李儇

李儇（862年6月8號—888年4月20號），本名李儼，係大唐第十八位皇帝（唔計武則天），873年到888年在位，跟廟號叫唐僖宗。

咸通十四年七月，即八七三年，皇帝李漼病重，七月十八日死。當時普王李儼畀人奉做太子，改名李儇。七月二十日即位。

李儇做皇帝十五年，有八年唔喺京師長安，係大唐咁多位皇帝之中，走佬時間最耐嘅一位。

李儇做皇帝期間，政事全部交畀宦官田令孜掌握，自己就學埋老頭李漼，肆無忌憚咁玩，鍾意鬥雞、賭鵝、騎射、劍槊、法算、音樂、圍棋。佢好鍾意擊鞠，曾經對身邊嘅優伶石野豬講過一句話：「朕如果參加擊球進士科考試，應該中個狀元。」當時災害連年，人民生活苦過弟弟，官員盤剝沉重，結果引發咗黃巢之亂。黃巢要攻長安之際，佢又要四人用擊鞠決定，邊個做西川節度使，是為擊球賭三川。

888年，李儇駕崩，細佬李曄繼位。