Jaye Davidson

Jaye Davidson
出生日	1968年3月21號  （56歲）
出生地	河濱
本名	Alfred Amey
國籍	美國、英國
母語	英文
識嘅語言	法文、英文
職業	演員、模特兒、電影演員
[改維基數據]

Jaye Davidson（有譯杰伊．戴維森，原名Alfred Amey；1968年3月21號—）係一個男演員，喺美國加州河濱郡出世，係美國籍，但兩歲半就返咗佢阿媽鄉下英國生活。佢係英、非混血兒，阿爸係非洲加納人，阿媽係英國人。佢好細個嘅時候父母分咗居，後來阿爸死咗。佢同阿媽、兩個姊妹一齊住喺英國赫特福德郡。佢讀書讀到16歲就無讀，一路做過好多唔同嘅散工。

1994年佢拍咗一套叫做《哭泣的遊戲》（The Crying Game）嘅戲，飾演一個男扮女裝、叫做「黛兒」（Dil）嘅角色，呢套戲好成功，重得到奧斯卡金像獎6項提名，而佢就被提名最佳男配角，套戲重攞到最佳原創劇本獎。做呢套戲之前，佢從未做過演員，當時佢做緊時裝設計助理。有一日佢喺《愛德華二世》（Edward II）呢套戲嘅慶功派對度畀電影公司嘅人睇中，邀請佢做「黛兒」呢個角色，本來佢唔係幾想，但因為做緊個間公司瀕臨破產邊緣，佢畀人炒咗，好鬼窮，於是為咗錢而接咗套戲。

佢本來就唔係幾想做戲，點知套戲令佢爆紅，開始有人其他人搵佢拍戲同做模特。佢話對做戲真係無乜熱情，而且佢係一個好驚出名嘅人，所以呢套戲之後佢一路諗住收山。佢唔想因為錢而拍埋晒啲爛片，但又知道自己大使兼貪錢，好易受誘惑。後來，有導演搵佢拍《星際奇兵》（Stargate）電影，飾演埃及太陽神「Ra」呢個角色，佢唔想拍，但又係因為錢，有啲心郁郁。於是佢同電影公司講，如果片酬有一百萬美金我先肯制，佢以為啲人一定唔會睬佢，點知電影公司竟然講：「好，我哋就畀一百萬你。」於是佢就拍咗生平第二套商業電影，之後佢一直暱埋，只客串做過一啲實驗電影同紀錄片，跟住就從娛樂圈消失，繼續做返佢時裝助理嘅工作，過住一啲平凡嘅生活，但到而家依然有好多影迷好懷念佢。