鐵甲威龍

出自維基百科,自由嘅百科全書
跳去: 定向搵嘢
《鐵甲威龍》宣傳海報,套戲係由美高梅電影公司同埋獵戶座電影公司聯合發行。

鐵甲威龍》(Robocop)係美國美高梅電影公司(Metro Goldwyn Mayer)及獵戶座電影公司(An Orion Picture)聯合出品嘅英語電影,屬於科幻式嘅警匪片。全個電影系列共有三集,另外亦有推出電視單元劇同埋卡通片,而以下所介紹嘅只係關於電影方面。

電影資料[編輯]

制作[編輯]

出品機構:

  • 美高梅電影公司(Metro Goldwyn Mayer)
  • 獵戶座電影公司(An Orion Picture)

導演:Pual Verhoevan

編劇:Edward Neumeier、Michael Miner

主演:彼德.韋拿(Peter Weller)、南西.愛倫(Nancy Allen)……等。

簡介[編輯]

第一集劇情主要講述鐵甲威龍誕生嘅前後同埋遭遇,而第二集同第三集都係講述鐵甲威龍所遇到嘅事同埋本身人性嘅心路歷程。

呢套戲入面其實隱伏咗好多社會問題,畀觀眾好多討論空間,比如:死後其實重有冇可能變成機械咁嘅方式而繼續生存呢?經過死亡變成咗另一種存在方式之後,又會唔會重有前身嘅記憶?劇中嘅私營大財團 OCP 一直以接管底特律市為目標而千方百計,導致社區遭到蠶食,現實會唔會發生?又會有咩後果?……等。除此之外,戲裏面重會時不時穿插住一啲似真還假嘅新聞報導同埋廣告,其中嘅訊息好多都關乎我哋週圍發生緊嘅環境,好似臭氧層出現減退,汽車排放廢氣問題,太空戰略計劃嘅問題……等,睇吓睇過嘅人有幾多領會。

第一集劇情大綱[編輯]

梅菲(Murphy)係一位新調任到底特律市(Detroit City)嘅機動警察,之不過喺佢第一次同拍檔露薏絲(Lewis)出勤時就出咗意外,俾一班控制區內罪惡,以卡雲斯(Clarence)為首嘅壞蛋幫殺咗,至於露薏絲就俾人打暈跌咗落倉底逃過一劫。

喺之前,擁有當地規劃兼有警隊管理權嘅大財團 OCP 公司正研究緊發展機械警察,因為當中總裁迪.鍾斯(Jones)嘅全機械設計ED-209喺示範操作時失控殺死咗其中一個與會主任,財團主席感到非常失望,於是選用咗另一位技術主管波比(Bobby)嘅人類改造鐵甲戰士嘅計劃。因為咁,死咗嘅梅菲即刻被送到手術台,經過工程師嘅一輪改造之後,新一代擁有鐵甲身軀,但仍保有部份人類器官嘅半機械超級警察---鐵甲威龍(ROBOCOP)正式誕生。

鐵甲威龍嘅程式設定裏面,有三個佢一定要遵守嘅主要法則:

  1. 為公眾服務
  2. 保護無辜嘅市民
  3. 維持法紀

但係原來設定其實重隱藏咗第四項嘅保密法則,只有少數 OCP 高層先知道。因為經過洗腦嘅關係,鐵甲威龍嘅記憶庫裏面只有電腦輸入嘅資料,至於所有關於梅菲前身嘅記憶基本上已經冇晒,之但係工程師意料唔到嘅係,威龍居然會發夢,重夢見到梅菲記憶中嘅點滴同埋被殺嘅一刻,加上露薏絲從威龍無意識嘅慣性動作之中認得佢就係梅菲,於是威龍覺得非常困惑。後來喺出勤任務嘅時候,威龍遇返先前殺過梅菲嗰班人嘅其中一個,而呢個叫艾繆(Emil)嘅惡匪因為聽到威龍嘅口頭禪Dead or alive, you're coming with me)同之前梅菲同佢講過嘅一樣,衝口而出話認得佢,呢一吓令威龍更加震憾,為求搵出原因,於是威龍返去警察總部翻查電腦檔案,終於搵出殉職警員梅菲嘅資料,後來更從點點湧出嚟嘅記憶之中知道自己就係梅菲。

威龍因為被殺變咗改造人而扯火,於是誓要搵出卡雲斯班人渣出嚟繩之於法。期間,提出改造人計劃嘅波比因為一時得意不知收歛而成為咗鍾斯嘅眼中釘,結果俾鍾斯收買咗嘅卡雲斯殺死;及後當威龍搗破製毒工場時當場捉到卡雲斯,不過卡雲斯為求自保,於是爆咗喺背後操控犯罪嘅其實係鍾斯。威龍捉咗卡雲斯返差館之後就隻身前往 OCP 大樓要拉鍾斯,但係鍾斯已經胸有成竹,佢除咗擁有威龍嘅行動追蹤器知道威龍會嚟之外,重有一樣秘密殺着,就係佢預先加咗喺威龍程式裏面嘅第四項法則;當威龍入到鍾斯嘅辦公室想進行逮捕嘅時候,突然第四法則啟動令到機件癱瘓控制唔到行動,原來呢項法則係用嚟限制威龍唔可以作出對抗 OCP 高層嘅行為。鍾斯一心要毀滅鐵甲威龍,希望財團主席會重用佢嘅全機械警衛計劃,於是派出佢嗰隻全機械警衛ED-209向威龍襲擊,威龍本身已經癱瘓緊,重俾隻機械怪嘅重型猛打,唯有且戰且退咁走到停車場,好彩遇到駕嚟營救嘅露薏絲,最後逃離咗追捕,去到一個荒廢工場暫避。

OCP 嘅副總裁辦公室入面,鍾斯將個追縱器交咗畀保釋出嚟嘅卡雲斯,重供應咗最新式嘅重型炮畀佢嚟對付威龍,於是卡雲斯拿拿林召集佢嗰幾個手下,一齊去到荒廢工場夾擊威龍,不過威龍亦都早有準備,經過一輪游擊戰之後,呢班匪幫最終都俾威龍消滅晒。

威龍負傷返去 OCP 大樓,直闖入會議室,當時包括鍾斯嘅一眾高層正喺度開緊會,威龍因為受到第四法則限制唔可以對鍾斯作出逮捕行動,於是向財團主席同一眾官員展示鍾斯曾經親口承認派人殺死波比嘅錄影片段,鍾斯知道自己仆咗街,於是掹狹持財團主席要求畀直升機走佬,財團主席一嬲之下即時宣佈炒咗鍾斯,而威龍程式第四項法則嘅限制即時解除,就地將鍾斯正法。

財團主席安全脫險,隨口就問正要離開嘅威龍:「靚仔鎗法唔錯吖,你叫咩名?」

威龍回頭一笑:「梅菲。」

第二集劇情大綱[編輯]

底特律市(Detroit City)嘅警察因為唔滿意管理佢哋嘅大財團 OCP 公司削減咗四成嘅警員福利而進行罷工,減薪背後嘅原因其實係之前 OCP 公司自願巨額貸款咗畀底特律市政府,而佢哋睇準市政府係冇可能喺限期內清還欠款,咁就可以引用借貸合約中其中一項「合約期滿後市政府如仍未清還欠債,可接收底特律市管理權及資產」嘅抵償條款;為咗達成將底特律市私有化嚟重新改造賺更多嘅錢,OCP 公司甚至利用警員罷工嚟製造市內治安混亂,等將來有藉口話要清理區內嘅罪惡,可以名正言順咁接收底特律市。

同時間,一種稱為「核靈」(NUKE)嘅毒品已經充斥整個城市,毒品集團直頭無法無天到公然喺記者會刺殺反核靈嘅衛生局長,而被通緝嘅集團首腦兼核靈教派領袖簡恩(Cain)更囂張到喺電視公開發表錄影聲明,話只要邊個想繼續快樂佢一定會滿足大家。

市內有差唔多九成警察罷緊工,所以市內嘅罪案幾乎冇人理,啲道友要搵錢買毒品就趁亂週圍搶嘢搵錢,就連啲仔呢頭走去搶人嗰頭可以即刻俾另一個賊仔打劫返;雖然係咁,但仍然有一個好特別嘅警察,佢唔理咩警員福利咩係 OCP,一於盡忠職守繼續打擊罪惡,佢就係半機械身體但擁有人類心腸嘅鐵甲威龍,當然重有佢喺第一集時一齊出勤嘅好拍檔露薏思(Lewis)。

威龍喺毒品拆家嘅口中知道咗核靈製造工場嘅位置,於是隻身前去展開拘捕行動。工場裏面除咗好多守衛同埋黑市勞工喺度做緊嘢之外,核靈集團嘅首腦簡恩同埋佢嘅幾個頭號馬仔都喺度,威龍衝入工場鎮壓晒所有抵抗,但就俾簡恩佢哋趁亂走甩咗;當威龍巡視犯罪現場嘅時候,見到一個大約十零歲嘅細路拎住指住佢,呢個叫賀寶(Hob)嘅細路原來亦都係簡恩嘅馬仔之一,佢因為一時走唔甩所以暱咗喺度,不過威龍嘅偵緝程裏面係唔容許佢傷害婦孺同埋細路,賀寶睇穿咗呢點,所以對威龍開咗一鎗之後乘機走埋,威龍當場呆咗喺度,而威龍嘅記憶庫裏面就勾起咗佢前身梅菲對個仔嘅回憶。

因為威龍重有梅菲生前嘅記憶,所以佢間唔中會揸去到梅菲遺孀嘅住所度遠遠咁偷望梅菲太太同埋個仔,搞到梅菲太太愛倫(Ellen)成日覺得梅菲重在生,重用不人道理由入稟法院控告 OCP 公司改造咗佢老公;受到 OCP 公司嘅壓力,亦為咗要令愛倫死心,威龍忍住心痛咁向梅菲太太否認自己係梅菲,話自己只係一件機器,而呢個身體係用嚟悼念梅菲嘅英勇。

喺一次跟踪嘅行動之中,威龍見到一個叫達菲(Duffy)嘅警員竟然同賀寶仔有接觸,佢除咗收黑錢提供警察嘅行動線報畀核靈集團之外,原來亦俾核靈毒癮控制住,威龍展開拘捕嘅時候向達菲進行迫供,於是爆出咗簡恩嘅大本營係喺一個荒廢工場;威龍隻身去到呢個工場,點知原來簡恩佢哋一早有埋伏,最後俾簡恩同佢班手下肢解拆散,重將威龍嘅散件掉喺警局門口示威。威龍嘅電路受到嚴重破壞,生物系統陷入癱瘓,生命危在旦夕,而 OCP 為咗要令社區嘅壞治安得到持續,達到接收嘅目標,希望救威龍嘅同時,亦令威龍減低打擊罪案嘅效率,於是由 OCP 新嚟嘅女技術支援主任茱莉安費絲(Juliette Faxx)出馬,將好多好多九唔搭八嘅指令硬塞入威龍個命令區入面,例如:講嘢唔准有警官口吻、如果唔係親切嘅說話就唔好講、要有親善形象、遵守交通規則、唔准衝紅燈…等一大堆,企圖令威龍變成一個親善大使。當親善威龍孖住露薏絲出勤去到搶劫案嘅犯罪現場時,明明個賊佬向佢哋開鎗想逃走,威龍重慢慢同人講道理,但係有個人喺禁煙區食煙佢就開鎗嚇人,重俾啲細路喺佢後面噴油整蠱;威龍潛意識都覺得自己好唔妥,於是氣沖沖咁去到警局門口嘅發電站度打開閘門,冒險伸手將幾萬伏特嘅電力傳入自己身體,想將所有指令刪除;喺警局門口罷工遊行嘅警察見到威龍嘅自殺式行為,即刻掉底晒啲標語去幫佢脫離險境,威龍解釋自己係執法者而唔係親善大使,而眼下嘅痛處就係核靈,呢番言論令到班警察非常慚愧,於是由威龍帶領下大舉出動去搗破核靈集團,行動令到簡恩重傷被捕,重喺一架運金車入面搜出咗幾億元嘅毒品錢,之但係賀寶同埋另一個女爪牙安琪(Angie)就趁亂開住另一架運金車走甩咗;本來安琪諗住去劫犯,但賀寶仔竟然用核靈威脅叫佢唔好理簡恩,想自立門戶。

喺之前一段時間,OCP 老總裁對於新升職嘅技術主管莊臣(Johnson)發展新一代半鐵械警察嘅進度好唔滿意,原因係其他殉職嘅警員都唔願意再生成為機械人,搞到一啟動就唔受控制咁自毀,新技術主任費絲為咗搏上位,於是就乘機獻計,老總裁見個舊嘅計劃冇乜進展就畀個機會佢去嘗試;費絲初步計劃係要搵出邊類人會願意同埋適合成為機械人,最後目標喺死囚嘅身上,佢認為班死囚橫掂都係要,畀個機會佢哋重生成為不死嘅機械人一定唔會抗拒,於是喺上述嗰次嘅搗破核靈行動之後,被捕嘅簡恩就係成為咗費絲嘅理想對象,而且佢知道簡恩毒癮好深,係可以用毒品嚟控制佢聽話。

因為搗破核靈行動之中搜出嘅係犯罪嘅贓款,市政府係冇權動用成為政府資金,底特律市長古錫(Kuzak)為咗搵錢喺限期前要還畀 OCP 公司,無厘頭就搞咗個籌款晚會,目標係還款額三千八百萬美元,之不過市民嘅反應都好冷淡,做咗大半晚都只係籌到四千元左右;突然古錫接到安琪電話,話會捐出一大筆錢足夠市政府還債,重安排古錫同賀寶會面,商討捐款條件。當古錫同助手兩個人去到一個舊貨倉同賀寶傾生意嘅時候,外面忽然來咗架大貨車,重走咗個機械人落嚟,佢扯開貨倉門係咁搜索市長古錫嘅位置,目的係要暗殺古錫唔畀佢得到呢大筆資金;核靈爪牙見勢色唔對就即刻向呢個機械人開鎗,而佢亦以重火力還擊,最後啲爪牙瓜晒老襯,個場亦都炸到亂七八糟,好彩古錫無意中發現個排水窿,於是即刻捐入去沖咗出海灣逃走咗;隻機械人繼續搜嚟搜去始終搵唔到古錫,但就畀佢見到安琪正喺度注射核靈頂癮,安琪開頭嚇一嚇,但個機械人慢慢伸出機械臂,個面部顯示器重模擬出簡恩生前嘅樣貌對住佢笑,原來呢個就係由簡恩改造而成嘅 OCP 新一代機械警察。安琪因為見返簡恩覺得好開心,不過呢個機械簡恩突然反面無情,一出手就將安琪擊殺,而喺一邊偷睇嘅賀寶見到咁就即刻逃走,諗住匿喺架運金車裏面,點知俾機械簡恩發現咗,重亂鎗向住架車狂掃;當威龍接報嚟到鎗擊現場時,發現賀寶喺架運金車裏面俺俺一息,當賀寶話咗畀威龍知係邊個搞成咁之後就死埋。

OCP 老總裁喺新落成嘅 OCP 大廈舉行新市鎮規劃記者招待會,市長古錫逃過大難後嚟到會場,當見到老總裁為大家介紹新一代機械警察時成個人嚇咗一大跳,因為呢個機械人佢已經見過,發現暗殺嘅幕後真兇原來就係 OCP,但因為佢同賀寶嗰單交易其實係唔見得光,所以唯有忍住唔敢出聲。演講時,老總裁拎咗好大支核靈出嚟向記者宣佈要剷除毒害嚟迎接新市鎮,點知Robocain突然有反應想搶支核靈,呢個時候威龍拎住支大炮鎗嚟到會場向機械簡恩挑釁,機械簡恩即刻解除自己嘅武器限制嚟向威龍開火,重射傷在場好多人;不過經過一輪戰鬥之後,威龍再一次贏得勝利。

事後老總裁俾記者圍住問今次嘅死傷事件點負責,但佢一於闊佬懶理上車走人;露薏絲問威龍:「就咁畀佢甩身?」,威龍答:「有咩辦法,我哋只不過係普通人類嚟。」

第三集劇情大綱[編輯]

OCP 同日本一間大企業想喺底特律市重建,但啲居民唔肯走,重用武力反抗。OCP 叫鐵甲威龍去捉班地下反抗組織,但佢冇捉到,重幫班市民反抗。而威龍個拍擋就俾OCP射死咗。但因為第四條法則,佢唔可以殺死嗰個OCP高層,所以機件開始癱瘓,嗰個OCP高層重攞支鎦彈射去鐵甲威龍度。之後班地下反抗組織就救咗鐵甲威龍走,重揾人整返好鐵甲威龍個心口同胸甲,而且刪除咗第四條法則。

當鐵甲威龍出去揾OCP啲人打完返嚟之後,發覺啲人唔見晒。突然有一個由日本送嚟嘅忍者機械人出現咗,重斬咗佢隻手臂。鐵甲威龍嘅能源因此流失,鐵甲威龍即刻裝番個武器打爆個忍者機械人。鐵甲威龍揾到個叉得電嘅飛天裝備之後,就飛去OCP救人。呢個時候,OCP 因為唔夠人手而將啲犯人攞出嚟做兵力,反抗組織面對咁強烈嘅火力而節節敗退。鐵甲威龍就過咗嚟幫反抗組織,然後再去救人。鐵甲威龍飛去OCP之後,見到嗰兩個俾人捉走嘅女人,同兩個忍者機械人。其中一個女仔控制咗嗰兩個忍者機械人,令佢哋斬爆對方。救完人之後,日本企業嘅總裁就向佢鞠躬。

主要出場人物同埋演出者[編輯]

  • 梅菲/鐵甲威龍(第一、二集):彼德.韋拿(Peter Weller)
  • 安妮.露薏絲:南西.愛倫(Nancy Allen)
  • 鐵甲威龍(第三集):羅拔.巴奇(Robert Burke)