大力鉗

大力鉗

而家大力鉗加咗個「手掣」（左邊下面）一「撳掣」就放開鎖死嘅位置

大力鉗，乸鉗（英文：Locking pliers，Vise-Grips，Mole wrench，vice grip）係種鉗，可以鎖死成個鉗，唔使靠隻手夾埋個手柄，鎖死拑嘢時，唔使理個鉗，慳力慳人手。

依家啲大力鉗款式好多，主要係個鉗頭有分別，形狀唔同嘅鉗頭，去處理唔同嘅工作需要，好似夾水喉、燒焊用，抖木用，拆螺絲專用咁。

史

史上第一個大力鉗叫「Vise-Grips」，由美國人威廉 S. 彼得遜（William S. Petersen）一九二四年喺內布拉斯加州 De Witt 鎮發明。彼得遜自己推銷，一九三四年喺返 De Witt 鎮開鋪，叫彼得遜製造公司（Petersen Manufacturing Company），一九三八年正式生產。彼得遜喺一九四〇年八月十七號再申請專利，兩年後獲批。

喺英國，大力鉗叫 Mole wrench，而《泰晤士報》話係由英國人唐瑪士 郭特利（Thomas Coughtrie）「發明」嘅。一九五零年代郭特利喺 M. K. Mole and Son 呢間公司做常務董事，佢喺一九五七年五月七號申請專利，一九五八年七月十六號批出。比彼得遜嘅專利申請遲咗十七年，而兩個專利嘅畫圖好鬼似。

之後陸陸續續有類似嘅產品推出，主要係鎖死同埋放鎖嘅設計有唔同，但整體來講都用相同原理。而近年嘅發展就係個鉗頭出現變化，令有更多功能。

用

大力鉗嘅尾部（第一張圖嘅左邊上面）有粒螺絲頭，用嚟控制個鉗嘴開合嘅闊度，順時針扭令鉗嘴收窄。然後將大力鉗嘅柄合起，細細力拑嘅喺要拑嘅嘢上面，再調節螺絲頭，啪實手柄就會拑實鎖死（會聽到 kick 一聲）。用完個鉗，「撳」一下個手掣就會放開個鉗。

大力鉗之所以鎖得死係因槓桿作用，佢有四大好處：

• 槓桿作用令大力鉗比普通鉗大力得多。
• 大力之如，力度控制細緻準成，因為鉗嘴唔會閂過籠。
• 鉗嘴開合大細可以精確咁控制。
• 鉗閂咗就繼續閂，唔使理，直到畀人開返。

拎出去

• Vise Grips versus Mole Grips Progress is fine, but it's gone on for too long (2017) （英文）