蘇斯克查

出自維基百科,自由嘅百科全書
跳去: 定向搵嘢

奧利·根拿·蘇斯克查Ole Gunnar Solskjær1973年2月26號—)係挪威足球員,打前鋒,喺挪威Kristiansund出世。

球員生涯[編輯]

蘇斯克查喺職業球員生涯初期效力挪威國內球會,憑出色嘅入波能力贏得「挪威舒利亞」嘅稱號,重引起國外球探注意。1996年夏天英格蘭超級足球聯賽球隊曼聯個領隊費格遜用150萬英鎊買咗佢。

蘇斯克查效力曼聯第一季,已經得到好多上陣機會,首場聯賽上陣對布力般流浪射入一球,並喺1996/97球季以19球成為球隊首席射手,亦為球隊贏得嗰季聯賽冠軍

隨後嘅球季,曼聯陸續簽下約基舒寧咸等前鋒,蘇斯克查不時要擔任後備,但佢喺有限嘅上陣時間內依然可以保持高入球率,令佢得到「後備殺手」/「超級後備」嘅稱號。一張孩子臉,亦令佢得到另一個綽號:「娃娃臉殺手」——即使佢本人並唔鍾意呢個稱呼。

1998年法國世界盃決賽週,蘇斯克查為挪威足球代表隊上陣,打入16強。

1998/99球季,蘇斯克查喺對諾定咸森林大勝8比1一場,後備上陣短短十二分鐘內射入四球。佢喺歐洲聯賽冠軍盃決賽補時階段射入致勝一球,令曼聯反勝拜仁慕尼黑2比1,戲劇性完成三冠王霸業。跟住兩季,蘇斯克查分別射入14球。其中1999年12月主場贏愛華頓5比1嘅賽事再次射入四球。

2001/02球季,佢嘅入波數字再次上升到25球,連同嗰季加盟嘅雲尼斯杜萊所入嘅36球,兩人合共射入61球,成為球會史上最多產嘅組合之一。

2002/03球季,隨住碧咸同費格遜關係出現緊張,蘇斯克查開始轉型,不時被安排墮後打右中場。

2003年9月,蘇斯克查喺歐聯分組賽對彭拿典奈高斯射入佢喺球會嘅第115球之後,因部受傷離場,之後一直養傷到季尾至短暫復出,當中包括足總盃決賽贏米禾爾一場。

2004/05球季,蘇斯克查不斷受到膝部傷患困擾,成季都唔出得。做過幾次手術後,佢終於喺2005年12月底復出,並喺兩場足總盃賽事中上陣。

2006年3月,蘇斯克查同曼聯簽訂一份兩年新合約到2008年,球會重會畀佢執教嘅機會。8月23號,喺對查爾頓嘅英超賽事後備上陣,射入三年來首個正式比賽入波。佢復出之後入波威力仍然強勁,佢5次正選、6次後備上陣中入到6球,除咗成為當時曼聯首席射手外,佢亦係嗰季聯賽當時入波率最高的球員。

2006/07球季之後,蘇斯克查做咗膝部手術,但始終都好唔返晒,卒之喺2007年8月宣佈掛靴。