黃飛鴻

黃飛鴻

黃飛鴻（1847年—1924年，有講法話係1847年農曆七月初九–1925年農曆三月廿五），原名黃錫祥，字達雲，祖籍廣東西樵嶺西祿舟村，係嶺南武術宗師同有名嘅醫師。

生平

黃飛鴻喺廣東南海佛山出世，阿爸係黃麒英，屬於「廣東十虎」之一。黃飛鴻五歲開始就學武功，學過鐵線拳、無影腳。黃飛鴻好後生就已經練得一手好武功，經常喺佛山、廣州一帶賣武。

除咗賣武之外，黃飛鴻又識得醫人，早喺1863年就喺省城嘅西關開設咗跌打醫館。1886年又開設咗寶芝林醫館。

1924年12月，黃飛鴻因為長期病而喺廣州方便醫院過身，享年七十七歲。無耐佢老婆莫桂蘭同埋兩個仔，重有黃飛鴻嘅徒弟林世榮都移居咗香港，開館授徒。

電影形象

黃飛鴻徒弟林世榮喺香港教武功，其中唔少人都投身港產片界，例如劉家良。六十年代香港拍咗差唔多一百部黃飛鴻系列電影，其中黃飛鴻幾乎都係由關德興主演；而反派就幾乎全部由石堅演出。

1991年徐克又拍咗幾部黃飛鴻電影，而黃飛鴻就由李連杰主演。