羅品超

出自維基百科,自由嘅百科全書
跳去: 定向搵嘢

羅品超1911年2010年7月15號),原名羅肇鑒,人稱鑒叔,祖籍廣東南海南莊龍畔村頭,著名粵劇文武生,保持著「世界上年齡最大、表演時間最長嘅藝術家」伊個健力士世界紀錄[1]

羅品超12歲進入廣州花地孤兒院舉辦嘅粵劇科班學藝,18歲進入廣州戲劇研究所附屬戲劇學校——八和會館嘅八和戲劇養成所學習[2]。1931年後,羅品超喺「千秋鑒」、「九華台」擔任正印小生,然後進入覺先聲粵劇團,同薛覺先靚少鳳千里駒等老倌名伶合作演出,喺廣州、香港、澳門以及南洋各地都有大影響。中共建政之後,羅品超組創珠江粵劇團,任團主任委員。

羅品超嘅表演剛柔相濟,洗鍊細膩,尤以小武見長;同時又多才多藝,戲路好廣,藝術造詣好高,係一位能文能武嘅粵劇表演藝術大師。佢演過嘅最成功嘅角色包括《羅成寫書》入面嘅羅成、《平貴別窯》入面嘅薛平貴、《五郎救弟》入面嘅楊五郎、《林沖》入面嘅林沖、《荊軻》入面嘅荊軻以及《山鄉風雲》入面嘅黑牛。佢自成一格嘅「回龍腔」,韻味獨特。

羅品超先後主演過好多劇目,包括傳統戲《荊軻》、《梁山伯與祝英台》、《林衝》、《五郎救弟》、《黃飛虎反五關》、《樓臺會》、《山東響馬》、《平貴別窯》,現代戲《山鄉風雲》、《紅花崗》、《沙家浜》,重改編過外國戲《璇宮艷史》、《春香傳》等[3],長期積累咗大量首演劇目,塑造咗一批批性格迥異、令人難忘嘅人物形象。

1952年,羅品超以《鳳儀亭》獲得全國戲曲觀摩演出演員表演一等獎,之後獲獎無數。1958年出任廣東粵劇院副院長。1979年任中國戲劇家協會廣東分會副主席、秘書長。1988年退休之後移居美國,但係仍然致力於宣傳同推廣粵劇藝術,重經常參加國內各種粵劇表演[4],直到後來健康轉壞先至喺廣州定居。2004年6月,93歲高齡嘅羅品超再演首本戲《荊軻》,成功申報健力士世界紀錄大全,成為至今在世界戲劇舞臺上面年齡最大,舞臺演出時間最長嘅藝術家;伊個紀錄今日重未有人打得破。2009年6月18日,羅品超以一場「羅派藝術經典劇目展演」來提前慶祝百歲壽辰,並以粵曲《故鄉情》壓軸[5]

羅品超每年都會去香港度假,而香港演藝學院每年亦都特設一個粵劇課程畀羅品超教授,為期一個月。

2010年7月15日13點30分,羅品超喺廣州屋企過咗身,享年99歲[6]。當日18點30分,羅品超喺屋企人、徒弟同埋廣東粵劇界相關人士嘅目送之下,移靈到廣州殯儀館[7]。7月22日,廣州八和會館舉行咗羅品超追思會,其間播放嘅一段羅品超生前接受採訪嘅錄音,詳述咗佢同粵劇大師薛覺先早年合作,演出失敗,後來獲得諒解嘅一段插曲[8]

參考[編輯]

  1. 百岁粤剧“小武泰斗”罗品超广州辞世,南都網
  2. 粤剧大师罗品超逝世 表演时间入吉尼斯纪录,騰訊網
  3. 粤剧大师罗品超昨日辞世 享年101岁,人民網
  4. 粤剧大师罗品超逝世 表演时间入吉尼斯纪录,騰訊網
  5. 百岁粤剧“小武泰斗”罗品超广州辞世,南都網
  6. 粤剧大师罗品超逝世 表演时间入吉尼斯纪录,騰訊網
  7. 百岁粤剧“小武泰斗”罗品超广州辞世,南都網
  8. 汪洋16字悼鉴叔,南都网,2010-07-23