天下太平
天下太平係透過猜包剪揼進行嘅紙上遊戲之一，可以兩個人對玩。
玩家需要預備白紙、鉛筆同擦膠。喺紙上面劃方格，作為堡壘。然後就可以開始猜包剪揼。每猜贏一次就可以喺自己嘅領域入面新增設施，遊戲初段玩家喺方格入面寫上「天下太平」四個字，然後第二階段係插旗（最多三枝），第三階段係建立保護罩（最多五層），最後就可以加入大炮或者戰機，或者去攻擊對方嘅設施，又或者修復自己嘅設施。當其中一方嘅旗幟、保護罩及堡壘全部消滅，佢就算輸。
天下太平係1970至1990年代香港嘅小學好興嘅遊戲，每逢小息或者放學，就會有同學玩。亦都有啲比較曳嘅同學，重會喺堂上同隔籬同學趁先生睇唔到嗰陣靜雞雞玩。
由於規則嘅變化空間大，呢種遊戲衍生出多種唔同嘅玩法。可以三個人同時玩；可以更改遊戲中嘅事物同文字，將堡壘改寫為「天下大亂」，將武器改為其他古靈精怪嘢，尤其係有啲性好奇嘅同學會將佢哋改為同性有關嘅嘢，遊戲就變成「鹹濕版」。
相關產品
[編輯]天下太平大戰（iPhone 遊戲）
[編輯]
EC2 Hong Kong 公司喺 2010 年開發咗一個叫天下太平（Tinha War）嘅 iPhone 程式。除咗原有嘅「猜包剪揼」傳統模式，亦加入嶄新嘅「天下太平大戰」模式。
- 故事模式，有各種關卡
- 玩家有等級，經驗值，能力值（攻擊、體力、命中率、回避率）
- 玩家可使用必殺技，調整能力
- 地圖有障礙物同埋回避率
- 各關卡都有唔同任務，敵軍有唔同性格
- 強力登場角色例如勇者、公主、黑騎士、魔獸等。
- 網上全球排行榜
「天下太平大戰」同原作一樣，可以自己畫士兵，亦可以從照片生產士兵。但加入咗唔少嶄新元素例如行動力、國土、敵軍性格等。可以當作原作嘅伸延版本。