梅開二度
梅開二度係一句成語，意思即係話同一件事成功咁做到兩次。
典故[編輯]
呢句嘢其實係嚟自傳統戲曲嘅劇目【二度梅】，而呢齣戲曲係取材自同故事嘅古典小說；個典故係咁嘅：
- 話說喺唐朝唐德宗在位嘅期間，忠臣梅伯高一家人俾奸相盧杞陷害，搞到要滿門抄斬，得返個仔梅良玉一個走甩咗，後來佢化名叫王喜童嚟掩人耳目；佢一個人流落到街上面，飢寒交迫之際，好彩遇到陳日升（陳東初）將佢收留，陳日升唔知道佢嘅身世，只當佢係一般嘅可憐人，請咗佢返屋企幫手打理陳府嘅梅花園，先至唔使餓死街頭。
- 陳日升係梅伯高嘅同窗好朋友，當時佢俾盧杞迫害嘅時候，就係梅伯高救返，不過就係因為咁而搞到梅伯高同盧杞結下牙齒印，最後重搞到全家抄斬；陳日升因為咁而悲憤交雜，於是索性辭官唔撈，舉家歸隱楊州。
- 陳日升有個女叫陳杏元，生得國色天香，梅良玉去到陳家之後，兩個人就一見鍾情。
- 喺一個梅花盛開嘅日子，亦係梅伯高嘅忌辰，陳日升同埋屋企人一齊係屋企嘅梅花園度開壇悼念亡友兼恩人，點知忽然間天色大變，重發起大風雪，將啲梅花通通打爛晒，陳日升感慨自己能夠逃出生天，但係就連梅家嘅後人都救唔到，認為呢啲係上天對佢嘅警示，於是佢發誓除非梅花再次開花証明梅家嘅後人重喺世上，唔係嘅話就遁入空門，削髮為僧；佢個女杏元聽到咁，即刻上香誠心咁求上天令到梅花重開，點知佢哋嘅真誠真係感動到上天，梅花園嘅所有梅花樹都再次開花；後來陳日升知道咗原來喜童就係良玉，於是就將個女杏元許配畀佢。
- （故事詳情可以參考劇目【二度梅】，或者【陳杏元落院】……等等呢啲相關嘅戲曲）
因為呢段典故，所以就有「梅開二度」呢個成語嘞。
粵劇電影[編輯]
喺1957年10月，香港嘅東方影業公司亦都發表咗一部同名嘅粵劇電影，由當時嘅名導演馮志剛執導，何非凡、吳君麗、羅劍郎、陳好逑主演。