臺灣手語
臺灣手語，係臺灣嘅聽障人士用來溝通嘅基本工具之一，源於台灣日治時期。
簡介
[編輯]日治時代，日本喺臺北、臺南設立咗瘖啞學校。喺臺北有「木村盲啞教育所」，由退休海軍醫官木村謹吾喺1917年創辦。喺臺南由慈善機構慈惠院整嘅「私立台南盲啞學校」，入邊有「聾啞部」，前身係英國傳教士甘為霖喺1889年設立嘅訓盲院，喺1915年改叫盲啞學校。呢兩間學校以手語教學，令日本手語喺臺灣聾人中普及。明治時期教育方法分為東京同大阪兩大派，東京派學者喺北部，大阪派學者喺中南部[1]。
戰後嘅聽障教育大量使用中國手語。由於大陸師資好多都留喺北部，所以臺北啟聰學校用咗唔少中國手語，臺南啟聰學校同臺中分校就少受影響。大陸師資來自北京、南京、上海、重慶、杭州等地，所用嘅手語大同小異。另外，陸君歐、姜思農等創立嘅中國聾啞學校、私立啟英學校，使用南京語系手語多啲[2]。
分類
[編輯]按地域分
[編輯]- 北部手語：來自東京系統嘅日本手語、中國手語
- 中部手語：大部分來自南部手語
- 南部手語：來自大阪系統嘅日本手語同部份中國手語
其中使用北部手語嘅人口相對多啲，其次為南部手語，中部手語同南部手語有少少唔同，使用人口亦相對少啲。
按溝通方式分
[編輯]- 自然手語：聾人嘅母語，語法同聽人（可以正常聽到聲音講嘢嘅人）講嘢嘅語法唔係好相同，除咗手語之外再輔以姿勢、表情、動作等，令溝通更加順利。
- 文字手語：按照口語嘅字序打出嘅手語，通常每個字會對應一個手語。
- 注音手語：為咗教育聾嘅細路學習講嘢而發展出來嘅手語。
- 國語口手語：台北啟聰學校退休老師陳彩屏，修正美國史文漢先生嘅注音符號系統，教導聽障生從手語中學習口語。
註
[編輯]參考
[編輯]- 姚俊英。〈台灣手語演進〉。《聽障教育》。第五期（民九十五年［2006年］12月）：11-15頁。臺北市：臺北市立啟聰學校聽障教育資源中心。（作者係臺北市立啟聰學校退休教師，參與過教育部手語畫冊編輯同修訂）