香港區議會委任議席爭議

香港區議會委任議席一直係香港政制發展入面其中一個主要嘅爭議，反對委任議席嘅人認為，委任議席做法唔民主。

歷史沿革

英屬香港時期（1997年前）

喺1982年引入選舉前，區議員全部由港督委任，其後已逐步減少。

香港主權移交後、取消委任議席前（1997年－2014年）

喺2013年，立法會通過修改區議會條例，2015年香港區議會選舉 (選出2016年議員喺2016年1月1號上任)全面取消68個區議會委任議席。

取消委任議席後（2015年－2022年）

喺2019年，香港經歷反送中運動，親中派因為逆民意而行，就算200萬人出嚟反對修訂逃犯條例，佢哋都堅持如期修例。結果，佢哋喺年底嘅區議會選舉大敗。

去到2020年，北京未經諮詢或香港人同意，強行訂立《港版國安法》，又大幅度削減立法會直選議席。當時就有聲音話香港政府會恢復委任制，當時外間就批評做法大倒退。

政府未經諮詢或港人同意復設委任議席（2023年起）

睇埋：完善地區治理建議方案同區議會資格審查委員會

喺2023年5月，香港政府喺未經諮詢或香港人同意之下，宣佈喺2023年香港區議會選舉入面，將直選議席數目大幅度削減，數目甚至仲少過1982年第一次區議會選舉嗰陣，又引入政府單方面判定嘅國安審查。呢個做法引起咗好多2019年當選嘅區議員反對，形容咁樣係閹割民選議席、假選舉。《明報》社論亦批評，做法過度收緊，令政治光譜收窄，政治人才喺小圈子入面流轉，嚟嚟去去都係同一班人，最後只會令一批「紅二代」、「富二代」等特權階級占據各類公職。