底層形式

底層形式（粵拼：dai2 cang4 jing4 sik1）係音系同構詞上嘅一個概念。

概論

音系嘅一個重要課題係有關「人腦裡便發生緊咩事」：想像而家有一個人用粵語（或者是但攞一隻語言）發出幾段音節；佢要喺個腦入便處理想講嘅內容以及要發出嘅語音，然後佢個腦將呢啲資訊傳去佢聲道啲肌肉，指揮佢嘅聲道做出適當嘅郁動發出語音；噉就自然引起咗一啲問題—

• 攞住兩個音節，兩段音節啲音素聽落完全一樣。
• 原則上，佢哋都會各自喺講嘢嘅人個腦入便有個對應（底層個樣）。
• 而家已知兩個音節實現咗嗰個樣係一樣嘅，但係佢哋底層形式有冇可能唔同呢？

好似語流音變等嘅現象表示，兩段原則上音素唔同嘅音節，有可能因為語流音變嘅緣故而變到冇咗差異（中和）—明明係彼此之間有差異嘅音素，可能喺某啲環境下會冇咗差異。

例子

幾個俄文字詞嘅變化

意思	主格單數	屬格單數
汽車	/avtomobilj/	/avtomobilja/
森林	/les/	/lesa/
死屍	/trup/	/trupa/
時間	/ras/	/raza/
眼	/glas/	/glaza/

而家又考慮吓俄羅斯話裡便嘅文法格。

俄羅斯話同好多歐洲語言一樣，有文法格呢家嘢，簡單講即係話一隻字詞要視乎佢喺句子入便扮演咩角色（係主語定賓語等）而變樣。依家睇睇俄羅斯話啲名詞點樣變化—首先好明顯嘅係，俄羅斯話要將一隻單數名詞由主格變做屬格，唔淨只係「加 -a 喺隻字詞最尾」咁簡單，「喺隻字詞最尾加 -a」呢條簡單嘅法則適用於好多字詞，但某啲字詞（例如時間同眼）就明顯唔係跟呢條簡單法則嘅，而且呢種變化嘅法則仲頗為複雜—例如時間同眼兩者都係尾個輔音由 /s/ 變 /z/（將 /s/ 變成佢個濁音版本），但森林都係 /s/ 做尾又唔見佢有噉嘅變化。噉即係話「表示隻字詞變咗屬格」嗰一截形態素，可能以唔同嘅音素出現（語音交替）。

睇埋

• 語音組合