招股上市
(由招股跳轉過嚟)
招股上市，有時就咁叫招股或者上市，或者公開招股、掛牌上市、新股上市，係一間私人公司第一次將股票賣畀公眾。呢類招股通常係間規模唔係咁大嘅新公司，要籌多啲錢來發展，即係上市集資或招股集資。有時大私人公司想轉為畀公眾賣買，都會招股上市。招股上市亦都叫首次公開招股，來自英文Initial Public Offering，縮寫係IPO。
依類股票通常叫做新股。因為新股會上去股票市場買賣，呢個動作就叫掛牌(listing)。公眾認購嘅股數，有時多個發行股數，要抽籤決定，所以認購嘅行為又叫抽新股。
發行商會搵包銷商幫手搞上市，等佢估睇下發邊種股，係普通股定優先股，同埋定發行價同發行日期。
買新股係種高風險嘅投資。個別投資者係好難做計首日掛牌同之後有乜事，因為實在無乜往績。呢煩公司亦都響成長嘅過渡期，好難預計未來嘅價值。
上市原因
[編輯]當一間公司股票響市場掛牌，多數都會發新股，咁樣就有額外資本收入。一般買賣股票，錢喺投資者間通手。而投資者出來買新股，錢係入咗公司袋。所以，招股可以為公司帶來大筆錢去畀公司發展。公司唔使再畀返錢出來，不過新股東就有權分享公司嘅利潤。
發新股嘅同時，原有股東嘅佔公司股份嘅比例會降低，之不過，舊股東期望呢筆錢可以令到佢嘅股票更加有價值。
上市集資比其他集資方法嘅好處係，間公司唔使揹債又有大筆錢擴充，而佢亦唔使同個別投資者傾偈。所以好多公司都想上市。