史高斯

想搵南華足球隊球員之一，睇下「泰利史高斯」。

史高斯

史高斯（Paul Aaron Scholes，1974年11月16號—）係英格蘭嘅足球員，打中場。佢精於長傳同埋後上射門，有「後上殺手」嘅稱譽。

史高斯喺1991年加入曼聯做學徒，1994年開始踢聯賽，成個職業生涯淨係效力曼聯一間球會。佢曾經為曼聯上陣676次，係曼聯史上上陣次數最多嘅球員之一（排第四），並為曼聯射入150球（排第九）。

史高斯喺1997年首次打國際賽，打過1998同2002年FIFA世界盃同埋2000同2004年歐洲國家盃。佢喺2004年宣佈退出國家隊。

2011年5月底史高斯宣佈掛靴，轉任曼聯教練之一。但喺2012年1月，史高斯復出，1月8號以球員身分喺足總盃鬥曼城。

前法國球王施丹曾經形容：「史高斯毫無疑問係佢年代之中最偉大嘅中場球員。」重話自己冇機會同史高斯做隊友係佢職業生涯中嘅遺憾。