語言學

語言學，係一門研究人類語言嘅一種科學。語言學係人類學其中一個分支。而研究呢門學問嘅，就叫做語言學家。

現代語言學嘅目的，係將人類嘅語言好客觀噉做記述。所謂記述就係將現有語言嘅法則同埋性質，用語言資料做準嘅記述。 就好似物理學家會諗，點解蘋果會噉樣跌落黎一樣，語言學家就會諗點解某樣野會用某一個方法去講。 另外，現代語言學並唔理一種語言嘅優劣。起碼語言之間並冇特別嘅優劣嘅分別係語言學嘅大前提。以前有人以為語言嘅進化同埋社會發展、文明程度有關係，但係後來因為理解到任何語言都有番咁上下嘅複雜性，所以現代語言學否定咗語言上有進化呢回事。正因為噉，世上並唔存在所謂野蠻嘅語言又或者高級嘅語言。而家嘅語言學認為所有語言喺同自己嘅語言社會有密切關係嘅同時，亦可以適應社會溝通上嘅需要。

分類

語言本身嘅結構，其實就係將聲同意思做嘅配對。但係由聲音去到意思，可以細分做幾個範疇。

• 語音學：對人所發出嘅聲音嘅研究
• 音韻學：對語音之間嘅規律嘅研究
• 形態學：對詞嘅內部結構嘅研究
• 句法學：探討啱文法嘅句子點樣由字組成
• 語意學：對字嘅意思嘅研究，同時會探討埋點樣由字嘅意思夾埋變做成句句子嘅意思
• 語用學：探討喺唔同環境底下，人點樣表達同理解語言嘅字面同埋背後嘅意思

上面嘅分類並唔係所有語言學家都認同，而每一個細類之間亦都有相當多嘅重疊。

歷史

語言貉嘅歷史好耐。啲人初初嘅語言研究自從古代歷史已經開始咗，因為佢同古代哲學，歷史同埋文學有關。喺中國史上語言學出現喺訓詁學。喺古印度同埋古希臘公元前4世紀到3世紀已經有咗當地嘅語法學。