人魚公主

出自維基百科,自由嘅百科全書
呢幅插圖描繪想像中「人魚公主攬住佢花園入面嗰個人類男仔雕像」嘅情境。

人魚公主》(丹麥文Den lille havfrue英文The Little Mermaid;兩個名就噉字面解,都係小美人魚嘅意思)係安徒生童話其中一個最出名嘅故仔,喺廿一世紀初可以話係家傳戶曉。

《人魚公主》主要係講一條美人魚追求愛情:個故仔講到小美人魚巧遇王子;對王子一見鍾情嘅佢為咗想同王子喺埋一齊,走去同女巫做交易,心甘情願放棄做人魚同賣咗自己嗰把甜美嘅聲;佢成功噉做到王子嘅密友,但王子始終對佢冇愛意;後嚟王子仲鍾意咗第個女人,而小美人魚同女巫講好咗,話如果佢唔能夠同王子成婚就要化為泡沫;最後嘅結局係點,就要睇係邊個版本-有啲版本係悲劇收場,講小美人魚最後化成泡沫死亡。

《人魚公主》有相當嘅文化影響力,有多次畀人改編做第啲媒體嘅作品,例子可以睇吓迪士尼嘅《小魚仙》。

劇情大綱[編輯]

睇埋:人魚同埋美人魚

以下係原版安徒生《人魚公主》嘅劇情大綱[1]

人魚之國[編輯]

喺好遠好遠嘅地方有一片。呢片海好藍好清澈,而且深到無論係幾重嘅船錨都落唔到底。喺呢片海底下嘅,就係人魚一族嘅王國。

人魚宮位於呢片海嘅最深處。人魚宮係一座用珊瑚起嘅雄偉宮殿,擁有者係人魚之國嘅統治者-人魚王。人魚王一共生咗六個女。人魚王嘅老婆死得早,所以呢六位公主係由佢哋嘅阿嫲湊大嘅。六位人魚公主都生得好靚,有好似波浪噉嘅長頭髮,當中年紀最細嗰個妹(小美人魚)係咁多位公主裏面最靚嘅。小美人魚唔只生得靚-佢仲有一把甜美無比嘅聲。佢每次唱親歌,全皇宮上下嘅人都會忍唔住過嗮嚟聽。

喺人魚宮嘅花園嗰度,每位人魚公主都有一笪佢專用嘅地。小美人魚喺佢嗰笪專用地種咗啲好似太陽咁紅嘅海底花,仲擺咗一座大理石,座雕像描繪嘅係一個生得好俊朗嘅人類男仔。座雕像係佢喺一架沉船度搵到嘅-因為小美人魚自細就好嚮往人類嘅世界。

不過,小美人魚冇得去親眼睇人類世界。噉係因為人魚之國有個習俗,就係 15 歲以下嘅人魚一律唔准上海面,而一條人魚喺佢嘅 15 歲生日嗰日,就可以上水去見識上面嘅世界。小美人魚啲家姐逐一噉過 15 歲生日,而且次次上完水都會返落去人魚宮,同屋企人大講佢嘅經歷,小美人魚聽佢啲家姐講到人類造嘅各種事物-好似係沿海城市音樂教堂呀噉,又聽佢哋講到日落嘅景色係幾咁hyun3爛,當中三家姐不溜都係六姊妹當中最大膽嘅,佢仲游咗入河深入陸地,睇到山同森林。

小美人魚一邊聽,就一邊希望自己嘅 15 歲生日快啲到。

十五歲生日[編輯]

小美人魚就係噉樣等吓等吓,終於等到佢 15 歲生日嘅大日子。佢坐定定畀阿嫲幫佢打扮咗陣,就有咁快得咁快向上游。

小美人魚上到水面嗰陣,太陽經已落咗山。佢見到附近有架船,船上面有人奏緊音樂,仲有人喺度唱歌,好似好熱鬧噉。滿心好奇嘅小美人魚就游埋去,想睇吓班人類搞緊乜。原來架船係屬於一位王子嘅,王子喺船上搞緊生日會慶祝佢嘅生日。王子生得好靚仔,小美人魚睇睇吓就不自覺噉鍾意咗王子,佢仲一路喺度睇佢哋慶祝,睇到深夜都仲唔捨得走。

點知喺呢個時候,周圍嘅海面開始颳起強風-有風暴嚟緊。班人類感覺到風暴,就嘗試將船駛返去陸地,但係風暴好勁,勁到打沉咗架船。小美人魚望住王子跌落水,起初覺得興奮,諗住可以趁機接近王子,但下一刻佢就開始擔心-因為佢突然醒返起阿嫲話過

「人類唔似得人魚噉能夠喺水裏面呼吸,佢哋沉落海嘅話會浸死。」

小美人魚嗱嗱聲游向不醒人事嘅王子,將佢拉返上海面,然後佢就同王子一齊隨住大浪飄流。

到咗第二朝風暴散咗,太陽慢慢噉升起,小美人魚拉住暈咗嘅王子喺海面飄流。飄飄吓飄到去一個沙灘。王子昏迷不醒,但仲唞緊氣。過咗冇耐,小美人魚聽到教堂鐘響,見到有班人類女仔喺附近行過,於是佢就快速爬返入海。小美人魚一路游返出海,一路離遠睇到班女仔發現王子。

小美人魚唔知嘅係,王子跟住就醒返,仲以為自己係畀嗰班人類女仔救返嘅。

人魚變人類[編輯]

海女巫:「小美人魚,我清楚知道你想要啲乜。」

返咗人魚宮之後,小美人魚一路都對王子念念不忘,仲喺佢家姐嘅幫助之下搵到王子住嘅海邊宮殿。自此之後,小美人魚一得閒就會游去海邊宮殿睇王子。佢唔單只見到王子,仲成日見到王國嘅漁民出海捕漁,啲漁民言談之間時不時會提起王子,講到王子幾咁好人。小美人魚對王子愈嚟愈著迷。次次返到人魚宮就勁喺度向家姐同阿嫲問有關人類嘅問題。

「阿嫲,如果一個人類唔浸死,佢會唔會一路生存落去?」
「人類同我哋一樣會老死。佢哋條命仲短過我哋好多添,唔似得人魚噉閒閒哋 300 歲命。不過,人類有樣嘢係勝過我哋嘅-佢哋有不滅嘅靈魂,死咗之後有可能上天堂,但人魚冇靈魂,死咗之後只會變泡沫。」
「我有冇方法可以變到好似人類噉有靈魂?」
「有。如果有個人類真心愛上你,噉你就可以分享佢個靈魂。但呢樣嘢冇可能發生,人類啲 tei1 si2 好差,佢哋鍾意伴侶有腳,唔鍾意伴侶下半身係魚。」

小美人魚望住自己條魚尾,即刻冇嗮心機。

小美人魚好渴望想同王子喺埋一齊,於是就走去搵海女巫。海女巫知小美人魚想要乜,就提出以下嘅交易:

「我識整一隻秘藥,隻秘藥可以將你下半身變成人類噉嘅樣。如果你肯將你嗰把甜美嘅聲畀咗我,我就會幫你整呢隻秘藥。
不過要諗清楚。你飲隻藥落肚嗰陣,會覺得好似個肚畀劍捅到噉,然後你條魚尾就會變成兩條人髀,你對髀會好靚好靈活,但你每行一步路,都會感覺好似有把刀一嘢插落你腳板度噉。你冇得變返人魚,一定要同王子結婚分享佢嘅靈魂,如果佢娶第個女人,你就會變成泡沫死亡。你制定唔制?」

小美人魚一聽到,即刻面都青埋,但係佢諗返起王子,就答:

「我制。」

交易成立。海女巫郁手煲秘藥,仲攞刀切咗小美人魚條脷落嚟-小美人魚今後冇得再講嘢或者唱歌。心情沉重嘅小美人魚攞住秘藥,返去人魚宮嘅花園行咗陣,喺內心同屋企人道別,就向上游。小美人魚趁夜游去王子嘅海邊宮殿,佢爬上宮殿嘅階梯,然後就將秘藥飲落肚。一如海女巫所講,小美人魚感受到劇痛,覺得好似有把劍一嘢捅入佢個肚噉,痛到佢當場暈低。

等到小美人魚醒返嗰陣,太陽已經出咗嚟。佢一擘大眼就見到王子,跟住又發現自己條魚尾變咗一對人髀。王子同在場嘅眾人畀小美人魚嘅美貌同高雅舉止吸引咗,見佢楚楚可憐噉就決定收留佢。

小美人魚啞咗講唔到嘢唱唔到歌,但佢發現自己對髀真係好靚好靈活,跳起舞上嚟舞姿好優美-佢每跳一步,都覺得隻腳板好似畀刀插咁痛,但佢一心想氹王子就忍住劇痛嚟跳。唔使幾耐,皇宮上下都開始鍾意佢,幫佢改咗個名叫 foundling-大致係被發現嘅細路噉解。王子對小美人魚愈嚟愈有好感,帶咗佢周圍去玩,仲會同佢講心事。

不過,王子始終冇打算娶小美人魚做老婆。王子噉同佢講:

「你喺我心目中好寶貴,但我已經心有所屬。我只能夠愛嗰個救返我條命嘅女仔。」

小美人魚啞咗,冇辦法出聲話畀王子知沉船嗰晚發生咗乜事。

過咗一排,王子嘅父王同母后開口,想王子娶鄰國嘅一位公主做老婆,仲安排咗王子同嗰位公主見面,小美人魚同多位僕人都會跟埋佢去。初頭王子不以為然,點知佢一到步見到嗰位鄰國公主,就即刻面露喜色:

「係佢喇!就係佢救咗我條命!」

-咁啱得咁橋,嗰位鄰國公主就係當日喺沙灘上面發現王子嘅人類女仔。王子即場對鄰國公主表達愛意,仲成埋婚。

小美人魚一路幫眾人手準備婚禮,一路感到自己個心好似要裂開噉。

最尾嘅結局[編輯]

呢幅插圖描繪小美人魚嘅五個家姐嚟咗,帶埋女巫把匕首畀佢。

喺王子同公主結婚嗰晚,眾人坐船出海慶祝。小美人魚喺慶祝會上面跳舞助慶,一路跳一路感受到腳板同心嘅劇烈痛楚。

慶祝完咗之後,眾人去嗮睏覺。小美人魚一個人喺甲板上面望海,佢諗返起佢為咗王子承受嘅一切痛楚,同時又知自己就快要死,覺得好絕望。點知喺呢個時候,佢見到佢班家姐出咗嚟海面,亦留意到家姐啲頭髮剪到短嗮-原來家姐同海女巫做咗交易,佢哋將自己又長又靚嘅頭髮剪咗落嚟送畀海女巫,換嚟一把有魔法嘅匕首

「海女巫話,只要你將把匕首插入王子嘅心臟,畀王子嘅血滴落你對腳板度,你就可以變返人魚唔使死喇!」

小美人魚接過把匕首,然後佢就靜靜雞行埋去睏緊覺嘅王子同公主身邊。佢知道自己如果想生存就要郁手。下一刻,小美人魚揸實把匕首... 然後就將把匕首掟咗落海-佢真心愛王子,唔忍心郁手殺佢,決定乖乖哋等死。過咗冇幾耐,太陽開始升起。小美人魚感覺到自己身體開始溶化變成泡沫,於是就mei1埋眼準備迎接死亡。

出乎小美人魚意料嘅係,佢瞇埋咗對眼好耐都仲未感覺到死亡,就擘返大對眼。佢發現自己變咗做一個靈體。佢眼前有一班靈體,班靈體話自己係風之女[註 1]:風之女同人魚一樣冇靈魂又可以有 300 年命,但係佢哋可以靠住做善事嚟得到靈魂,最後上天堂。小美人魚出於真愛而做出嘅無私之舉打動咗佢哋,所以小美人魚可以變做風之女,靠住做 300 年善事嚟上天堂。

小美人魚知道自己可以得到靈魂就好開心。同時王子同公主睏醒,周圍搵小美人魚(人類睇唔到風之女)。變咗靈體嘅小美人魚上前sek3咗公主一啖,亦喺心入面祝福呢對新人。

最後,小美人魚就跟住一眾風之女飛咗上天。

文化影響[編輯]

喺 1909 年一齣芭蕾舞劇入面,呢位女芭蕾舞者飾演小美人魚。
內文:小魚仙美人魚像

到咗廿世紀,《人魚公主》已經成為咗安徒生童話當中最出名嘅故事之一,成日都畀人改編做芭蕾舞劇或者電影等媒體嘅作品。例子有:

  • 1989 年嘅迪士尼電影《小魚仙》一度風靡全球。套戲啲情節係基於《人魚公主》嘅,不過攞走咗一啲畀人覺得唔啱細路睇嘅部份。例如套戲都有講到小美人魚飲秘藥化成人身,但就唔似得原作噉講到小美人魚「覺得好似自己個肚畀劍捅到」或者「每行一步路都好似腳板畀刀插」-呢啲內容畀好多人認為係太暴力,會令細路不安[2]
  • 安徒生係喺丹麥哥本哈根逝世嘅,而喺廿一世紀初嘅哥本哈根嗰度有一座美人魚像,件作品出於 1913 年,個諗頭就係嚟自《人魚公主》嘅。座雕像舉世聞名,年年都吸引到好多遊客去哥本哈根睇同影相[3]

... 呀噉。

寫作批評[編輯]

睇埋:解圍之神同埋伏筆

原版《人魚公主》最尾嗰段情節廣受批評。

有唔少創意寫作方面嘅工作者主張,「小美人魚變成靈體」嗰段情節完全係夾硬嚟。根據呢種觀點:《人魚公主》嘅情節已經寫到好似一齣典型嘅悲劇,講一個有缺憾主角做咗錯誤嘅決定,個決定最後引致悲慘嘅下場-喺個故仔當中,小美人魚做咗個極之衝動嘅決定,佢為一個三唔識七嘅男仔而攞自己條命去搏,個決定最後搞到佢面臨「王子娶咗第個女人,自己淨係可以等死」噉嘅困境。不過安徒生並冇將個故仔寫做悲劇結尾,而係講小美人魚喺最後一刻畀不知名嘅力量打救[註 2],脫離咗個故仔「應有嘅結構」。事實上有唔少故仔書都會攞走「小美人魚變成靈體」嗰一段,結局講小美人魚變成泡沫消失[4]

睇埋[編輯]

註釋[編輯]

  1. 風嘅女。可以睇埋元素精靈
  2. 可以睇吓 Deus ex machina 嘅概念。

[編輯]

  1. THE LITTLE MERMAID.
  2. "The Little Mermaid"—dive into the differences among the two Disney films and the original fairy tale. Audible.
  3. Travelling Little Mermaid to resurface in Copenhagen by video. The Independent.
  4. "Summary of Jacob Bøggild & Pernille Heegaard: "H. C. Andersens 'Den lille Havfrue' - om tvistigheder og tvetydigheder" ["Ambiguity in Hans Christian Andersen's 'The Little Mermaid'"]". The Hans Christian Andersen Centre. University of Southern Denmark, Institute of Literature, Media and Cultural Studies. Archived from the original on 4 April 2016.

[編輯]