亨利·浦修

亨利·浦修

亨利·浦修（英文：Henry Purcell；1659年9月10號—1695年11月21號），國語譯亨利·普賽爾，係巴洛克時期嘅英格蘭作曲家。佢嘅作品吸收咗法國同意大利音樂嘅特點，創作出獨特嘅英格蘭巴洛克音樂風格。

浦修喺倫敦嘅西敏地區出世。爸爸大亨利·浦修（Henry Purcell Sr.）做過查爾斯二世（Charles II）嘅宮廷樂師。浦修細個嗰陣時係王室小禮拜堂合唱團嘅團員，後來聲帶受傷，轉任樂器保管員。佢已經拜過莊·保路（John Blow）為師學音樂。1680年，浦修做咗西敏寺嘅管風琴師，1682年又開始兼任王室小禮拜堂嘅管風琴師。1695年浦修突然過咗身，年僅36歲，最後喺西敏寺裏面佢彈過嘅管風琴附近安葬。

浦修喺短暫嘅一生裏面，創作咗大量器樂、歌曲、話劇配樂同埋少數歌劇，喺英國古典音樂歷史上面有重要地位。佢套歌劇《狄朵與埃涅阿斯》（Dido and Aeneas）係英格蘭歌劇嘅名作，而佢套戲劇《摩爾人復仇記》（Abdelazer，或者The Moor's Revenge）入面嘅一個主體，更加被20世紀作曲家布烈頓男爵（Edward Benjamin Britten, Baron Britten）喺《青少年管弦樂隊指南》（The Young Person's Guide to the Orchestra）裏面引用。

《丹麥王子進行曲》

好多人經常將《丹麥王子進行曲》（Prince of Denmark's March）歸於浦修嘅名下，又或者將《丹麥王子進行曲》誤認做浦修嘅《小號即興曲》。但係其實《丹麥王子進行曲》係由同一時期嘅另一位作曲家謝里美亞·卡勒（Jeremiah Clarke）創作嘅。