紐芬蘭標準時間

出自維基百科,自由嘅百科全書
跳去: 定向搵嘢

紐芬蘭標準時間(英文:Newfoundland Standard Time,簡稱NST[1])係加拿大紐芬蘭與拉布拉多省嘅一個特殊嘅時區,遲過世界協調時間3個鐘頭30分鐘(UTC+03:30),夏令時期間遲過世界協調時間兩個鐘頭30分鐘(UTC+02:30)。

歷史[編輯]

紐芬蘭標準時間係歷史遺留落來嘅習慣。當全球開始應用標準時間來劃分時區嘅時候,紐芬蘭重係一個獨立嘅英國殖民地,因此可以製訂自己嘅標準時間。由於紐芬蘭剛好佔滿晒西四區嘅東半區,而西三區同西四區嘅分界又好接近紐芬蘭嘅首府聖莊斯(St. John's),因此紐芬蘭人就決定以西三區嘅時間加30分鐘,作為自己嘅標準時間。紐芬蘭加入咗加拿大之後,喺1963年,紐芬蘭政府試過用大西洋標準時間來取代紐芬蘭標準時間,但係由於公眾反對太強烈而腰斬[2][3]

應用[編輯]

根據紐芬蘭與拉布拉多省嘅法律,成個省都應該用紐芬蘭標準時間[4],但係實際上,拉布拉多地區祇有南部少數地區跟著紐芬蘭同其他離島用紐芬蘭標準時間,其他地區就通常跟大西洋(夏令)標準時間。從2007年開始,夏令時嘅開始同結束日期,會跟埋加拿大其他省份嘅開始同結束日期,從三月嘅第二個星期日開始,到11月第一個星期日結束。

大西洋地區嘅媒體喺預報節目時間嘅時候,通常會包括埋紐芬蘭標準時間,例如「六點鐘,紐芬蘭五點半」;而紐芬蘭嘅媒體通常就會講「五點半,拉布拉多大部分地區六點」。全國性嘅媒體,例如加廣加電,都會加上紐芬蘭標準時間,但係為咗遷就全國唔同嘅廣播時間,播音員通常唔會講明幾多點,例如「宜家係(當地時間)六點廿四分,紐芬蘭重有六分鐘到正點」。

參考[編輯]

  1. Standard Time Act 2006. Retrieved ~~~~~.
  2. Newfoundland. 
  3. Turn Backward, O, Time!. The Daily News. 1963-05-27. 
  4. http://www.assembly.nl.ca/legislation/sr/statutes/s23.htm