趙立堅

趙立堅
中華人民共和國外交部新聞司副司長
現任
就任日期 2019年8月 同于敦海、汪文斌同時在任
司長	華春瑩
個人資料
出世	(1972-11-10) 1972年11月10號 中華人民共和國河北唐山
配偶	未婚

趙立堅（1972年11月10號—）係中國男外交官，河北唐山人，依家係中華人民共和國外交部新聞司副司長兼發言人，同于敦海、汪文斌同時在任，新聞司司長華春瑩手下。

爭議

趙立堅曾經因為喺Twitter同埋唔同嘅媒體，發表一啲假新聞同埋挑釁性言論，被部份嘅人非議。

美軍幫助武漢肺炎傳播陰謀論

趙立堅曾經聲稱，美軍可能喺武漢肺炎傳播方面發揮咗作用，呢個陰謀論結果畀唔少人批評。

就剝奪香港溫和民主派議員資格事件恐嚇五眼聯盟外長

美國、澳洲、加拿大、新西蘭同埋英國（五國合稱五眼聯盟）嘅外長，喺11月18日就香港問題發表聯合聲明，表示對於北京忽然採用新嘅規則嚟取消4個香港溫和民主派議員嘅資格表示嚴重關切，批評中國違反 具有法律約束力嘅《中英聯合聲明》，亦損害《基本法》呼籲香港人嘅權利。趙立堅之後回應事件，話唔理佢哋有五隻眼定十隻眼，叫佢哋小心自己嘅眼睛被督穿。近年關注香港問題嘅民運人士王丹之後批評，話呢啲係低級粗俗嘅外交語言，用來迎合中國國內愛國憤青同埋底層老百姓嘅閱聽習慣，激發國內民族主義情緒，為進一步向全球擴張，奠定國內嘅民意支持。另外，亦有網民批評呢啲係戰爭挑釁，係黑社會流氓所為。

發佈偽造圖片指控澳洲軍隊

2020年11月，趙立堅喺Twitter發布咗一張相，聲稱入面係一名澳洲士兵將刀放喺一個阿富汗兒童嘅頸上面。事件引嚟澳洲反彈，澳洲總理史葛·摩利臣呼籲要將呢張相刪除，又批評中國政府應該為呢個Twitter帖感到萬分羞愧。

事件之後發酵，唔同國家，例如法國同紐西蘭都有批評中國嘅做法。法國批評中國咁做唔符合國際外交嘅預期，指趙立堅咁做令人震驚，評論帶有偏見，侮辱近20年來所有向阿富汗派遣武裝部隊嘅國家。史葛·摩利臣一度通過微信對事件向澳洲嘅華人直接回應，又話事件唔會削弱大家對澳洲華人社區嘅尊重同讚賞，或者削弱澳洲同中國人民嘅友誼。但係，呢篇文章亦被微信審查，當作違規嘅文章刪除。澳洲國立大學研究澳中關系同中國經濟嘅簡·高利教授（Jane Golley），就話呢件事係中共總書記習近平領導下，戰狼外交嘅升級，又話中國喺度向全世界表明，中國嘗試影響緊世界其他地區，又似乎向世界表示，假如喺人權問題向中國施壓，中國就會為佢哋製造麻煩。

特登扭曲《舊金山和約》同拒絕承認

喺2022年7月5日嘅一個中國外交部記者會裡面，趙話1942年訂嘅舊金山和約係排斥左中共而立嘅「非法條約」，話自己同前蘇聯，波蘭等東歐國家唔會認（但中共果陣仲未立國）；而且佢仲刻意將日本放棄對台灣、澎湖等地行使主權嘅部分，扭曲做係恢復中國對呢啲地方或國家行使主國，仲老屈有關條約違犯國際法。