莫卡咖啡

出自維基百科,自由嘅百科全書
跳去: 定向搵嘢
牛奶同朱古力混合響意式鮮奶咖啡入面

莫卡咖啡(又叫莫加或者摩卡,英文係 Café Mocha,意思係朱古力咖啡)係意式鮮奶咖啡(Café Latté)嘅變種。同意式鮮奶咖啡一樣,佢通常係由三分之一嘅意式特濃咖啡(Caffè Espresso)同埋三分之二嘅蒸氣發泡鮮奶配成,不過佢重會加入一少部分朱古力。朱古力通常會以朱古力糖漿嘅形式添加,但係有啲咖啡售賣系統就會以即溶朱古力粉取代。有時,打起咗嘅忌廉可可粉,同埋綿花糖都會加埋響上面嚟加重咖啡嘅香味同埋作為裝飾之用。

同意式泡沫咖啡(Cappuccino)唔同,莫卡咖啡上面係冇鮮奶泡沫嘅。取而代之,莫卡咖啡上面通常係啲打起咗嘅忌廉同埋肉桂粉或者可可粉其中之一。

另一個意式鮮奶咖啡嘅變種係白莫卡咖啡(White Café Mocha)。同莫卡咖啡唔同嘅係,白莫卡咖啡係由白朱古力,而唔係朱古力配成。除咗白莫卡咖啡之外,重有幾種由朱古力糖漿同埋白朱古力糖漿配成嘅意式鮮奶咖啡變種。

有啲歐洲中東嘅地方會以 Moccaccino 去形容加咗可可或者朱古力嘅意式鮮奶咖啡。而響美國,Moccaccino 就係指加咗朱古力嘅意式泡沫咖啡。

莫卡也門嘅一個港口,也門係一個位於亞拉伯半島南端,主要係種咖啡嘅西南亞國家。莫卡咖啡呢個名最早係嚟自也門莫加港嘅咖啡品種,呢種咖啡雖然係冇加朱古力,但聞起嚟就好似加咗朱古力一樣。