光復元朗

光復元朗係2015年3月1號喺香港搞嘅一場抗議活動，係繼光復上水、光復屯門、捍衛沙田之後嘅第四波反自由行及水貨客運動。

參與活動嘅元朗居民有見自當局批准中國居民赴港「自由行」後，該區環境慢慢被入侵嘅水貨客破壞，因此去到水貨客重災區表達不滿，並以行動呼籲政府採取行動打擊水貨客。

四百名示威者到元朗參加「光復行動」反水客示威，同大約二百名自稱元朗鄉民嘅人爆發衝突，示威者兩度衝出元朗大馬路令交通癱瘓，幾十商舖包括麥當勞要落閘，衝突中多人受傷，差人多次施放胡椒噴霧。呢場歷來最激烈嘅反水客示威衝突持續超過六個鐘，到夜晚十點示威者先開始散，差人捉咗三十三人入差館，五個差人受傷。