恒貞大押
恒貞大押（英文：Hang Jing Pawn Shop），係香港舊時一間當舖，喺九龍深水埗北河街141號，近住長沙灣道同深水埗站A1出口。當舖喺1940年代已經有經營，到2010年代初期執笠，原址之後轉租畀食肆。雖則當舖係戰前唐樓建築，古物古蹟辦事處未有對棟樓做過歷史建築評級。
史[編輯]
根據恒貞大押嘅門口招牌，當舖嘅東主叫「江英」[1]。喺20世紀中後期，恒貞大押喺區內當幾出名，但隨住香港經濟發展，典當業逐漸沒落，加埋東主後人已經移民到海外，無心再經營落去，恒貞大押喺2010年代初期執笠，丟空一排之後喺2016年11月搵工人清場[1]。
當舖舖位之後租咗畀「澳門陳光記燒味飯店」，喺2017年7月開業[2]。食肆嗰時將門面油上灰黑色，遮住咗原先「恒貞大押」紅色字樣。不過陳光記做咗兩年就未有再續租。到2020年3月，舖位由「基隆茶餐廳」承租，皆因東主覺得原先隻灰黑色太暗，所以就改油黃色，同時亦代表佢嘅政治立場係「黃店」，不過就惹嚟網上批評佢破壞原建築特色（批評者未必知道上一手租客已經破壞咗特色），東主就回應話會研究將正門嘅「恒貞大押」字樣填返紅色[2]，但一路未有付諸實行。