富豪B9TL
| 富豪B9TL Volvo B9TL |
|||
|---|---|---|---|
 香港九龍巴士一架富豪B9TL三軸巴士，配Wright車身  英國一架富豪B9TL兩軸巴士，配東蘭開夏Olympus車身 |
|||
| 製造廠 | 富豪 | ||
| 邊道出 | 瑞典 | ||
| 取代咗 | 富豪超級奧林比安 富豪B7TL |
||
| 製造年份 | 2002年— | ||
| 主要對手 | 丹尼士三叉戟2型（Enviro 400） 丹尼士Trident E500（Enviro 500） Optare Olympus Scania K310UD Scania N230UD/N270UD Scania OmniCity Wright Gemini 2 DL |
||
| 規格 | |||
| 闊 | 2.5米、2.55米 | ||
| 引擎 | 富豪D9A/D9B | ||
| 波箱 | Voith DIWA ZF Ecomat/EcoLife |
||
富豪B9TL（Volvo B9TL；富豪巴士官方網頁一度稱之為Volvo Olympian）係瑞典富豪出嘅一款低地台雙層巴士，2002年起生產。佢首先取代富豪超級奧林比安，之後取代埋富豪B7TL。
目錄 |
[編輯] 設計
富豪B9TL嘅設計同B7TL差唔多，佢有可以調校升降嘅前獨立避震（出咗幾年後唔再用獨立避震），散熱水箱係擺喺引擎室右邊，不過引擎係由雷諾貨車設計，容量9.36升。
B9TL最初只係得三軸版，喺2006年為咗取代B7TL而推出兩軸版。佢可以配富豪D9A歐盟三型引擎（最大輸出馬力300匹或340匹），後來改配富豪D9B歐盟四型/歐盟五型引擎（最大輸出馬力260匹或310匹），而波箱係Voith或ZF造。
三軸版B9TL可以喺前軸或者全部三條車軸用美國鋁業（Alcoa）車轆。
[編輯] 香港
[編輯] 九龍巴士
首架B9TL樣辦巴士喺2003年7月運到香港，用嚟測試九巴嘅「全環保巴士驅動系統」（Eco-driveline）。架車配澳洲Volgren車身，用曲樓梯、富豪D9A引擎（300匹）同埋ZF六前速波箱。巴士喺2004年3月完成首次登記，車隊冧巴係AVD1，同年4月投入服務。初期行西隧巴士線905，其後改行42C及30X線。
AVD1個車牌喺同年12月15號到期之後，12月21號運去澳洲。2005年8月，AVD1帶住一副富豪D9B歐盟四型引擎（310匹）同埋AdBlue缸返香港。巴士喺2006年2月重新登記，5月同同樣配符合歐盟四型環保標準引擎嘅亞歷山大丹尼士Enviro 500一齊投入服務。
2004年初一架配改咗車嘴設計嘅TransBus Enviro 500嘅B9TL樣辦巴士到港（後來成為唯一一架配其他廠商底盤嘅TransBus Enviro系列巴士），同年稍後一架配改咗車尾設計嘅Wright車身嘅B9TL樣辦巴士到港。兩架巴士都係用富豪D9A引擎（300匹）同埋直樓梯，並喺2005年1月完成首次登記，2月8號晚投入服務。
九巴喺2005年初訂購25架Wright車身B9TL巴士，其中兩架係配樣辦車底盤，另外有一架喺英國參加完EFE Showbus 2005先至付運香港。巴士喺同年10月至2006年5月投入服務。
2005年底九巴再訂多88架B9TL巴士，其中38架配Wright車身，另外50架配亞歷山大丹尼士Enviro 500車身。配Wright車身嘅巴士喺2006年6月至11月投入服務，而配亞歷山大丹尼士車身嘅巴士喺2006年11月至2007年7月投入服務，後者嘅其中幾架喺投入服務前裝咗行李架。
2007年中九巴再引入35架配亞歷山大丹尼士Enviro 500車身嘅B9TL巴士，全部喺車尾冷氣槽位有倒車閉路電視。巴士喺2007年8月至2008年3月投入服務。
2009年5月九巴訂購60架配歐盟五型引擎嘅B9TL巴士，全部配Wright Eclipse Gemini 2車身[1]，冇耐之後再訂多115架，2010年又再訂多115架。頭61架喺2010至2011年出。
九巴喺2010年引入1架配Wright Eclipse Gemini 2車身嘅兩軸B9TL巴士，架車喺2010年8月到港，之後因為太重等原因而要做修改，去到同年12月尾至攞牌。
[編輯] 龍運巴士
龍運巴士喺2007年中引入10架B9TL巴士，全部配ZF 6HP592C波箱同埋下層有行李架，其中9架係配普通座椅，1架係配客車座椅。巴士喺2007年7月至2008年3月投入服務。
[編輯] 城巴
城巴喺2010年引入1架配Wright Eclipse Gemini 2車身嘅兩軸B9TL巴士，架車喺2010年7月尾到港，但因為架車太重等原因而要做修改，去到同年11月尾至攞牌，12月中至開始載客。
[編輯] 英國
英國Weavaway Travel率先喺2004年底訂購6架配單門版東蘭開夏Nordic車身嘅三軸版B9TL巴士，巴士喺2005年4至5月投入服務。
2006年7月，一架配Wright Eclipse Gemini車身嘅兩軸版B9TL樣辦巴士加入倫敦嘅London General巴士公司試行（已經喺2009年左右調走）。英國首批兩軸版B9TL巴士係由Delaine Buses訂購，為數兩架，配全新嘅東蘭開夏Olympus車身，其中首架巴士連同一架配亞歷山大丹尼士Enviro 400車身嘅兩軸版B9TL樣辦巴士（油咗Arriva色）一齊喺2006年11月搞嘅Euro Bus Expo車展展出。
2007年起，有更多兩軸版B9TL巴士喺英國投入服務，其中第一集團同埋Lothian Buses買得多啲。不過B9TL喺倫敦就因為散熱水箱噪音等問題而俾管理倫敦交通嘅Transport for London禁止用嚟行倫敦合約巴士線（去到2009年先至完），因此初時喺倫敦行嘅B9TL唔多，兼且多數都係行觀光線，去到2009年底先至多返。
現時英國嘅兩軸版B9TL巴士可以配Wright Eclipse Gemini 2車身，另有少部分係用亞歷山大丹尼士Enviro 400或者MCV DD103車身，以前亦可以配Wright Eclipse Gemini（已經俾Wright Eclipse Gemini 2取代）或者東蘭開夏/Darwen/Optare出嘅Olympus/Visionaire（後者係開篷車身，兩隻車身都喺2011年停產）。而三軸版最初配單門版東蘭開夏Nordic車身，其後改用Darwen/Optare Olympus或Optare Visionaire車身。
[編輯] 愛爾蘭
愛爾蘭都柏林嘅Dublin Bus喺2005年訂購20架配Enviro 500車身嘅富豪B9TL巴士，巴士喺2005年12月至2006年初投入服務。
後來都柏林巴士公司訂購50架配Enviro 400車身嘅兩軸版B9TL巴士同埋50架配Enviro 500車身嘅三軸版B9TL巴士，2007年/2008年付運。大部分兩軸版B9TL巴士喺2007年下半年投入服務，而三軸版B9TL巴士喺2007年12月至2008年投入服務。後來都柏林巴士公司再引入100架兩軸版B9TL巴士，50架配Enviro 400車身，另外50架配Wright Eclipse Gemini車身，巴士喺2008年底至2009年初投入服務。
Bus Éireann喺2008年底引入10架配Wright Eclipse Gemini車身嘅兩軸版B9TL巴士，2012年引入10架改配Wright Eclipse Gemini 2車身嘅同款車。
另外亦有幾間小規模巴士公司買入兩軸版B9TL巴士。
[編輯] 新加坡
新加坡嘅新捷運訂咗200架配富豪D9A引擎同埋新加坡康福德高工程私人有限公司（ComfortDelGro Engineering）車身嘅B9TL巴士，佢哋亦係新捷運首批可以畀輪椅上落嘅巴士。首架新車喺2006年2月公開亮相，新車喺2006年6月至2007年投入服務。
新捷運喺2009年8月宣佈訂150架配D9B歐盟五型引擎同埋Wright車身嘅B9TL巴士，2010年再訂多300架同款車[2]。第一架喺2010年9月出。
[編輯] 歐洲大陸
有多架兩軸版B9TL開篷巴士已經賣咗去歐洲大陸多個城市作觀光用途。而西班牙嘅Unvi同埋Castrosua公司亦有為B9TL設計單層巴士車身。
[編輯] 參考
[編輯] 出面網頁
|
||||||||||||||
