我是香港人連線
我是香港人連線（英文：Hong Konger Front），係一個主張香港獨立同埋倡議獨立意識嘅網站，喺2004年11月成立，認為「全民投票、獨立建國」應該係香港最終嘅理想。呢個網頁亦都提議香港效仿其他嘅去殖民化運動，即係要舉行公投嚟決定香港嘅未來[2]。我是香港人連線嘅關係伙伴係香港李登輝嘅友會，所以有建議去學習關於中華民國總統李登輝嘅思想[3]。
事件[編輯]
「我是香港人連線」網頁喺2004年11月1日註冊，喺創立期間撞正香港立法會議員張超雄提案香港喺普選嘅爭議上舉行全民公投。因為咁，所以北京有聲稱有香港人想搞「港獨」，同時話喺香港舉行嘅任何公投都係違反香港基本法。面對北京嘅指控，香港泛民主派再次澄稱香港冇人喺度搞港獨。2004年11月中，香港報章同埋美聯社報導咗「我是香港人連線」網站嘅出現。之後，2005年2月6日中新社發表評論員文章，指控我是香港人連線公然策動「香港獨立運動」，並且煽動網民加入。中新社指控「我是香港人連線」網站擺明寫出港獨嘅「理據」：聲稱「1997年是被中共吞併」；「中國政府視香港為殖民地」，話「香港特區政府是傀儡政府」；指責「《內地與港澳關於建立更緊密經貿關係嘅安排》是加強吮吸香港經濟成果」；提出「香港國」將會實行嘅政體、國歌、國旗等等代表獨立主權嘅符號；更加聲稱要透過網絡運動嚟發動輿論攻勢，讓「港獨」發芽，喺時機成熟嘅時候成立「香港國」[3]。
有報章指出「港獨」喺香港唔成氣候，但係亦有一啲媒體大張旗鼓嚟點名批判[3]。
評論[編輯]
有人話「我是香港人連線」有關香港獨立建國嘅政治主張，有可能因為觸犯中國喺2005年3月14日第十屆全國人民代表大會第三次會議通過嘅《反分裂國家法》而須要負上刑責。支持呢一個論據嘅人亦都認為：呢種鼓吹香港「獨立」，「違法亂紀之組織，吾人必須以刑法觀點論斷，而不應訴諸言論自由或學術自由考量而縱容此等歪理之蔓延。」
另外有言論話：由於香港人普遍都冇「獨立意識」，所以即使北京方面同香港官方冇對《我是香港人連線》網站發表任何有批評性質嘅言論，個網站嘅影響力都只係非常有限。反而，佢哋不斷咁批評，甚至間接咁為呢個網站做埋宣傳。亦有唔少人話呢個網站只係中國政府官員喺發表「公投等同港獨」嘅言論之後，網民作爲回應嘅「惡搞」網站。網站入面有部份內容都幾無厘頭，例如孫中山招兵買馬或者甘地嘅不合作運動等等，唔單只冇發生過，入面有啲内容，好似「香港人口是由多元種族組成，香港永久居民除華人佔大多數，尚包括四個少數族裔，即孟加拉人，高加索人，印度人及巴基斯坦人」、有個地圖將中國大陸稱為「支那豬（無主地）」等，根本就不符事實。除咗提倡香港獨立運動之外，網頁亦都鼓吹「東土耳其斯坦」（即係新疆）、「滿洲」、內蒙古、台灣、西藏、福建、廣東同埋吳越成為主權獨立嘅國家[4][5]。
有關嘅報道[編輯]
- 2004年11月16日 美聯社 [1] Wayback Machine嘅版面存檔備份
- 2005年2月6日 中新社 [2]
- 2005年2月7日 南華早報 [3]
- 2005年2月7日 蘋果新聞網 [4] Wayback Machine嘅版面存檔備份
- 2005年2月7日 文匯報 [5]
