引起部分選民不滿,被認為係陳水扁勝出嘅關鍵之一。

選舉結果及之後[編輯]

3月20號開票結果陳、呂以唔夠3萬票嘅些微優勢連任正副總統。連戰支持者喺選舉結果公布後對聚集喺國民黨中央黨部外對原本准備歡慶勝利嘅民眾發表演說,話選舉「疑云重重」、「不公正」,並正式宣布將提起選舉無效之訴。當晚大批泛藍支持者聚集在總統府外嘅廣場,徹夜未散,連戰本人亦喺宋楚瑜同埋泛藍立委簇擁下喺廣場上靜坐表達抗議。呢場抗爭活動喺3月27號達到高潮,據稱有50萬人喺總統府前廣場集結,連戰再度表達要求重新驗票及選舉嘅訴求。3月20至27號呢7日被泛綠人士稱為「連宋之亂」同埋被陳水扁稱為「柔性政變」。

然而群眾抗爭嘅結束就係泛藍抗爭嘅結束;國親除咗通過司法程序追究選舉結果外,並無第啲大動作,2004年11月,台灣高等法院作出裁決,泛藍嘅兩個訴訟都敗訴;當時黨內外要求連戰交棒嘅呼聲亦時有所聞。不過連戰並未加以理會,全力協助國民黨參與12月嘅立法院選舉,國民黨嘅席位最終得到大幅度增長,而國親新三黨聯盟亦未如事前多數觀察家預言咁,喪失立法院嘅多數。選後嘅國民黨又以改善兩岸關係為由,派出多個高層代表團訪問大陸,跳過執政嘅民進黨政府,同中國大陸政府進行關於包機直航、農業交流等計劃。

2005年係國民黨主席嘅改選年,2月,被認為係國民黨內最有實力參選2008年總統嘅台北市馬英九首先表態會角逐國民黨主席,但當時連戰重未正式表態會唔會尋求連任。國民黨內眾多大老亦表態認為連戰應該繼續連任,黨主席另一熱門人選王金平亦做出「挺連」姿態,話會首先擁護連戰續任。不過連戰之後話無意繼續擔任國民黨主席。

3月間,國民黨亦宣布會借孫中山逝世80周年之機,唔排除喺適當時機由連戰率領代表團訪問中國大陸,晉謁中山陵同埋參觀廣州黃花崗七十二烈士紀念碑。最終喺3月28號到4月1號,由國民黨副主席江丙坤率團訪問大陸,拜謁廣州黃花崗七十二烈士陵園,南京中山陵以及北京孫中山衣冠冢,展開「破冰之旅」、「經貿之旅」。訪問期間,大陸政協主席賈慶林代表中國共產黨總書記胡錦濤向連戰發出訪問大陸嘅正式邀請。4月1號,連戰喺東京表示接受邀請,會喺近期率團訪問大陸。連戰係自1949年以來,首位重返中國大陸嘅國民黨主席。之後經由國民黨秘書長林豐正喺4月17號同大陸方面協商後,定連戰喺4月26號到5月3號到大陸展開「和平之旅」。

訪大陸行程[編輯]

4月26號:中國國民黨主席連戰喺上晝10時55分搭港龍KA487由桃園機場起飛,下晝1點半抵達香港,轉乘東航專機,下晝4點半抵達南京祿口國際機場,展開為期八日嘅「和平之旅」。隨後同江蘇省委書記李源潮等會談,其間連戰送贈琉璃工藝品「開泰」,李源潮亦回以南京特產云錦「金絲團龍」。晚上連戰下榻南京市中心新街口金陵飯店

4月27號:上晝8點50分,連戰等一行人拜謁中山陵。入到祭堂,送上花圈並三鞠躬後,題詞「中山美陵」,並喺博愛牌坊前發表記者會,演講國父孫中山嘅功績等。之後遊明孝陵,再之後前往位於原國民政府總統府中國近現代歷史遺址博物館仔細參觀,並題字「和平奮鬥救中國」。之後去南京靜海寺旁邊啱啱復建完成嘅天妃宮媽祖並撞鐘,題字「慈航普濟」。夜晚就去南京城南嘅夫子廟品嘗秦淮小食,並夜遊秦淮河,一飽金陵美景。

4月28號:上晝搭機由南京到北京,11點07分抵達北京首都國際機場,下榻北京飯店。中午應北京市委書記宴請,下晝同中國政協主席賈慶林會晤,先遊故宮,之後去全聚德烤鴨店,最後去老舍茶館品茗同埋睇京劇

4月29號:上晝9點50分,連戰喺北京大學辦公樓禮堂發表演說,並回答學生提問。演講持續咗大概50分鐘,內有提「為民族立生命,為萬世開太平」,並簡化為「堅持和平,走向雙贏」。演說過程中多次爆發師生嘅熱烈掌聲同埋笑聲。會後,北京大學校務委員會主任閔維方(北大黨委書記)代表北大向連戰贈送禮物,包括連戰阿媽趙蘭坤女士喺燕京大學就讀時嘅學籍檔案、照片嘅複製品同埋有「未名湖」圖案嘅雕漆瓶。連戰向北大回贈牡丹鳳雕刻工藝品同埋佢阿爺連橫寫嘅《台灣通史》同埋連戰寫嘅《改變,才有希望》。之後,連戰偕同夫人方瑀女士同埋大陸訪問團成員喺校方陪同下參觀北京大學。下晝3點左右,連戰同中國共產黨中央委員會總書記胡錦濤人民大會堂福建廳會晤。呢次係國共兩黨最高領導人自1945年後嘅第一次會晤。連戰成為1949年後第一位踏足中國大陸國民黨最高領導人,全世界好多國家都爭相報道,國共兩黨主席握手嘅畫面將呢次訪問推向最高潮。會談自下晝3點半進行到5點10分,並喺會後發表「會談公報」,內有「五點共識」。隨後喺下晝5點半左右,喺北京飯店舉行記者招待會。會上由國民黨文傳會主任張榮恭宣讀咗五點共識。之後,連戰作出講話並接受傳媒記者採訪。最後應胡錦濤之邀,到中南海瀛台參加晚宴。

4月30號上晝搭機抵達佢出生地西安。隨後重返小學母校——原北新街小學后宰門小學,捐咗20萬人民幣利是以及《台灣通史》、《改變,才有希望》等書;並去秦始皇陵旁嘅兵馬俑參觀,獲得兩樣禮物:一掊秦土(喺兵馬俑遺址處取得)同埋漢代「長生無極」瓦當。

5月1號上晝到清涼寺旁佢阿嫲「沈太夫人之墓」(名璈,字少云)祭祖,場面悲愴,之後連戰捐咗1萬人民幣加2000美元畀清涼寺住持;下晝搭機去上海,下榻浦東香格里拉大酒店,夜晚喺上海市委書記陳良宇陪同下游覽黃浦江同埋觀賞外灘嘅建築群,並題字「滾滾黃浦南流水,浪花造出英雄。」

5月2號上晝喺東方明珠電視塔召開記者招待會並發表演說。近午喺錦江飯店會見海協會會長汪道涵,並代辜振甫遺孀辜嚴倬云轉交一封信以及辜振甫早年作嘅一幅畫。下晝先喺浦東濱江大酒店會見台商並發表演說,詳細闡述國民黨對兩岸共同市場等嘅主張;晏啲參觀上海博物館觀看青銅器系列同埋其他新展出文物,並去上海城市規劃館參觀。夜晚應上海市市長韓正邀請,去浦東新區政府對面嘅上海科技館參加晚宴;稍後去盧灣區太倉路嘅新天地參觀。

5月3號上晝喺酒店內接受美國華盛頓郵報,大陸中央電視台記者等嘅採訪;然後離開酒店,11點20分搭磁懸浮列車到浦東國際機場,下晝1點搭機,夜晚7點半返回台灣中正國際機場,發表簡短演說,結束為期八日嘅「和平之旅」。

途中重送咗《台灣通史》,《改變,才有希望》兩本書同埋國民黨方面編嘅《連戰 2005大陸行》筆記書畀相當人士同埋機構,用意好深。雖然定位為「和平之旅」,外界認為呢次係「第三次國共合作」,而呢次合作,目的在於短期內共同遏止台獨同埋可能引起戰端嘅因素,中期就喺維持現狀同埋維護「同屬一個中國」嘅前提下展開更全方位嘅交流並逐步,最大程度消除彼此因內戰而留低嘅隔閡,長期就係向最終「和平統一」(時機可議)嘅方向努力。

當初國共兩黨連年內戰,死傷無數。極大破壞全中國一切基礎;海峽兩岸亦長期處於緊張嘅敵對狀態。呢次訪問大大改變國際上認為嘅「台海必有一戰」猜想。中華民國「國民黨」喺大陸13億人心目中嘅印象亦徹底顛覆,幾乎冇人視國民黨為敵人。大陸好多人亦意識到國民黨此行唔容易。由於大陸正處於轉型期,好多專家認為將來如果和平談判達成統一嘅話,共產黨同國民黨呢兩個「百年老店」會繼續「國共選票內戰」。

2006年連戰大陸之旅[編輯]

內文: 2006年國共經貿論壇

2006年4月13號,連戰以國民黨榮譽主席身份,喺卸下國民黨主席身份後。第一次啟程重訪中國大陸,參與國共經貿論壇。同行團員除咗台灣嘅政治人物以外,重有好多台灣工商界嘅重要人物,好似辜濂淞嚴凱泰等人隨行。除咗傳統上支持國民黨嘅以外,呢次重有唔少過去支持民進黨嘅企業家,好似長榮創始人張榮發個仔張國政,富邦金控董事長蔡明忠,中小企業協會理事長戴勝通等人都隨行,被視為係呢班企業家喺政治上「選邊站」嘅結果。

4月16號,連戰同中共總書記胡錦濤再度喺北京會晤。雙方喺會晤中重申咗九二共識同埋一個中國政策,但冇達到預定嘅效果。

4月17號,連戰搭機南下福建,展開「尋根之旅」。

書法[編輯]

連戰嘅書法頗受爭議,喺2005年中國國民黨和平之旅訪問中國大陸時寫過多幅書法,譭譽參半,有人喺網上對連戰嘅書法進行分析[2]。成為和平之旅嘅一個重要話題。

主要著作[編輯]

  • 《Agrarian Reform in Nationalist China》- English,AM,1961年
  • 《民主政治的基石》- ISBN 957-09-0705-3,正中書局,1974年
  • 《行政院連院長言論集》- 新聞局,1994年
  • 《走過傷痛,走向希望》- ISBN 957-09-1268-5,正中書局,1999年
  • 《相約新世紀》- ISBN 957-09-1247-2,正中書局,1999年
  • 《連戰的主張》- ISBN 957-621-771-7,天下遠見,2000年
  • 《改變才有希望》- ISBN 986-417-251-4,台北:天下遠見,2006年

參考[編輯]

出面網頁[編輯]

前任:
王唯農
行政院青年輔導委員會主任委員
1978年8月1日1981年11月30日
繼任:
高銘輝
前任:
林金生
中華民國交通部
1981年1987年
繼任:
郭南宏
前任:
林洋港
中華民國行政院副院長
1987年1988年
繼任:
施啟揚
前任:
丁懋時
中華民國外交部
1988年7月20日1990年6月1日
繼任:
錢復
前任:
邱創煥
臺灣省主席
1990年6月16日1993年2月25日
繼任:
宋楚瑜
前任:
郝柏村
中華民國行政院長
1993年2月27日1997年8月31日
繼任:
蕭萬長
前任:
李元簇
中華民國副總統
1996年5月20日2000年5月19日
繼任:
呂秀蓮
中國國民黨領袖
前任:
李登輝
中國國民黨主席
2000年2005年
繼任:
馬英九