象棋

出自維基百科，自由嘅百科全書

想搵呢個詞嘅第啲意思，睇下「象棋 (搞清楚)」。

象棋係中國傳統嘅棋，兩個人捉，分別攞紅黑；現代捉法一般都係紅行先。棋盤由九條直線同十條橫線相交而成，每邊有16隻棋，分別係：一宮頭（黑、紅分別由將、帥代表）、兩士（或仕）、兩隻象（或相）、兩隻車（或俥）、兩隻馬（或傌）、兩隻砲（或炮）、兩隻卒（或兵）；每隻棋都放喺交點上。

[編輯] 棋盤

象棋盤由九條直線同十條橫線相交而成；棋都放喺交點上面；中間一行叫「河界」，無直線，通常寫住楚河漢界（源自楚漢相爭時嘅鴻溝）或者「觀棋不語真君子，起手無回大丈夫」。

而家通行嘅記譜法中，呢九條直線，雙方都由右向左數，紅方由用中文字「一」至「九」記，黑方就由自己嘅右到左用阿剌伯數字「1」至「9」記；例如，紅方嘅一線就係黑方嘅 9 線。

第四條直線（或第 6 條直線）同第六條直線（或第 4 條直線）稱為「兩肋」、「兩肋線」，簡稱「肋」。

棋盤上，劃有斜交叉線而成「米」字形方格嘅地方，雙方各有一塊，叫為「九宮格」，簡稱「九宮」，係將 / 帥同士活動嘅地區。