高比拜仁

出自維基百科,自由嘅百科全書
跳去: 定向搵嘢
高比拜仁

高比拜仁英文Kobe Bean Bryant1978年8月23號—)暱稱做高比仔,響美國賓州費城出世,係一個現役嘅NBA球員,由1996年加入NBA開始一路喺洛杉磯湖人打波,佢嘅波衫冧巴係24號(最初有一段長時間係8號),位置係得分後衛(Shooting Guard)。佢被認為係近年表現最好嘅NBA球員之一。高比拜仁係前費城76人嘅籃球員祖拜仁Joe "Jellybean" Bryant)個仔。

早期生活[編輯]

高比拜仁係祖拜仁唯一嘅仔。高比話,佢3歲已經識打籃球。6歲時,佢哋一家移居意大利,而佢阿爸亦開始佢嘅職業籃球生涯。高比逐漸適應意大利嘅生活方式,並且能夠講一口流利嘅意大利話,更曾經認為意大利係佢第二個家。

1991年,高比一家搬返美國。喺費城郊區嘅勞爾梅里恩(Lower Merion)高中度過一段極之美妙嘅高中籃球生涯。呢段期間,高比成日去天普大學體育館打波,因此識得天普大學嘅球星、後來成為隊友嘅鍾斯(Eddie Jones)。當時嘅高比球技已經好突出,1994-95年高三年級嘅賽季,佢更以31.1分、10.4籃板、5.2助攻嘅成績,成為當年賓夕凡尼亞州年度最佳球員。喺呢一年,佢亦帶領球隊打出32勝3負佳績,攞到42年來第一個州冠軍,佢喺高中球季累積嘅2883分,更打破名宿張伯倫(Wilt Chamberlain)保持咗40年嘅紀錄。高比不可思議嘅籃球天分亦得到全美國認可。

佢喺美國大學入學試(SAT)中1080分嘅成績本來可以保證佢擁有好多一流大學──包括北卡羅萊納大學或杜克大學嘅籃球獎學金,但係,高比最終放棄佢原來嘅計劃,繞過大學籃壇直接進入NBA。作為歷史上第一個噉做嘅後衛,高比呢個大膽決定喺當時亦引起廣泛爭議。

NBA[編輯]

早期[編輯]

高比喺1996年嘅NBA選秀大會俾黃蜂以第13名選中,隨即喺1996年7月11號被交換到洛杉磯湖人。由於高比曾經喺Adidas嘅ABCD訓練營着過143號波衫,因此加入NBA之後,就將三個數字加埋,「8」號就成為佢第一個波衫冧巴。

出面網頁[編輯]