東南亞開賭熱潮

有唔少（中國）陸港澳官員及商人，趁住中共總書記習近平推廣一帶一路政策，走去南洋發展中國家開賭場及與其類似嘅檔口，形成一股熱潮；佢哋現場賭博及直播賭博兩種生意都有做。後來「灰色」嘅賭業備受打擊，嗰啲集團於是陸續轉營到以多種「黑色」生意為主業，變得惡名昭彰。其中最出名嗰三個老闆——佘智江、徐愛民及董勒成，都係（中國）大陸政商界嘅大粒佬。

起

澳門賭場嗰班撈家以華人為主，就連嚟自美國嗰啲集團嘅架步入面都係噉樣，澳門、香港、台灣及（中國）大陸嘅勢力都有深入參與，尤其是喺成日亂嚟嘅賭廳呢部分；佢哋習慣咗揾（中國）大陸有錢人做客，其多數收入亦係嚟自佢哋嘅。由於呢種生意模式利潤唔錯，嗰班人向外擴充，其中南洋係最熱門嘅選址，當地數國有多處於是大興土木；主要目標客户來源冇變，因此其選址有越嚟越多同佢哋語言相通嘅華人聚居。嗰啲商人所用嘅資金，有唔少係靠喺香港成立嘅上市公司籌集得嚟咖。

承

澳門賭業之經營方式，加劇咗唔少（中國）大陸已有嘅問題——例如資金外流、貪污腐敗及跨境收數，而且越嚟越大鑊。中共（嘅若干勢力）於是陸續加力打擊澳門賭業，包括阻止該黨（若干勢力嘅）官員行入澳門賭場。喺澳門揾食嘅呢班友，尤其是開賭廳及做疊碼嗰啲，繼續以（中國）大陸有錢人為主要客源，因此使出新招，盡量繞過中共（若干勢力嘅）防範，包括將擺落南洋窮國嘅投資加碼，以及做埋網上直播賭博；（中國）大陸政商要員亦樂於合伙，由於擁有同當地軍政勢力勾結嘅本事，亦有最多（中國）大陸嘅關鍵人脈，重要係出錢最多者，佢哋逐漸成為當中嘅揸拂人。

轉

南洋多處嘅賭業後來崩潰，有唔少一度興旺之城鎮變得冷清；原因包括中共（嘅若干勢力）出手應付佢哋嘅新把戲及武漢肺炎肆虐。嗰啲撈開偏門嘅集團因為生意不境，所以紛紛轉行——電訊詐騙、綁架勒索、強迫賣淫及活摘器官等；台灣黑幫掌握最精湛嘅呃人技術，因此得以分一杯羹。基於嗰班賊嘅語言特長以及目標得救／逃走／報仇嘅難度等因素，佢哋專向（相對於陣地位置嘅）外國之華人落手。中共（嘅若干勢力）同呢啲犯罪組織，貓捉老鼠噉樣低調較量咗好多年，雖然前者久唔久就會有新收獲，但係依然冇辦法將對方斬草除根；兩者一直互相見招拆招，彼此技術皆持續進步，乃至於家陣後者安營紮寨之處有唔少位於有軍事麻煩嘅地方，外間難以干涉。

合

隨住台灣受害者急劇增多，响2022年8月，有大把驚心動魄嘅情節及畫面經傳媒曝光，引起好多人及組織嘅關注，亦因此有更多國家嘅黑白勢力加入營救人質行動。而家輿論對於南洋華資賭業及其衍生之行當，已經冇咁關注；佢哋雖然被削弱咗，但係繼續運作緊，外界對其實況重係一知半解。响2022年，由於中共政策改變，澳門賭業變得更加政治化，（中國）大陸、香港及澳門（若干勢力嘅）商人喺南洋撈起賭嚟亦比以往危險；與此同時，南洋各國針對武漢肺炎嘅防疫措施大舉放寛；台灣幫派紛紛將僅餘設於澳門嘅賭博生意撤離，並乘住競爭對手俾中共（嘅若干勢力）㩒住及南洋經濟復甦嘅勢頭，移師過去開檔。