殺人鯨

殺人鯨 化石年代：上新世早期 - 而家
浮窺中嘅虎鯨 同人嘅 size 比
瀕危指標
資料唔夠 (DD)
物種分類
界 (Regnum): 動物界 門 (Phylum): 脊索動物門 綱 (Classis): 哺乳綱 目 (ordo): 鯨目 亞目 (Subordo): 齒鯨亞目 科 (familia): 海豚科 屬 (genus): Orcinus 種 (species): O. orca
二元學名
Orcinus orca Linnaeus, 1758
殺人鯨生活範圍（藍色部份）

殺人鯨

殺人鯨（英文 Orca / Killer Whale），學名叫虎鯨 / 逆戟鯨（Orcinus orca，拉丁文意思係「嚟自陰間嘅鯨魚」），事實上佢係世界上最大，最孔武有力嘅海豚／鯨魚品種。因為獵食時兇殘，有咬人嘅記錄（1973年美國海軍潛水手冊記載曾咬過一名滑浪人士），而且重食好多海獅同海豚而得到殺人鯨呢個名。

自1970年代以來，全球有24人俾殺人鯨殺死。

生物學特徵

黑白兩間係殺人鯨嘅特色。背鰭非常高聳，可達 1.8 公尺，每條殺人鯨嘅背鰭都唔同，亦係科學家主要分辨佢哋嘅特徵。對眼後面有好明顯嘅橢圓形白斑。下巴同胸前肚腩都呈白色，胸鰭大，圓圓哋。殺人鯨個腦好大，有人腦 4 倍咁重。

分布

廣泛分布世界各大海大洋，由兩極冰嘅邊緣到赤道邊嘅近岸同海都有發現。喺台灣，喺台東台南一帶水域有人見到殺人鯨嘅蹤跡。但係喺香港水域，到而家都冇殺人鯨出沒嘅記錄。

食物及生態地位

殺人鯨主要係食魚。餓起上嚟有時會食海豹、海獅、海豚、連大白鯊、北極熊都食得落肚。亦有群體追捕大型嘅鯨魚，主要係食幼鯨條脷。殺人鯨除咗人，乜嘢都唔驚，係海洋生態裏面嘅頂級捕獵者，有助維持海洋生態平衡，殺人鯨嘅健康同數量亦係海洋健康情況嘅一個指標。

保育現狀

科學家目前最了解嘅群落就只有北美太平洋岸嘅居留群，已經研究咗呢群裏面某啲鯨群有足足30年。近年海洋污染，大型嘅船隻行駛，以及水族館嘅過度捕獵等，已威脅殺人鯨嘅生存。

香港海洋公園響以前分別養過兩條殺人鯨：海威小姐同皇子，海威小姐響 1979年1月29日由冰島來港，到 1997年4月21號病死；皇子響 1989年4月13日由日本來港，直到 1991年7月10日病死。海洋公園現計劃再物色另一條殺人鯨嚟香港定居。

2010年，美國佛羅里達州一間主題公園一條雄性殺人鯨，殺死資深女訓練員，令「應否豢養殺人鯨」成為激烈爭議嘅論點。

延伸閱讀

• 香港海豚保育學會網頁
• 《自然珍藏系列-鯨與海豚圖鑑》ISBN 957-9684-16-2
• 《中國鯨類》ISBN 962-86278-1-3
• 《台灣鯨類圖鑑》ISBN 978-986-7112-37-8
• 《鯨魚生與死：海上帝王的生命之歌》ISBN 957-13-1083-2
• the blue planet

睇埋

• 鯨
• 海豚
• 香港海洋公園
• Category:動物