曼聯

曼聯

全名	曼聯足球會 Manchester United Football Club
花名	紅魔鬼（The Red Devils）
創會	1878年
主場	奧脫福球場 （容納人數：76,212人）
主席	祖爾·格拉沙 艾弗拉姆·格拉沙
領隊	費格遜爵士
打緊聯賽	英格蘭超級足球聯賽
2012/13	英超冠軍
主場波衫 作客波衫 第三作客

曼徹斯特聯隊（英文：Manchester United Football Club，簡稱曼聯，NYSE：MANU ）係英倫西北部曼徹斯特市嘅一間足球會，喺1878年創會，而初時嘅隊名係叫做紐頓希夫隊（Newton Heath L&Y Railway F.C.），由一班鍾意喺工餘踢吓波嘅鐵路工人組織而成。後來球隊陷入經濟危機，好彩得到酒商亨利戴維斯（John Henry Davies）注資，喺1902年正式改名為曼聯。

喺1910年，曼聯進駐奧脫福球場（The Old Trafford Stadium），而哩個主場經過多番改建之後，今時今日已經可以容納超過76,000人，係英倫最大嘅足球場之一。

曼聯創會至今，曾經捱過黑暗低潮時期，重經歷過1958年2月6號嘅慕尼黑空難嘅傷痛。當時嘅明日之星鄧肯‧愛華士（Duncan Edwards）同埋另外6名曼聯球員罹難，令球會受到災難性打擊。重傷好返嘅領隊麥‧畢樹比爵士（Sir Matt Busby）用十年時間重建球隊。喺1968年，曼聯喺歐洲冠軍球會盃決賽4比1擊敗有葡萄牙球王尤西比奧（Eusébio da Silva Ferreira）在陣嘅賓菲加，得到球會史上第一座歐洲冠軍球會盃冠軍獎盃。

1970年，畢樹比爵士退休，曼聯成績下滑，進入另一個黑暗時代。1974/75球季，曼聯喺當屆最後一場聯賽輸畀同城死敵曼城，射入致勝入球嘅正正係曼聯前三劍俠之一嘅丹尼士‧羅（Dennis Law）。曼聯宣佈降班次一級聯賽，呢次亦係曼聯目前為止唯一一次降班。次年曼聯重返甲組，但往後十年成績唔算出色。

喺1986年，費格遜（Alex Ferguson）由蘇格蘭嚟到奧脫福開始執掌曼聯，期間為曼聯培育咗一眾世界級嘅球星，打造出唔少嘅夢幻組合，幫球隊創出眾多驕人嘅紀錄，包括成就「三冠王」，可以話喺足壇及喺球迷嘅心目中，費格遜都舉足輕重。

1992年英格蘭超級足球聯賽（簡稱「英超」）成立以來，曼聯每年喺英超一直保持高排名，去到2010年為止，總共贏過十一屆冠軍，而且經常擠身成為歐洲頂級盃賽嘅角逐球隊，喺最高級別嘅歐洲聯賽冠軍盃（簡稱「歐聯」或「歐冠」）入面，歐洲國家嘅頂級聯賽勁旅要爭奪歐洲足壇霸主嘅殊榮，而曼聯就喺1998-1999年及2007-2008年兩個球季成功奪得呢個歐洲霸主嘅寶座；因為咁多驕人嘅戰績，曼聯成為世界上最受歡迎嘅足球隊之一，而又因為擁有眾多球迷嘅愛戴同支持，曼聯亦成為世界上每年最高收入嘅豪門球隊之一。

曼聯喺2000年加入G-14做咗創始成員。

主要錦標

英格蘭頂級聯賽

曼聯成立以來，總共攞過 20 次英格蘭頂級聯賽嘅冠軍，係咁多支球隊之中最多嘅。

賽季：1907年-1908年、1910年-1911年、1951年-1952年、1955年-1956年、1956年-1957年、1964年-1965年、1966年-1967年、1992年-1993年、1993年-1994年、1995年-1996年、1996年-1997年、1998年-1999年、1999年-2000年、2000年-2001年、2002年-2003年、2006年-2007年、2007年-2008年、2008年-2009年、2010年-2011年、2012年-2013年

英格蘭足總盃

曼聯攞過 11 次嘅英格蘭足總盃冠軍。

賽季：1908年-1909年、1947年-1948年、1962年-1963年、1976年-1977年、1982年-1983年、1984年-1985年、1989年-1990年、1993年-1994年、1995年-1996年、1998年-1999年、2003年-2004年

英格蘭聯賽盃

曼聯攞過 4 次英格蘭聯賽盃冠軍。

賽季：1991年-1992年、2005年-2006年、2008年-2009年、2009年-2010年

歐洲盃

曼聯喺歐洲嘅足球壇上都有表現，捧過

• 3 次歐洲冠軍球會盃／歐洲聯賽冠軍盃：1967年-1968年、1998年-1999年、2007年-2008年；
• 1 次歐洲盃賽冠軍盃，賽季：1990年-1991年；
• 1 次歐洲超霸盃，賽季：1991年。

世界冠軍球會盃

曼聯攞過 1 次世界冠軍球會盃：2008年

球員

代表性球員

曼聯自創會以來，一直都有好多出色嘅球員出現，有啲甚至成為會內嘅代表人物。

「紅魔三劍俠」

數曼聯經典，特別要講嘅喺1962年打後叱吒足壇嘅「紅魔三俠」，佢哋三個分別係：卜比查爾頓（Bobby Charlton）、佐治貝斯（George Best）、同埋丹尼士羅（Denis Law），佢哋效力曼聯期間為球會得到過好多榮譽，亦都當選過歐洲足球先生，而因為佢哋嘅豐功偉績，而家喺被譽為「夢之館」嘅奧脫福球場門口外面，就豎立咗佢哋三個人嘅銅像以作曼聯嘅精神代表。

「奧脫福大帝」

另外，一位後來被球迷稱為「奧脫福大帝」嘅球員喺1992年空降奧脫福球場，佢就係法國籍嘅簡東拿（Eric Cantona）。佢由另一間英格蘭球會列斯聯（Leeds United）轉會，加盟後即刻幫曼聯奪得英超成立第一年嘅錦標，第二年重幫球會贏到聯賽錦標兼夾足總盃，帶領曼聯歷史性成為雙冠王。曼聯喺佢嘅帶領之下，共攞過4次英超冠軍。

「黑白雙煞」

黑雙煞係約基（Dwright Yorke）同高爾（Andy Cole），白雙煞係舒靈咸（Teddy Sheringham）同蘇斯克查（Ole Gunnar Solskjær）。佢哋合作炮製大量精彩入波，包括喺1999年歐冠決賽最後時刻，舒靈咸同蘇斯克查各入一球令球隊成功後上封王。

「七小福」

及後重有曼聯青少年訓練計劃（青訓）出嚟嘅「曼聯七小福」，當中包括「球壇萬人迷」碧咸（David Beckham）、傑斯（Ryan Giggs）、史高斯（Paul Scholes）、加利尼維利（Gary Neville）、菲臘尼維利（Philip Neville）、畢特（Nicky Butt）、基利士比（Keith Gillespie），配合其它高質素嘅球員，為曼聯奠定英超霸主地位，喺1998-99年賽季，佢哋除咗協助球隊摘下英超冠軍及足總盃之外，重喺歐聯總決賽入面落後緊嘅最後一刻，戲劇性咁反勝德國勁旅拜仁慕尼黑而奪魁，成就咗曼聯史上首次嘅「三冠王」，成為紅魔光輝時代嘅功臣。

「C朗」

基斯坦奴朗拿度喺2003年加盟曼聯，初頭冇乜大建樹，但去到2006年就開始爆發，並喺2007-08年球季加埋為曼聯同埋自己攞到廿幾個獎。2009年佢以破紀錄嘅八千萬鎊轉會費去咗皇馬。

現役大軍名單

號碼 位置 球員名 1 龍 迪基亞（David de Gea） 2 後 拉菲爾·達施華（Rafael da Silva） 3 後 艾夫拿（Patrice Evra） 4 後 菲爾鍾斯（Phil Jones） 5 後 里奧費迪南（Rio Ferdinand）（副隊長） 6 後 莊尼伊雲斯（Jonny Evans） 7 中 路爾斯華倫西亞（Luis Antonio Valencia） 8 中 安達臣（Luis Anderson） 10 前 朗尼（Wayne Rooney） 11 中 傑斯（Ryan Giggs） 12 後 基斯史摩寧（Chris Smalling） 13 龍 連迪加特（Anders Lindegaard） 14 前 查維亞靴蘭迪斯（Javier Hernández Balcázar） 15 後 尼曼查維迪（Nemanja Vidic）（隊長） 16 中 卡域克（Michael Carrick） 17 中 蘭尼（Nani） 18 中 艾殊利楊格（Ashley Young） 19 前 韋碧克（Danny Welbeck） 20 前 雲佩斯（Robin van Persie） 22 中 史高斯（Paul Scholes） 23 中 卡華利（Tom Cleverley）

號碼 位置 球員名 24 中 費查（Darren Fletcher） 25 中 包維（Nick Powell） 26 中 香川真司（Shinji Kagawa） 27 前 馬捷達（Federico Macheda） 33 前 碧比（Bebé） 35 後 里斯‧布朗（Recce Brown）（預備隊） 36 後 馬歷克‧華美爾（Marnick Vermijl）（預備隊） 37 中 羅拔巴拉迪（Robert Brady）（預備隊） 38 後 米高‧堅尼（Michael Keane）（預備隊） 39 後 湯姆‧霍普（Tom Thorpe）（預備隊） 40 龍 賓阿姆斯（Ben Amos）（外借侯城） 41 前 祖舒亞京治（Joshua King） 44 後 梳恩‧麥堅堤（Sean McGinty）（預備隊） 45 中 大衛‧柏度基（Davide Petrucci）（預備隊） 46 中 通尼克利夫（Ryan Tunnicliffe） 48 前 威廉‧堅尼（Will Keane） 50 龍 森姆莊士東（Sam Johnstone）（預備隊） 51 後 福萊爾斯（Ezekiel Fryers） 52 中 蘭奴‧高爾（Larnell Cole）（預備隊） 53 中 積斯‧連加特（Jesse Lingard）（預備隊） 54 後 Michele Fornasier（預備隊） 55 後 Luke Giverin（預備隊） - 後 法比奧·達施華（Fabio da Silva）（外借昆士柏流浪）

效力過嘅球星

• 鄧肯‧愛華士（已故）
• 卜比查爾頓（已退休）
• 佐治貝斯（已故）
• 丹尼士羅（已退休）
• 白賴仁笠臣（已退休）
• 曉士（已退休）
• 簡東拿（已退休）
• 舒米高（已退休）
• 堅尼（已退休）
• 碧咸（已退休）
• 雲尼斯杜萊（已退休）
• 舒寧咸（已退休）
• 蘇斯克查（已退休，家下挪威球會莫迪教練）
• 基斯坦奴朗拿度（已轉會）
• 大衛美爾（已退休）
• 加利尼維利（已退休）
• 奧雲 (已退休)
• 朴智星（已轉會）