齋鹵味

一碗白飯上嘅齋鹵味

齋舖前嘅齋鹵味外賣部，店員正為外賣嘅酸齋剪細

齋鹵味（通齋滷味）係一種齋，一般有「酸齋」（酸甜齋）、「豉油（蠔油）齋」同「咖哩齋」嘅口味。外形造成「齋雞」、「齋鮑魚」、「齋叉燒」同「齋鴨腎」等唔同嘅質感同個樣，佢哋主要成份都係麵筋夾埋唔同嘅醬汁整成。

酸齋嘅紅色往往係用人工合成嘅食用色素E110（又叫日落黃），豉油齋同咖哩齋就可能加入 E621，即係谷氨酸鹽增味劑。日落黃喺挪威同芬蘭已經全面禁用，亦有組織催促美國食品藥品監督管理局（U.S. Food and Drug Administration, FDA）禁用日落黃，因為呢種嘢可能影響細路嘅行為同專注力。

齋鹵味係香港嘅傳統齋舖都有得賣，市民亦會外賣返屋企食。但係，呢類嘢食長時間放喺室溫之內，會滋生細菌，導致細菌性食物中毒。

《齋鹵味》亦係一部2006年香港上映嘅電影春田花花同學會一首歌曲嘅名。曲調係英文歌 Yellow Bird，由梁洛施主唱，葉氏兒童合唱團伴唱。歌詞中嘅「齋鹵味，細個就已經食。齋鹵味，至正係拜山食。」睇來齋鹵味可以算做香港人嘅集體回憶。