資料片（expansion pack）指遊戲開發者喺一隻遊戲出咗街之後，因為想吸引玩家繼續玩等嘅緣故，而出嘅擴展軟件。資料片係一啲額外嘅遊戲內容，一定要有咗隻基本遊戲（base game）先會有用。資料片會為隻遊戲增加新嘅角色、武器、以至關卡等嘅內容。出名嘅例子有模擬市民系列（The Sims）：呢個系列會隔幾年出一隻新嘅基本遊戲（模擬市民二、模擬市民三等），而喺出下一隻基本遊戲之前，個系列會出若干隻資料片，增加隻基本遊戲嘅內容，而啲客可以按照自己喜好揀買邊一隻資料片擴充自己手上個遊戲程式。
