中古英文
中古英文（粵拼：zung1 gu2 jing1 man2*4 | 英文：Middle English）係現代英文嘅「語言祖先」，古時英倫用嘅語言，喺11世紀到15世紀後期嗰陣存在。喺呢段時期，英格蘭受到講羅曼語言[e 2]嘅族群統治，多隻羅曼語言先後做咗統治階層講嘅語言，大幅度咁影響咗中古英文呢隻低層語言，而呢股影響到咗廿世紀都仲可以睇得到。情況就好似喺英治香港期間，香港粵語大受英式英文影響。或者係葡治澳門期間澳門粵語大受葡文影響。
歷史背景[編輯]
諾曼影響[編輯]
到 11 世紀，發生咗一件對英文影響深遠嘅大事：諾曼征服英格蘭[e 3]。話說當時嘅諾曼第公國[e 4]—地理上相當於依家嘅法國北部—喺 1066 年成功打敗盎格魯-撒遜人，征服咗英格蘭，打後要去到 1469 年，英格蘭先至脫離諾曼人嘅支配。諾曼第公國崇尚嘅係古諾曼文[e 5]同古法文[e 6]—呢兩種語言都屬於羅曼語言（由通俗拉丁文演變而成），而且仲係近親。喺諾曼征服英格蘭之後嗰幾百年，諾曼人將古諾曼文同古法文傳入英格蘭，仲令呢兩種語言成為咗貴族同官員嘅語言。因為咁，任何同政府接觸嘅人，基本上都係焗住要用古諾曼文或者古法文講嘢。因此，中古英文逐漸開始出現好多嚟自古諾曼文或者古法文嘅借詞，英文估計喺呢段期間由古諾曼文同古法文嗰度借咗大約 10,000 隻字詞過去[1]。
呢種影響到咗廿一世紀初都仲睇得到：雖然英文係一種日耳曼語言，但係因為深受古諾曼文同埋拉丁文嘅影響，今時今日嘅英文估計有 4 至 6 成嘅字都係嚟自羅曼語言嘅：
- magnificent（宏偉）、ignorant（無知）、respectable（可敬）、politics（政治）、science（科學）、culture（文化）、authorize（授權）...
英文入邊似法文嗰啲字詞，傾向「高檔」，係受過高等教育嘅人（會同貴族以及官員打交道嘅人）先會用嘅，好似係宏偉或者科學呀噉。但係一啲簡單同基本嘅字詞（平民日常生活會用嗰啲）就依然似日耳曼語言[2][3]。
書寫影響[編輯]
最後有必要一提嘅係，諾曼征服英格蘭亦有影響英文書寫：當時嘅英格蘭社會變咗崇尚古諾曼文同古法文，英文廣泛咁被視為「庶民先會講嘅低等語言」[4]，啲人變到唔多願意寫英文，中古英文因此就比較少文獻記錄。可以睇睇雙層語言嘅現象。
睇埋[編輯]
引述[編輯]
- ↑ Baugh, Albert and Cable, Thomas. 2002. The History of the English Language. Upper Saddle River, New Jersey: Prentice Hall. pp. 158-178.
- ↑ Transactions and proceedings of the New Zealand Institute, Volume 34, (New Zealand Institute., 1902) pp. 135-145.
- ↑ Gramley, S., Gramley, V., & Pätzold, K. M. (2020). A survey of modern English. Routledge.
- ↑ Lutz, A. (2013). Language contact and prestige. Anglia, 131(4), 94-122.
拎[編輯]
- （英文） 點解 cow 會變咗 beef 嘅呢？；呢篇文講英文點解「某動物嘅肉」唔係叫「XX 肉」咁簡單，而係會有 cow（牛乸）對應 beef（牛肉）或者 pig（豬）對應 pork（豬肉）咁嘅變化：指動物嘅字詞（平民化字詞）源自日耳曼語言，而指肉食（古時係達官貴人先食得起嘅嘢）嘅字詞（「高檔」字詞）就係嚟自羅曼語言嘅。