基斯坦奴朗拿度

出自維基百科，自由嘅百科全書

基斯坦奴朗拿度（葡萄牙文：Cristiano Ronaldo dos Santos Aveiro，1985年2月5號—）係一名葡萄牙足球員，現時效力西甲皇家馬德里足球會，亦係葡萄牙國家足球隊隊長。由於佢個中文譯名比較長，因此多數叫佢做「C朗」。

C朗拿度喺18歲加盟曼聯，喺2004歐洲國家盃揚名，雖然當時被評「華而不實」，但亦協助葡萄牙奪得當年歐洲盃亞軍，其後除咗為曼聯贏得多個主要錦標外，亦攞到唔少個人獎，更當選2008年度世界足球先生。

C朗拿度喺2009年以破紀錄轉會費八千萬英鎊轉投皇家馬德里，成為全球最高身價球員。

目錄 1 生平 1.1 球會 1.2 國家隊 2 職業統計 3 榮譽 3.1 球隊 3.2 個人 4 其他 5 軼聞 6 註 7 外部連結

[編輯] 生平

[編輯] 球會

基斯坦奴·朗拿度出身於葡萄牙著名球隊士砵亭（另一著名葡萄牙球員費高亦係出自該隊），當時佢憑優秀盤扭技術揚威國內。喺2003-04年球季前，憑著基斯坦奴嘅出色帶領，士砵亭喺對曼聯嘅友誼賽以3-1擊敗對手。基斯坦奴亦因而引來曼聯教練費格遜注意。費格遜最後以1,224萬英鎊轉會費羅致基斯坦奴，取代啱啱轉會皇家馬德里嘅碧咸成為7號波衫新主人。

加入曼聯後，基斯坦奴主要打右翼，但亦不時參與左路進攻。佢用華麗腳法及優秀盤扭能力，令球迷對佢眼前一亮。曼聯喺2003-04年聯賽揭幕戰對保頓時，基斯坦奴後備入替並首次為曼聯上陣。佢一上場就發揮佢華麗腳法同埋快速盤扭協助球隊大勝4-0。喺2004年英格蘭足總盃決賽，佢嘅首個入波以及出色表現，令曼聯贏3-0捧盃。

喺曼聯嘅第二季，基斯坦奴朗拿度不斷成長，並協助曼聯喺高貝利球場以4-2擊敗前一屆英超聯冠軍阿仙奴。

即使係噉，但由於基斯坦奴·朗拿度嘅踢法喺加盟曼聯頭兩季偏向個人主義，同曼聯一向強調嘅整體踢法格格不入，故此當時曼聯球迷對佢嘅評價毀譽參半。直到基斯坦奴·朗拿度自2006-07球季起，踢法逐漸融入整體戰術，加上入球率上升，令曼聯重奪失落幾季嘅聯賽冠軍，而基斯坦奴·朗拿度亦從此廣為曼聯球迷所接受。

基斯坦奴·朗拿度喺2006-07年球季表現日漸成熟。喺第一場曼聯對富咸嘅比賽中，基斯坦奴接應朗尼傳中攻破富咸大門，唔單止協助球隊大勝5-1，亦粉碎自世界盃以後基斯坦奴·朗拿度同朗尼不和嘅傳聞。佢嘅表現係2006/07年球季曼聯長踞榜首嘅重要原因之一。佢除咗頻頻助攻之外，亦成為球隊十二碼劊子手。佢嘅入球能力更突飛猛進，無論係十二碼、遠射、罰球抑定係頭鎚攻門都入到波，甚至係連續三場聯賽賽事梅開二度。球季最終佢一共攻入23球，同朗尼並列球隊最佳射手，而且其中有17個英超聯賽入波，打破了英超有史以來中場球員球季入波紀錄。

不過關於佢嘅轉會傳聞一路都冇停過，西甲強隊皇家馬德里、巴塞隆拿被傳想羅致基斯坦奴·朗拿度。2007年4月13日基斯坦奴·朗拿度簽訂5年新約繼續留效曼聯^[1]。4月23日，喺06/07球季PFA最佳球員同埋PFA最佳年青球員評選中，C朗拿度分別力壓杜奧巴同埋法比加斯奪魁。C朗拿度係三十年以來首位包攬呢兩個獎嘅球員，而上一位喺同一球季獲呢兩項殊榮嘅球員係現時天空電視台著名球評安迪·格雷（1976/77球季）。5月4日，佢又獲得足球記者協會嘅英格蘭足球先生，成為史上第一個同獲呢三項殊榮嘅球員。

07/08年曼聯首循環對伯明翰攻入一球後，C朗拿度嘅入波浪潮一發不可收拾，並成為07/08球季四大聯賽以中場球員身份第一位率先打破20球大關嘅球員，而C朗拿度更喺主場對紐卡素嘅比賽中上演喺曼聯足球生涯第一次帽子戲法，協助球隊以6:0大勝紐卡素。呢個球季佢一共攻入了42球，差唔多攞晒所有個人榮譽，包括PFA英格蘭足球先生、FWA英格蘭足球先生、英超最佳射手、歐洲金靴獎、歐洲冠軍聯賽最佳射手、歐洲足協球會最佳前鋒、歐洲足總球會最佳球員，並協助球隊奪得聯賽、歐洲聯賽冠軍盃兩項最重要嘅賽事冠軍。

2008年度，基斯坦奴·朗拿度囊括歐洲金球獎、國際足協世界足球先生、歐洲金靴獎三項足球壇頂級個人榮譽，係繼巴西球星朗拿度之後嘅第二人。但喺其他榮譽同埋團隊榮譽方面，佢遠遠超越朗拿度，获得了聯賽冠軍、聯賽神射手、歐洲聯賽冠軍盃冠軍、歐洲聯賽冠軍盃神射手、英格蘭聯賽兩個足球先生等等，夾埋22項榮譽，係世界足球壇史無前例嘅大滿貫^[2]。

08/09年球季前，C朗拿度受到皇家馬德里等球隊青睞，C朗拿度曾經有意轉投，後來喺會方遊說下決定留隊。C朗拿度在開季時養傷近一個月，其後喺9月17日嘅歐洲聯賽冠軍盃分組賽對維拉利爾時復出。9月24日，佢喺英格蘭聯賽盃對米杜士堡射入佢喺嗰季首個入波。11月15日，基斯坦奴·朗拿度通過直接自由球射入自己喺曼聯嘅第100個入波。3月1日，佢協助曼聯奪得英格蘭聯賽盃。4月15日，佢喺對波圖嘅歐洲聯賽冠軍盃射入一個30幾碼世界波，唔單只令曼聯晉級四強，重得到費格遜嘅稱讚。其後，曼聯連續三年奪得聯賽冠軍。

不過，曼聯喺歐洲聯賽冠軍盃決賽以0:2輸畀巴塞隆拿，未能成為首支成功衞冕歐洲聯賽冠軍盃（改制後）嘅球隊。賽後，C朗拿度承認巴塞打得較曼聯好。

同時，皇家馬德里再次向C朗拿度招手。曼聯喺6月10日宣佈接受皇家馬德里破世界紀錄嘅8000萬英鎊開價^[3]，C朗拿度正式轉投皇家馬德里。

[編輯] 國家隊

基斯坦奴朗拿度現時係國家隊隊長，着7號波衫。

基斯坦奴朗拿度早喺2003年8月首次代表葡萄牙國家隊出賽，當時對哈薩克。2004年歐洲國家杯佢隨國家隊出賽，首戰為開幕戰對希臘，佢射入葡萄牙嗰場唯一入球；喺對荷蘭嘅準決賽更射入首個入球。不過國家隊最終喺決賽功虧一簣。其後基斯坦奴喺2004年8月舉行嘅奧運足球賽事再度代表葡萄牙。至2005年6月11日，佢一共為國家隊出賽24次，入咗8球。

令基斯坦奴·朗拿度真正揚威嘅係2006年FIFA世界盃。佢喺對伊朗嘅一場分組賽射入一球，其後佢重一路帶領葡萄牙殺入四強。自此佢嘅實力獲得肯定，唔少頂級球會極力招攬佢，包括皇家馬德里同埋華倫西亞。基斯坦奴朗拿度喺世界杯期間還發生過一段插曲。代表葡萄牙出賽嘅佢喺八強遇上英格蘭同佢嘅曼聯隊友朗尼。喺下半場朗尼一次犯規，基斯坦奴被指慫恿球証，間接導致朗尼出場。其後英格蘭互射十二碼輸畀葡萄牙，更令基斯坦奴朗拿度成為英格蘭球迷攻擊嘅對象。基斯坦奴曾經因此一度要求轉投皇家馬德里，而華倫西亞更想出價二千萬鎊羅致。後因曼聯極力挽留，基斯坦奴至繼續留喺曼聯。

領隊史高拉利喺2007年2月將隊長臂章交畀佢。噉係因為前葡萄牙足總主席卡路士·施華逝世，促使史高拉利希望完成佢嘅遺願。卡路士·施華生前一直希望有一日能夠見到基斯坦奴朗拿度成為國家隊隊長，更曾經親自要求史高拉利噉做，而呢個遺願喺佢逝世後兩日達成。基斯坦奴朗拿度於2007年2月6日對巴西國家隊嘅友誼賽以隊長身份正選上陣，當時佢年僅22歲，其後一直成為隊長至今。

[編輯] 職業統計

球會	球季	國內聯賽		國內盃賽		聯賽盃（英格蘭）		歐洲賽事		其他[4]		總數
		出賽	入波	出賽	入波	出賽	入波	出賽	入波	出賽	入波	出賽	入波
士砵亭	2002–03	25	3	3	2	–		3	0	0	0	31	5
	總數	25	3	3	2	–		3	0	0	0	31	5
曼聯	2003–04	29	4	5	2	1	0	5	0	0	0	40	6
	2004–05	33	5	7	4	2	0	8	0	0	0	50	9
	2005–06	33	9	2	0	4	2	8	1	0	0	47	12
	2006–07	34	17	7	3	1	0	11	3	0	0	53	23
	2007–08	34	31	3	3	0	0	11	8	1	0	49	42
	2008–09	33	18	2	1	4	2	12	4	2	1	53	26
	總數	196	84	26	13	12	4	55	16	3	1	292	118
皇家馬德里	?	?	?	?	?	?	?	?	?	?	?	?
職業總數		?	?	?	?	?	?	?	?	?	?	?	?

^[5]

[編輯] 榮譽

[編輯] 球隊

曼聯

• 世界冠軍球會盃冠軍（2008年）
• 歐洲聯賽冠軍盃冠軍（2008年）
• 英格蘭超級聯賽冠軍（2007年、2008年、2009年）
• 英格蘭足總盃冠軍（2004年）
• 英格蘭聯賽盃冠軍（2006年、2009年）
• 英格蘭社區盾冠軍（2003年、2007年、2008年）

國家隊

• 歐洲國家盃亞軍（2004年）
• 世界盃殿軍（2006年）

[編輯] 個人

• 國際職業球員協會最佳青年球員（FIFPro）
• 2006年度葡萄牙最佳運動員
• 2007年度PFA年度最佳青年球員^[6]
• 2007年度英格蘭足球先生^[7]
• 2007年度PFA足球先生^[6]
• 2007年度歐洲足球先生第二名^[8]
• 2007年世界足球先生季軍
• 2008年度PFA足球先生^[9]
• 2008年度英格蘭足球先生^[10]
• 2008年英超聯賽最佳射手
• 2008年聯賽冠軍盃最佳射手
• 2008年歐洲金靴獎
• 2008年歐洲足協球會最佳前鋒
• 2008年歐洲足協球會最佳球員
• 2008年金球獎
• 2008年世界足球先生冠軍
• 歐洲足協年度最佳陣容 （2004年、2007年、2008年）
• 國際足聯年度最佳陣容 （2008年）

[編輯] 其他

• 鍾意牌子：Nike，Pepe Jeans，Extra Joss（嘢飲），鈴木汽車。
• 細個偶像係馬勒當拿。目前崇拜葡萄牙嘅費高以及法國嘅亨利。
• 細個效力過葡萄牙球會士砵亭。
• 俾荷蘭同性戀雜誌選為2004年歐洲國家盃以及2006年世界盃最性感足球員。

[編輯] 軼聞

• C朗拿度阿爸仰慕美國前總統朗奴‧列根（Ronald Reagan），因此喺基斯坦奴同佢二家姐個名，以朗奴為字根，分別加上朗拿度同埋朗娜達（Ronalda），呢兩個名喺葡萄牙好罕見。
• C朗拿度細個就好鍾意足球，成日因此返學遲到，有一次老師終於忍無可忍對住手裡抱住足球再次遲到嘅佢講：放低個波啦，佢唔可以為你嘅生活帶來任何嘢。^[11]
• 雖然曾經效力士砵亭，但細個嗰時係賓菲加球迷。
• 初來曼聯時申請過着28號波衫，但費格遜對佢講7號波衫屬於佢。
• 初來曼聯之時，佢俾好多人批評表現唔配曼聯嘅7號波衫傳統（佐治貝斯、白賴仁笠臣、簡東拿、碧咸都着過7號波衫），但喺2007年，佢以出色表現反擊呢個講法。

[編輯] 註

[編輯] 外部連結

• Cristiano Ronaldo Fanpage
• Cristiano Ronaldo Soccer Star Info
• Cristiano Ronaldo Portuguese
• C朗拿度球迷網站
• C.朗拿度資料（曼聯官方網站）
• C.朗拿度資料（英超官方網站）
• News, photos and videos Cristiano Ronaldo