人牆定位噴霧

喺2014年FIFA世界盃嘅瑞士同厄瓜多爾打嘅比賽入面，球證喺厄瓜多爾隊開嘅罰球嗰陣用咗人牆定位噴霧。

人牆定位噴霧（粵拼：jan4 coeng4 ding6 wai2 pan3 mou6）係大型足球比賽入面，球證成日用到嘅一種泡沫噴霧。噴條白界喺地下，等球證睇到個位，保證比賽公平。而一定時間之後，白界會冇咗。

史

其實最早同人牆定位噴霧有關嘅記載係喺20世紀80年代，由一間公司同波比查爾頓、重有英格蘭足協杯嘅球證——尼路米茱利負責搞嘅嘢。不過嗰陣英格蘭足協杯唔受呢啲嘢，即使係用喺個場邊度噴都唔畀。包括埋Adidas嘅英國分公司都話唔會出呢啲噴霧產品。

而第一次真正用人牆定位噴霧喺比賽入面嘅，就係喺2000年嘅巴西國內聯合聯賽盃。呢隻噴霧嘅第一隻最成功嘅版本喺2002年，由一個阿根廷嘅企業家帕羅·斯路華發明出嚟嘅，佢嗌咗呢隻噴霧係「9-15」，但係，呢隻噴霧俾巴西嘅發明家——艾利雅·列馬喺2002年10月29號攞咗專利。就係因為噉，呢隻噴霧喺好多嘅國際足球比賽入面有用到。而呢隻噴霧嘅發展頂峰係喺2014年6月嘅世界盃入面用嘅「9-15」專業版本。

作用

呢種噴霧成日用喺罰球入面，球證喺搞緊罰球嗰陣用呢種噴霧，喺要褪後嘅位（9.15米以外）噴條白界出嚟，唔畀啲人牆向前過界，而呢條界喺噴咗出嚟之後嘅45秒就冇咗，唔會喺球場留低任何痕跡。而且呢隻裝備細到可以掛喺球證條腰度，重唔影響判決，而且呢種泡沫係冇毒嘅。

成分

人牆定位噴霧入面嘅液體係由差唔多80%嘅水同20%嘅丁烷嚟整嘅，而其他嘅表面活性劑方面，凈係用咗差唔多1——2％到。而喺個掣㩒低嗰陣，由於壓力嘅膨脹關係，丁烷就變成好似啲噴霧噉嘅細珠仔滴出嚟，重喺地面度出咗啲好似撳喺水嘅一笪泡泡噉，最後丁烷因為吸收咗空氣嘅熱量先至蒸發嗮。而呢樣嘢最先係俾美國佬攞咗專利。

比賽應用

呢隻噴霧喺以下呢啲足球大賽入面用咗：

• 2011年嘅南美解放盃（第一個大型聯賽用咗呢隻噴霧）
• 2012年喺日本辦嘅世俱盃
• 2013年喺土耳其辦嘅世青盃
• 2013年喺摩洛哥辦嘅世俱盃
• 2014年喺馬耳他同戈佐島入面辦嘅歐洲青年足球錦標
• 2014年巴西辦嘅世界盃（第一個世界盃賽用咗呢隻噴霧）

  呢個噴霧第一次出現喺世界盃嘅比賽就係2014年6月12號晚黑開幕嘅巴西同克羅地亞打嗰場，係由日本球證西村雄一用咗呢樣嘢。

睇埋

• 龍門線技術