德國殖民地

德意志帝國殖民地分佈

德意志帝國殖民地由荷亨佐倫王朝嘅德意志帝國喺19世紀後期建立。德國統一之前，一啲德意志政權都曾經短暫建立過殖民地。

歷史

16世紀，奧格斯堡嘅銀行世家安東·韋爾瑟（Anton Welser）同埋巴爾托洛梅斯·韋爾瑟（Bartholomeus Welser）（韋爾瑟家族）就嘗試喺今日委內瑞拉嘅地方建立殖民地。1528至1556年，德意志人喺委內瑞拉領土有一啲特權（睇德意志開拓美洲）。1685年10月5號，布蘭登堡（後成為普魯士王國）得到而家毛里塔尼亞海岸上嘅阿爾金島（Arguin Island），重喺1701年成為普魯士嘅殖民地，但係喺1721年3月7號俾法國搶咗。

17世紀，一啲德意志邦國都短暫擁有過殖民地。布蘭登堡嘅布蘭登堡-非洲公司 (Branderburgisch-Africanische Kompagnie) 得到阿爾金島、普魯士黃金海岸（後來併入荷蘭黃金海岸，喺而家迦納）同埋聖湯瑪斯島（Saint Thomas；今屬美屬處女群島）。波羅的海德意志人領導嘅庫爾蘭（Courland）公國亦都喺多巴哥島同聖安德魯島（今日甘比亞詹姆斯島）建立殖民地。然而，所有德意志邦國都未能同西歐嘅海洋強國競爭。同樣地，哈布斯堡王朝當時統治神聖羅馬帝國嘅奧地利省份——只有佢喺南尼德蘭經營嘅Ostender-Kompanie 喺印度短暫擁有科羅曼德爾海岸（Coromandel Coast）同安達曼-尼科巴群島（1719-1732年），後來因法國反對而放棄領地。

德國只係喺1871年由大陸國家普魯士王國統一，故此佢比西方國家更遲走上帝國主義、爭奪殖民地嘅道路 （所謂「太陽下的位置」）。1870年前，德意志邦國保持獨立政治體制同目標；而德國統一前後嘅外交政策，包括奧托·馮·俾斯麥嘅政策，都集中喺解決「德國問題」，純粹追求德國喺歐洲嘅利益。另外，德意志人嘅海外貿易其實源遠流長，早喺漢莎同盟時期開始；德意志人都有移民傳統：東至俄羅斯同羅馬尼亞；西至北美洲；德意志北部嘅商人同傳教士，都有興趣到海外發展事業。

19世紀末，好多德國人都認為，爭取殖民地可以顯示國力，又夢想建立公海艦隊——呢個夢最終願望成真，並令英國感到受威脅。

由於德國太遲加入爭取殖民地嘅行列，佢面對嘅世界，大部分地區都已經俾其他歐洲強國瓜分；喺一啲地區，甚至已經開始去殖民化，例如美洲諸國。美國革命、法國大革命同拿破崙戰爭都加速美洲國家獨立。

1904年，德屬西南非洲（今日納米比亞）嘅赫雷羅人（Herero）起義，俾德軍打敗。德軍其後發動種族滅絕，殺咗幾萬名當地嘅赫雷羅人同納馬人（Nama；舊稱Namaqua）。

一戰期間（1914-1918年），同盟國解散德國嘅殖民帝國，並重新分配領土，依據包括戰後簽署嘅凡爾賽條約。

根據巴黎和會定下嘅條約，日本得到加羅林群島同馬里亞納群島；法國得到多哥同喀麥隆；比利時得到部分德屬東非；而英國就得到德屬新畿內亞、納米比亞、部分德屬東非同薩摩亞。英國得到嘅領土，好多都併入英聯邦成員嘅領地，並成為佢哋獨立後嘅領土。

德國殖民地

德國正式擁有過主權嘅地方包括（斜體係德文名）：

• 太平洋
  • 西薩摩亞：1899-1914年
  • 德屬新畿內亞（Deutsch-Neuguinea），包括威廉皇帝領地（Kaiser-Wilhelms-Land）同鄰近海島：1884-1914年；政區包括：
    • 加羅林群島（Karolinen）：1889-1914年
    • 馬里亞納群島（Marianen）：1889-1914年
• 德屬東非（Deutsch-Ostafrika）：
  • 後來嘅坦噶尼喀（Tanganjika），今日屬坦桑尼亞
  • 盧安達同蒲隆地（Ruanda-Urundi）：1885-1917年
  • 維圖（Witu）：1885-90年，喺而家嘅肯雅
• 德屬西非（Deutsch-Westafrika）包括：
  • 喀麥隆（Kamerun）：1884-1914年
  • 多哥（Togoland）：1884-1914年
• 德屬西南非洲（Deutsch-Südwestafrika），今日納米比亞：1883-1915年

德國亦都喺中國擁有土地利益：

• 膠州灣（Kiautschou）保護領地，包括租借地青島（Tsingtau）：1897-1914年（原本租借99年）
• 山東勢力範圍
• 黃河（Gelber Fluss）流域勢力範圍

來源同參考

• Westermann, Großer Atlas zur Weltgeschichte
• WorldStatesmen.org