楊楚營
| 楊楚營 | |
|---|---|
| 女歌手 | |
| 原名 | 楊翠娟 |
| 羅馬拼音 | Yeung Chor Ying |
| 英文名 | Cindy Yeung |
| 別名 | 楊楚瑩 |
| 國籍 | .svg){kind=small} 英國國民（海外） |
| 民族 | 漢族 |
| 出世 | 1965年.svg){kind=small} 英屬香港 |
| 死 | 1986年2月23號 英屬香港 |
| 職業 | 歌手 |
| 語言 | 粵語、英文 |
| 音樂類 | 粵語流行音樂 |
| 出道地 | 英屬香港 |
| 出道作品 | 《十萬個明天》（1985） |
| 活躍年代 | 1985年到1986年 |
楊楚營（Cindy Yeung，1965年—1986年2月23號），又名楊楚瑩，原名楊翠娟，係香港女歌手，因1987年陽光檸檬茶電視廣告歌喺2017年3月突然做咗網民熱話[1]。
簡歷
[編輯]早年
[編輯]楊楚營家庭環境複雜，有一個細妹，好早就要輟學打工，早喺16歲就已經喺灣仔港灣道海港中心東海鐳射酒廊做駐場歌手。
出道
[編輯]楊楚營喺1985年參加國際青年香港流行曲創作邀請賽，同李中浩憑《十萬個明天》攞冠軍，但合唱後畀李中浩歌迷杯葛，唔畀兩人繼續搭檔。
後尾楊楚營畀音樂人林慕德發掘同佢簽約，準備幫佢出唱碟。佢亦唱過1986年由葉德嫻主演嘅電影《再見媽咪》主題曲《獨個成長》，隻歌都係林慕德創作。林慕德更諗住將本嚟為杜麗莎創作嘅《去吧！》同埋另一隻歌《媽媽 I Love You》交畀佢唱。
死
[編輯]楊楚營於1986年2月，突然死，楊楚營個妹楊依琳證實佢係喺跑馬地景光街22號四樓住所開煤氣自殺，根據傳媒報導，1986年2月23號下晝5點左右楊楚營三位男性友人上門探訪，但撳門鐘冇人應，又發覺有濃烈煤氣味由屋內傳出，消防員破門而入後發現楊倒臥大廳，被送往鄧肇堅醫院後證實不治，警方喺現場執到兩張字條，相信係死者嘅遺書，調查後認為死因無可疑[2][3]。個妹講楊楚營生前試過壓力爆煲哭訴話做歌星好辛苦，因為要學英文、學國語、李中浩嘅歌迷又杯葛佢，壓力大到唔識得點應付。
而《去吧！》喺楊楚營死後一年，即1987年做咗陳慧嫻嘅派台歌；《媽媽 I Love You》就喺1988年交咗畀肥媽主唱。
死後
[編輯]2017年3月，陽光檸檬茶推出30年前嘅復刻版包裝，令1987年陽光檸檬茶電視廣告歌重新畀人留意，而咁啱傳媒搵咗廣告歌嘅監製林慕德接受訪問，聲稱廣告歌歌手身份係楊楚營，令楊楚營突然做咗網民熱話。楊楚營個妹楊依琳接受《鴻鵠志－影視筆記》Facebook訪問澄清楊楚營唔係孤兒，亦喺Facebook留言話佢家姐無同李中浩拍過拖，只係唱歌伙伴同朋友，李中浩喺家姐生日有帶女朋友到場，另外佢喺蘋果日報留言話好嬲無口德嘅網民虛構家姐死因[4]。
另外前歌手盧昭明喺Facebook聲稱自己先係1987年陽光檸檬茶廣告歌主唱，盧昭明嘅亞視訓練班同學黃秋生相信盧昭明冇必要講大話[5][6][7]，陽光檸檬茶電視廣告錄音師朱偉文接受《鴻鵠志－影視筆記》Facebook訪問證實盧昭明係電視廣告主唱，出街只有盧昭明主唱版本，指林慕德指鹿為馬[8]。其後林慕德好肯定咁證實廣告出街版本一定係楊楚營唱；因為要sell幾個人俾廣告客戶，或者盧昭明係唱過其中一個version[9]。
參考
[編輯]註釋
[編輯]- ↑ 陽光檸檬茶-主唱楊楚營中三輟學養家-絕筆留言，香港01，2017年3月16號。
- ↑ 華僑日報《遺書開煤氣自殺女歌星香銷玉殞》-1986年2月24號第6頁
- ↑ 大公報《夜總會女歌星閨中自殺死去》-1986年2月24號第8頁
- ↑ 〈【檸檬茶廣告成絕唱】對楊楚營自殺有保留 作曲人林慕德：佢死時得17、8歲〉。原著喺2017年3月11號歸檔。喺2017年3月13號搵到。
- ↑ 〈盧昭明認《陽光》原唱 亞視訓練班同學黃秋生：唱嗰個一定記得〉。原著喺2017年3月26號歸檔。喺2017年3月26號搵到。
- ↑ 〈《陽光》廣告主唱非楊楚營？前歌手盧昭明現身：我先係原唱！〉。原著喺2017年3月23號歸檔。喺2017年3月23號搵到。
- ↑ 〈盧昭明先係《陽光》原唱？林慕德：幾乎醒唔起曾簽過呢個人！〉。原著喺2017年3月23號歸檔。喺2017年3月23號搵到。
- ↑ 獨家專訪87陽光 Yeung Gwong檸檬茶原唱
- ↑ 〈【陽光檸檬茶】林慕德為演唱會抽水？ 「我想為楊楚營伸冤」〉。《香港01》 (香港中文)。2017-06-15。
{{cite web}}: CS1 maint: url-status (link)