千年蟲騙案
千年蟲騙案係響2000年前後響香港發生嘅騙案，騙徒利用公眾對科技嘅無知嚟行騙。
背景
[編輯]2000年前後，全球關注千年蟲問題，當中嘅「蟲」（bug）只係電腦軟件由隱藏數值引起[1]嘅失誤，只會影響電腦軟件嘅運作[2]，對人體無害，但係騙徒就將佢講成一種真實嘅害蟲，誘騙對千年蟲問題一知半解嘅人購買[3]，令佢哋以為千年蟲係一種類似瘟疫、傳染病等等嘅病毒，感染咗嘅人類可能會死，推銷「可以殺死千年蟲」嘅殺蟲劑[4] [5]。好多時，騙徒會話貨品可以高價轉手，賺取差價。
變種
[編輯]另一種千年蟲騙案入面，騙徒扮信用咭公司職員，打電話畀受害人，話要報上信用咭號碼嚟核實，信用咭先至可以過渡2000年。最後，騙徒會響未經同意之下用信用咭資料買嘢[6]。
實例
[編輯]一個婦人以為千年蟲係肚入面生長嘅蟲，被三個騙徒遊說，買入一百粒三百蚊一粒嘅「千年蟲杜蟲藥」，連同現金、手鐲同戒指，俾人呃咗三萬幾[7] [8] [9]。
類似騙局
[編輯]千年蟲騙案同另一種騙案寶藥黨有唔少相似之處。響千年蟲問題被廣泛關注之前，騙徒都用過科技術語行騙，例如推銷一啲「預防電腦病毒入侵人體」嘅藥物。事實上，所謂嘅「電腦病毒」只係具有破壞力嘅電腦程式。
參考
[編輯]- ↑ 〈2038年千年蟲危機再次出現？〉。北美華人網。喺2013-05-26搵到。｢『2038蟲』的起因與『千年蟲』相似，都是由軟件編碼中的隱藏數值引起，問題出於32位元或以下的作業系統。｣
- ↑ 凌浩尋 (1999)。《Y2K千年蟲危機: 對你日常生活的挑戰及早為千年蟲作準備》。香港：宣道出版社。ISBN 9789622445666。
- ↑ 周顯 (2011-09-06)。〈思捷性價比 不及佐丹奴〉。《明報》。原著喺2013-03-08歸檔。喺2013-05-26搵到。｢以我的智力，頂多是設計出『殺毒軟件』，但是一個12年前的阿婆，怎會明白什麼是軟件？｣
- ↑ 〈1221：該下注還是走路？〉。《光明日報》。2012-11-21。原著喺2016-03-05歸檔。喺2013-05-26搵到。
- ↑ 〈過去‧識：千年蟲危機〉。《商業電台》。2008-12-31。原著喺2016-03-05歸檔。喺2013-05-26搵到。
- ↑ 〈留心今年骗徒十大骗术〉。原著喺2016-03-05歸檔。喺2013-05-26搵到。
- ↑ 〈千年蟲有藥可醫，無知婦誤信上當〉。《深圳特區報》。1999-04-21。
- ↑ 〈有備無懼千年蟲〉。喺2013-05-26搵到。
- ↑ 〈買"蟲藥"殺"千年蟲"港老婦被騙三萬多〉。《福州晚報》。原著喺2016-03-05歸檔。喺2013-05-26搵到。