語言學

出自維基百科,自由嘅百科全書
跳去: 定向搵嘢

語言學,係一門研究人類語言嘅一門科學。語言學以前係人類學或者符號學其中一個分支,但係宜家已經成為咗一門獨立嘅科學。而研究呢門學問嘅,就叫做語言學家

現代語言學嘅目的,係對人類嘅語言作出客觀嘅記述。所謂記述就係將現有語言嘅法則同埋性質,用語言資料做準嘅記錄。就好似物理學家會諗點解蘋果會噉樣跌落黎一樣,語言學家會諗點解某種語言會用某一個方法去講某一樣嘢或者某一件事。

另外,現代語言學嘅一項重要原則同埋大前提,就係唔可以先入為主咁認定某種語言係「上等語言」或者「劣等語言」。以前有人以為語言嘅進化同埋社會發展、文明程度有關係,但係後來因為理解到任何語言都有番咁上下嘅複雜性,所以現代語言學否定咗語言上有進化呢回事(但係語言演變就依然係不爭嘅事實)。而家嘅語言學認為所有語言都唔單止可以滿足社會溝通嘅需要,重係文化嘅載體。

分類[編輯]

語言本身嘅結構,其實就係將聲同意思做嘅配對。但係由聲音去到意思,可以細分做幾個範疇。

  • 語音學:對人所發出嘅聲音嘅研究
  • 音韻學:對語音之間嘅規律嘅研究
  • 構詞學:對詞嘅內部結構嘅研究
  • 句法學:探討啱文法嘅句子點樣由字組成
  • 語義學:對字嘅意思嘅研究,同時會探討埋點樣由字嘅意思夾埋變做成句句子嘅意思
  • 語用學:探討喺唔同環境底下,人點樣表達同理解語言嘅字面同埋背後嘅意思

其他分類[編輯]

  • 歷史語法學:或者叫「歷時語言學」,研究某一種語言從歷史上語法結構發展演變忌學科;
  • 比較語法學:研究各親屬語言語法結構之間嘅關係同互相影響,同埋確定各種語言之間嘅親屬關係嘅學科;

歷史語法學亦都從屬於歷史語言學,比較語法學亦從屬於比較語言學,描寫語法學亦從屬於共時語言學,歷史語法學、比較語法學、描寫語法學都係交叉學科

上面嘅分類並唔係所有語言學家都認同,而每一個細類之間亦都有相當多嘅重疊。

歷史[編輯]

語言學嘅歷史好耐。啲人初初嘅語言研究自從古代歷史已經開始咗,因為佢同古代哲學,歷史同埋文學有關。喺中國史上語言學出現喺訓詁學。喺古印度同埋古希臘公元前4世紀到3世紀已經有咗當地嘅文法學

說明性 vs. 描述性[編輯]