方言連續體

1900 年嗰陣嘅德國話方言分區圖，色水表示區域，彼此之間地理上相近嘅德國話方言語言距離會低啲。

方言連續體fong1 jin4 lin4 zuk6 tai2（英文：dialect continuum）係一種語言現象。

概念

睇埋：互通程度同方言

而家想像有一笪地方，笪地同廣東差唔多一樣咁大，而笪地上面有 4 座大城市 A B C D，語言學家想對呢笪地方嘅語言做研究，於是佢哋就喺每座城市度搵咗班人返嚟，要佢哋做測試語言互通程度嘅實驗，佢哋結果發現

• A 話同 B 話有頗高相似度，兩隻變體大約 80% 互通；
• B 話同 C 話有頗高相似度，兩隻變體大約 80% 互通，但同時 B-C 差異冇 A-C 差異咁大，A-C 係得嗰 60% 互通；
• C 話同 D 話有頗高相似度，兩隻變體大約 70% 互通，但同時 A-D 差異極大，互通度係 0% 咁滯；

－呢種噉嘅情況，就係所謂嘅方言連續體。即係有一拃語言變體，彼此之間喺正隔離嘅變體有高嘅互通度，而地理上距離愈遠嘅變體互通度愈低，有部份嘅變體彼此之間互通度係 0% 咁滯；想像有個好有語言天份嘅人（假設佢乜語言都學到）去呢笪地方旅居，佢逐個逐個城市去住同遊歷，而假設佢去到每座城市都會喺幾日內學識當地講嘅話，然後就去隔離嗰座城市做同樣嘅嘢，佢唔會遇到任何一次「突然撞到隻佢完全聽唔明嘅語言」噉嘅情況，但如果佢攞去旅程起點同旅程終點嗰兩隻話嚟睇，嗰兩隻話好可能唔會有任何嘅互通度，好似德國話（分佈偏及德國、奧地利、瑞士以至比利時等多地）就被指有噉嘅情況。

睇埋

• 環狀物種