蝦夷
想搵呢個族群嘅居住地嘅話，請睇蝦夷地。| 日文寫法 | |
|---|---|
| 日文原文 | 蝦夷/愛瀰詩/毛人 |
| 假名 | えみし/えびす/えぞ |
| 黑本式羅馬字 | Emishi/Ebisu/Ezo |
蝦夷，又叫做毛人，係古代日本倭朝廷，對日本東北方族群嘅貶稱講法。依照地理嘅分佈，仲會分南蝦夷、西蝦夷、渡島蝦夷、渡覺蝦夷等。
日本古文獻度嘅蝦夷人[編輯]
日本嘅北海道，喺舊陣時係叫作蝦夷（えみし Emishi 或えぞ Ezo），日本嘅史書度有唔少關於蝦夷人嘅記載。喺日本武尊傳說成立嘅時代（6世紀），照返《日本書紀》嘅記載，日本武尊經由海路進入陸奧國（依家嘅本州東北地方）攻打東夷「日高見國」。征討完咗，「蝦夷既平，自日高見國還之，西南歷常陸（依家嘅茨城縣東北方）」（轉引自沈淑敏 nd、日本書紀、尾張國熱田太神宮緣記）。由呢度可以睇到，蝦夷人嘅勢力範圍，係由茨城縣東北地區，去到成個本州東北地方。
《日本書紀》入邊，就係咁記載蝦夷嘅：「朕聞：其東夷也，識性強暴，凌犯為宗。村之無長，邑之勿首。各貪封界，並相盜略。亦山有邪神，郊有姦鬼。……其東夷之中，蝦夷是尤強焉。男女相居，父子無別。冬則宿穴，夏則住樔。衣毛飲血，昆弟相疑。……故往古以來，未染王化。……即巧言而調暴神，振武以攘姦鬼。」「東夷之中，有日高見國。其國人，男女並椎結文身，為人勇悍。是總曰蝦夷。亦土地沃壤而曠之，擊可取之。」（轉引自沈淑敏 nd、日本書紀）
江戶時代，德川光圀編過《大日本史》，其中嘅《諸藩列傳》收有《蝦夷傳》上、下兩卷。（蝦夷傳上、蝦夷傳下）
《山海經》同倭王武上表度講嘅毛人都係指呢個族群，原先係生活喺日本關東，收尾畀倭朝廷猛咁驅趕，先至去咗本州北方重有北海道。
現存嘅「阿伊努人」同原「蝦夷人」間嘅關係[編輯]
睇埋：阿伊努族